Daiane mak Testemuña ba Jeová no haklaken-naʼin tempu tomak iha Brazíl. Loron ida, bainhira nia haklaken liuhusi telefone, nia koʼalia ho kaben-naʼin ida neʼebé hatudu interese. Sira hatete ba Daiane katak sira sei muda ba aldeia izoladu ida neʼebé la iha eletrisidade no internét. Tuir loloos, la iha Testemuña ida mak hela iha fatin neʼebá. Kaben-naʼin neʼe fó númeru husi telefone públiku iha aldeia neʼe ba Daiane atu sira bele kontinua halo diskusaun kona-ba Bíblia, no sira halo planu kona-ba loron no oras atu bele koʼalia ba malu.

 Entaun tuir tempu neʼebé sira deside ona, Daiane kontaktu ba telefone públiku no kaben-naʼin neʼe simu! Semana rua tuirmai, sira halo tan diskusaun dala tolu liuhusi telefone.

 Maibé depois neʼe, sira la foti telefone bainhira Daiane kontaktu. Maski nuneʼe nia kontinua bolu ba telefone públiku semana ida dala tolu, no nia haklaken ba ema naran deʼit neʼebé simu telefone. Rezultadu mak Daiane komesa halaʼo estuda Bíblia ho ema balu iha aldeia neʼe.

 Loron ida, bainhira Daiane no ninia laʼen halaʼo estuda Bíblia ho mane joven ida liuhusi telefone públiku, igreja nia ulun-naʼin iha aldeia neʼe rona kois sira-nia diskusaun. Nia hamriik iha estudante neʼe nia sorin atu rona didiʼak ba konversa neʼe. Depois neʼe, igreja nia ulun-naʼin husu atu koʼalia ho Daiane no ninia laʼen. Nia kontente ho buat neʼebé nia rona no nia mós hakarak estuda Bíblia!

 Ikusmai, Daiane no ninia laʼen halaʼo estudu Bíblia neen liuhusi telefone iha aldeia neʼe, inklui igreja nia ulun-naʼin. Estudante balu tuir ona reuniaun liuhusi telefone públiku neʼe. Sira ida halo banku atu estudante sira bele tuur durante estuda.

 Daiane no ninia laʼen agradese tebes tanba hetan oportunidade atu fahe liafuan diʼak kona-ba Maromak nia Ukun iha aldeia izoladu neʼe. Daiane hatete: “Jeová bele arranju atu ema hotu bele rona liafuan diʼak maski sira hela iha fatin izoladu.”