Haʼu moris iha sidade Calgary iha provínsia Alberta, rai-Kanadá. Bainhira kiʼik, haʼu-nia inan-aman soe-malu, no amá no haʼu muda ba avó nia uma. Haʼu-nia avó-mane no avó-feto hadomi ami no haʼu sente dame no kontente. Haʼu iha memória barak neʼebé diʼak kona-ba tempu neʼe.

 Kuandu haʼu tinan hitu, haʼu-nia moris troka sai aat. Iha tempu neʼebá, amá kaben fali ho apá no ami muda ba Saint Louis iha Missouri, Estadus Unidus. Lakleur deʼit haʼu hatene katak apá mak ema neʼebé la hanoin ema seluk. Porezemplu, iha loron primeiru neʼebé haʼu bá eskola foun, alunu sira fó susar mai haʼu hodi baku haʼu. Apá hatene katak haʼu la baku fali sira, no neʼe halo nia sai hirus tebes toʼo baku haʼu aat liu fali duké buat neʼebé alunu sira-neʼe halo ba haʼu. Tan neʼe haʼu komesa baku malu beibeik ho ema seluk kuandu haʼu sei tinan hitu.

 Amá estrese ho apá nia hahalok neʼebé hirus lalais, no sira sempre istori malu ho lian makaʼas. Haʼu komesa uza droga no hemu tua demais bainhira haʼu tinan 11. Haʼu sai siʼak-teen liután no sempre baku malu ho ema seluk iha dalan. Bainhira haʼu gradua husi eskola sekundária, haʼu sai ona ema neʼebé gosta halo violénsia makaʼas.

 Bainhira haʼu tinan 18, haʼu sai tropa mariñeiru iha Estadus Unidus. Haʼu hetan treinu no aprende dalan oioin atu oho ema. Depois tinan 5 liutiha, haʼu sai husi militár hodi bele aprende psikolojia, tanba haʼu hakarak serbisu iha FBI ka Departamentu Federál Investigasaun. Haʼu komesa estuda iha universidade iha Estadus Unidus no depois neʼe haʼu muda fali ba Kanadá no kontinua estuda iha universidade.

 Iha universidade, haʼu laran-kraik tebes ho ema nia hahalok. Haʼu sente katak ema mak hanoin an deʼit, buat hotu iha mundu mak mamuk deʼit, no la iha solusaun ba problema oioin iha mundu. Haʼu lakon esperansa katak ema sei hadiʼa problema sira iha mundu neʼe.

 Haʼu lakon ona objetivu ba moris, tan neʼe haʼu komesa moris arbiru no tau fokus deʼit atu hemu tua demais, uza droga, buka osan demais no halo relasaun seksuál. Haʼu hanoin deʼit kona-ba tuir festa iha fatin oioin no halo relasaun seksuál ho feto oioin. Haʼu mós sai fiar an tanba hetan treinu iha militár, entaun haʼu baku malu beibeik ho ema seluk. Haʼu hanoin katak haʼu bele deside saida mak sala no loos, entaun kuandu haʼu sente katak ema ida halo buat neʼebé la justu ba ema seluk, haʼu prontu atu kontra hasoru sira. Maibé tuir loloos, violénsia mak kontrola ona haʼu.

 Loron ida, kuandu haʼu no kolega ida uza droga iha haʼu-nia uma no prepara daudaun ganja atu haruka no faʼan, kolega neʼe husu haʼu se haʼu fiar ba Maromak ka lae. Haʼu hatán: “Se Maromak mak hamosu terus oioin iha mundu, haʼu lakohi koñese nia!” Loron tuirmai mak haʼu-nia loron primeiru iha serbisu-fatin foun, maluk serbisu-naʼin ida neʼebé Testemuña ba Jeová husu haʼu: “Tuir ó-nia hanoin, Maromak mak hamosu terus oioin iha mundu neʼe ka lae?” Haʼu hakfodak tanba ninia pergunta mak atu hanesan ho buat neʼebé haʼu hatete ba haʼu-nia kolega no haʼu interese. Ba fulan neen tuirmai, ami koʼalia hamutuk beibeik, no nia hatudu mai haʼu Bíblia nia resposta ba haʼu-nia pergunta oioin kona-ba moris.

 Iha tempu neʼebá, haʼu hela hamutuk ho feto ida, no ami promete malu atu kaben. Nia la gosta bainhira haʼu koʼalia ba nia kona-ba buat neʼebé haʼu aprende husi Bíblia. Iha loron-domingu ida, haʼu hatete ba nia katak haʼu konvida ona Testemuña sira atu mai uma atu estuda Bíblia hamutuk. Loron tuirmai bainhira haʼu fila husi serbisu, haʼu haree katak nia lori sasán hotu no husik haʼu. Haʼu sai ba liʼur no tanis. Haʼu mós halo orasaun ba Maromak hodi husu ajuda. Neʼe mak primeiravés haʼu uza Maromak nia naran Jeová iha haʼu-nia orasaun.—Salmo 83:18.

