Haʼu moris iha Montreál, neʼe mak sidade neʼebé boot liu iha provínsia Kebeke iha rai-Kanadá. Haʼu-nia inan-aman iha oan naʼin-haat no sira haboot ami ho domin iha bairru Rosemont. Ami-nia família moris hakmatek no iha dame.

 Kuandu haʼu kiʼik, haʼu iha interese ba Bíblia. Haʼu hanoin-hetan, bainhira tinan 12, haʼu gosta tebes atu lee kona-ba Jesus nia moris iha Bíblia. Jesus nia hahalok hanesan domin ba ema no hanoin ema seluk book tebes haʼu-nia laran no haʼu mós hakarak haburas hahalok sira-neʼe. Triste mak bainhira haʼu-nia idade aumenta, haʼu komesa ransu ho kolega sira neʼebé fó influénsia aat, no haʼu ladún interese ona kona-ba Bíblia.

 Haʼu-nia aman toka instrumentu múzika ida naran saksofone. Nia fó ninia saksofone mai haʼu, no mós kuda domin ba múzika iha haʼu-nia laran, no tuirmai múzika sai buat neʼebé importante iha haʼu-nia moris. Haʼu gosta tebes múzika, tan neʼe haʼu mós aprende toka viola. Tuirmai, haʼu forma banda múzika rock hamutuk ho kolega balu no ami halo konsertu balu. Ema balu neʼebé halo múzika no famozu iha área múzika, rona ami-nia múzika, no konvida haʼu atu asina kontratu ho kompañia múzika neʼebé boot. Haʼu asina kontratu atu serbisu hamutuk ho sira. Haʼu-nia múzika sai famozu no rádiu iha área Kebeke mós loke beibeik ida-neʼe.

 Haʼu sente katak haʼu hetan ona buat hotu neʼebé haʼu hakarak. Haʼu joven no famozu, no haʼu manán osan barak hodi halo buat neʼebé haʼu gosta. Durante loron, haʼu bá gym, halo entrevista, fó haʼu-nia asinatura ba ema, no mosu iha televizaun. Iha kalan, haʼu halo konsertu no tuir festa oioin. Atu la sente estrese bainhira hasoru haʼu-nia fans, haʼu komesa hemu tua no ikusmai haʼu mós uza droga. Haʼu moris arbiru no la iha morál.

 Ema balu laran-moras mai haʼu tanba haʼu haree hanesan ema neʼebé kontente. Maibé iha haʼu-nia laran, haʼu sente mamuk loos no triste liuliu kuandu haʼu mesak. Haʼu sente depresaun no laran-taridu. Iha tempu neʼebé haʼu sai famozu liután, mane naʼin-rua neʼebé prodús haʼu-nia múzika mate tanba moras AIDS. Haʼu hakfodak tebes. Maski haʼu hadomi múzika, maibé haʼu hakribi moris hanesan neʼe.

 Maski haʼu hetan ona susesu, haʼu rekoñese katak situasaun iha mundu mak aat tebes. Tanbasá mundu neʼe nakonu ho situasaun neʼebé la justisa? Tanbasá Maromak la halo buat ida? Tuir loloos, haʼu halo orasaun beibeik ba Maromak atu hetan resposta. Bainhira foti feriadu no la halo konsertu, haʼu komesa fali atu lee Bíblia. Maski haʼu ladún komprende buat neʼebé haʼu lee, maibé haʼu hatene katak mundu nia rohan besik ona.