 Liutiha loron rua, feen-laʼen Testemuña mai no ami estuda Bíblia hamutuk ba dala primeiru. Depois sira fila, haʼu kontinua lee livru Saudara Dapat Hidup Kekal dalam Firdaus di Bumi, no haʼu lee hotu livru neʼe iha kalan neʼebá. a Buat neʼebé haʼu aprende kona-ba Maromak Jeová no ninia Oan-Mane Jesus Kristu book duni haʼu-nia laran. Haʼu komprende katak Jeová hanoin ema no bainhira ita hetan terus nia mós sente terus. (Isaias 63:9) Liuliu buat neʼebé book haʼu-nia laran mak Maromak nia domin ba haʼu no sakrifísiu neʼebé ninia Oan-Mane halo hodi ajuda haʼu. (1 João 4:10) Haʼu aprende katak Jeová hatudu pasiénsia mai haʼu “tanba nia lakohi ema ida lakon maibé nia hakarak ema hotu atu arrepende sala”. (2 Pedro 3:9) Haʼu sente katak Jeová hakarak haʼu atu sai ninia belun.—João 6:44.

 Haʼu komesa kedas tuir reuniaun iha semana neʼe. Iha tempu neʼebá, haʼu-nia fuuk naruk, haʼu tau brinkus, no haʼu-nia jeitu halo ema seluk sente taʼuk, maibé Testemuña sira simu haʼu no trata haʼu hanesan sira-nia família neʼebé kleur ona sira la hasoru. Sira hatudu hahalok hanesan ema Kristaun neʼebé loos. Haʼu sente hanesan fila fali ba haʼu-nia avó nia uma, no neʼe diʼak liu sei kompara ho tempu uluk.

 Lakleur, haʼu troka haʼu-nia moris tuir buat neʼebé haʼu aprende husi Bíblia. Haʼu tesi kabeer haʼu-nia fuuk, la halo tan hahalok la morál oioin, para uza droga no mós la hemu tua demais. (1 Korinto 6:9, 10; 11:14) Haʼu hakarak halo Maromak Jeová kontente. Bainhira haʼu aprende katak haʼu halo buat neʼebé Jeová la simu, haʼu la buka razaun oioin. Duké halo nuneʼe, haʼu sente triste tebes no hatete ba haʼu-nia an: ‘Haʼu labele tan halo hanesan neʼe.’ No haʼu koko kedas atu troka haʼu-nia hanoin no hahalok. Rezultadu mak haʼu hetan benefísiu oioin tanba halo tuir Jeová nia dalan. Fulan neen depois haʼu komesa estuda Bíblia, iha data 29 Jullu 1989, haʼu hetan batizmu nuʼudar Testemuña ba Jeová.

 Bíblia ajuda haʼu atu troka haʼu-nia hahalok. Uluk haʼu halo violénsia beibeik bainhira ema hirus hasoru haʼu. Maibé agora haʼu hakaʼas an atu “iha dame ho ema hotu”. (Roma 12:18) Haʼu labele halo mudansa neʼe ho haʼu-nia forsa rasik, maibé haʼu agradese ba Jeová tanba nia fó forsa mai haʼu liuhusi ninia Liafuan Bíblia no espíritu santu.—Galásia 5:22, 23; Ebreu 4:12.

 Duké sai atan ba droga, violénsia, no hahalok neʼebé la morál, agora haʼu hakaʼas an atu halo Maromak Jeová kontente no fó ba nia buat diʼak liu neʼebé haʼu iha. Neʼe inklui ajuda ema seluk atu hatene kona-ba Jeová. Tinan balu depois hetan tiha batizmu, haʼu muda ba rai seluk hodi bele haklaken iha área neʼebé presiza liután haklaken-naʼin. Durante tinan barak, haʼu hetan haksolok hodi hanorin ema barak no haree oinsá Bíblia mós ajuda sira-nia moris. Haʼu mós kontente tebes tanba amá sai Testemuña ba Jeová. Buat ida neʼebé book nia mak mudansa diʼak sira neʼebé haʼu halo iha haʼu-nia moris.

 Iha tinan 1999, haʼu gradua husi eskola neʼebé ohin loron bolu nuʼudar Eskola ba Haklaken-Naʼin Tempu-Tomak iha rai-Elsalvadór. Eskola neʼe treinu haʼu atu haklaken, hanorin ema, no mós tau matan maluk Kristaun sira iha kongregasaun. Iha tinan 1999 nia rohan, haʼu kaben ho Eugenia. Haʼu no haʼu-nia feen doben serbí hamutuk nuʼudar haklaken-naʼin tempu-tomak iha rai-Guatemala.

 Agora, haʼu iha objetivu iha haʼu-nia moris no sente kontente tebes. Hodi aplika Bíblia nia hanorin iha haʼu-nia moris, haʼu sai livre husi hahalok aat oioin, hanesan hahalok la morál no violénsia, no haʼu hetan moris neʼebé nakonu ho domin no dame neʼebé loos.