 Bainhira haʼu lee Bíblia, haʼu aprende katak Jesus halo jejún ba loron 40 iha rai-fuik. (Mateus 4:1, 2) Haʼu hanoin katak se haʼu mós halo jejún, karik Maromak sei hatudu ninia an mai haʼu, entaun haʼu deside loron atu komesa jejún. Semana rua antes hahú jejún, Testemuña ba Jeová naʼin-rua dere haʼu-nia odamatan, no haʼu konvida kedas sira tama hanesan haʼu hein ona sira atu mai. Haʼu hateke ba Testemuña ida naran Jacques, no husu: “Oinsá mak ita bele hatene katak ita moris iha mundu neʼe nia loron ikus?” Nia loke Bíblia no hatán ba haʼu-nia pergunta hodi lee 2 Timóteo 3:1-5. Haʼu husu pergunta barak ba sira naʼin-rua hanesan tiru kilat-musan tuituir malu, no haʼu hakfodak no kontente ho sira-nia resposta neʼebé lójiku no bazeia ba Bíblia. Depois simu sira-nia vizita ba dala balu, haʼu rekoñese katak haʼu la presiza halo jejún.

 Haʼu hahú estuda Bíblia beibeik hamutuk ho Testemuña sira. Ikusmai haʼu tesi badak haʼu-nia fuuk no komesa tuir reuniaun hotu. Ema simu haʼu no fó benvindu ho laran, neʼe halo haʼu fiar metin liután katak haʼu hetan ona lia-loos.

 Atu bele aplika buat neʼebé aprende husi Bíblia, haʼu presiza halo mudansa boot iha haʼu-nia moris. Porezemplu, haʼu presiza para uza droga no tenke husik moris neʼebé la morál. Haʼu mós presiza halo mudansa hodi la hanoin an deʼit, maibé hanoin ema seluk nia diʼak. Haʼu iha oan naʼin-rua neʼebé haʼu haboot mesak, entaun haʼu mós tenke aprende atu tau matan oan sira-nia presiza emosaun no espirituál. Tan neʼe, haʼu para atu toka múzika no komesa serbisu iha fábrika ho saláriu uitoan deʼit.

 Haʼu sente la fasil atu halo mudansa sira-neʼe hotu. Bainhira haʼu koko atu para husi droga, haʼu sente terus tebes no komesa uza fali droga dala balu. (Roma 7:19, 21-24) Buat neʼebé susar liu atu husik mak haʼu-nia moris neʼebé la morál. Haʼu-nia serbisu foun mós halo haʼu kole tebes no haʼu sente laran-kraik tanba simu osan uitoan deʼit. Haʼu presiza serbisu ba fulan tolu atu bele simu osan neʼebé uluk haʼu bele manán iha oras rua deʼit.

 Orasaun mak ajuda haʼu atu kontinua halo mudansa neʼebé susar. Haʼu mós sente katak lee Bíblia beibeik mak buat neʼebé importante. Iha eskritura balu neʼebé anima tebes haʼu. Ida mak 2 Korinto 7:1 neʼebé anima ema Kristaun atu “hamoos [sira-nia] an husi buat hotu neʼebé hafoʼer isin no neon”. Eskritura seluk neʼebé halo haʼu fiar metin katak haʼu bele manán toman aat sira mak Filipe 4:13 neʼebé dehan: “Iha situasaun hotu haʼu hetan forsa liuhusi nia neʼebé fó kbiit mai haʼu.” Maromak Jeová hatán ona haʼu-nia orasaun no ajuda haʼu atu komprende no aplika lia-loos husi Bíblia. Neʼe motiva haʼu atu dedika haʼu-nia moris ba nia. (1 Pedro 4:1, 2) Haʼu hetan batizmu nuʼudar Testemuña ba Jeová iha tinan 1997.

 Se haʼu kontinua moris arbiru hanesan uluk, karik haʼu mate tiha ona. Maibé agora haʼu moris ho haksolok! Bensaun boot ida mak haʼu-nia feen Elvie. Ami kontente serbí hamutuk nuʼudar haklaken-naʼin tempu-tomak hodi hanorin Bíblia ba ema seluk, no neʼe halo haʼu sente haksolok tebes. Haʼu agradese tebes tanba Jeová dada haʼu atu aprende lia-loos.​—João 6:44.