Marta mak Testemuña ba Jeová ida husi rai-Guatemala. Nia aprende hela atu koʼalia lian Kekchi, atu nuneʼe nia bele fó sai Bíblia nia mensajen ba sira neʼebé koʼalia língua neʼe. Loron ida, nia haree mane ida laʼo sai husi ospitál. Husi mane neʼe nia jeitu, Marta hanoin katak karik nia mak ema husi knua ida iha foho neʼebé koʼalia lian Kekchi, no Testemuña ba Jeová ladún haklaken iha neʼebá. Entaun, Marta hakbesik ba nia no koko dada lia ho nia, maski Marta koʼalia Kekchi la moos.

 Marta husu se nia hakarak estuda Bíblia. Mane neʼe kontente atu estuda maibé nia dehan ba Marta katak nia la iha osan atu selu hodi bele aprende Bíblia. Marta esplika katak Testemuña ba Jeová halaʼo estuda Bíblia ho ema gratuitu. Marta mós dehan se hakarak, bele estuda liuhusi telefone no família tomak mós bele tuir estuda neʼe. Entaun mane neʼe hakarak estuda. Tanba mane neʼe hatene koʼalia no lee iha lian Españól, Marta fó ba nia Bíblia Sagrada Tradusaun Mundu Foun iha lian Españól. Nia mós simu livru Tuir Loloos, Saida mak Bíblia Hanorin iha lian Kekchi. Semana tuirmai, mane neʼe ho ninia feen, hamutuk ho sira-nia oan naʼin-rua komesa estuda Bíblia ho Marta liuhusi telefone. Sira estuda semana ida dala rua. Marta dehan: “Tanba haʼu koʼalia lian Kekchi la moos, entaun ami estuda iha lian Españól. Depois mane neʼe tradús fali informasaun neʼe ba ninia feen. Maibé oan naʼin-rua hatene koʼalia lian Españól.”

 Mane neʼe mak pastór ida iha ninia igreja. No nia komesa hanorin ninia ema iha igreja buat neʼebé nia aprende husi estuda Bíblia. Tanba sira gosta informasaun neʼebé sira rona, sira hakarak hatene nia aprende hanorin foun sira-neʼe husi neʼebé. Bainhira nia dehan katak nia estuda Bíblia, sira ida-idak mós komesa asiste. Lakleur, maizumenus ema naʼin-15 halibur semana-semana atu estuda Bíblia ho Marta liuhusi telefone. Atu halo fasil ba ema hotu atu rona, sira tau mikrofone besik telefone.

 Bainhira Marta hatete ba katuas kongregasaun sira kona-ba ninia estudante Bíblia, katuas ida ba vizita sira iha knua neʼe. Katuas neʼe konvida estudante sira atu rona diskursu públiku neʼebé katuas área a sei hatoʼo iha knua ida. Presiza oras tolu atu toʼo knua neʼe. Saʼe karreta ba oras ida depois tun no laʼo ain ba oras rua tan. Estudante sira-neʼe hakarak bá no ema na’in-17 mak asiste reuniaun neʼe.

 Semana balu tuirmai, katuas área ho irmaun-irmán sira seluk ba vizita estudante sira-neʼe durante loron haat. Iha dadeer, sira haree vídeo sira kona-ba Bíblia iha lian Kekchi neʼebé fó sai iha sítiu jw.org, no depois neʼe sira estuda hamutuk broxura Sé mak Halo Jeová nia Hakarak Ohin Loron? No iha lokraik, sira haree programa balu husi JW Broadcasting. Katuas área halo arranju atu nuneʼe estudante Bíblia ida-idak bele estuda ho mestre Bíblia neʼebé la hanesan.

 Durante loron haat neʼe nia laran, Testemuña sira mós haklaken iha knua sira seluk neʼebé koʼalia lian Kekchi no konvida ema atu asiste reuniaun espesiál ida. Ema naʼin-47 tuir reuniaun neʼe no irmaun sira konvida sira atu estuda Bíblia. Família 11 mak simu konvite atu estuda.

 Fulan balu liutiha, katuas sira arranja atu halaʼo reuniaun kada findesemana iha knua primeiru. Toʼo agora, maizumenus ema naʼin-40 mak tuir reuniaun semana-semana. No bainhira irmaun-irmán selebra Memoriál kona-ba Jesus nia mate, sira kontente tebes tanba ema naʼin-91 mak asiste.

 Bainhira Marta hanoin fila fali kona-ba situasaun hotu neʼebé akontese iha esperiénsia neʼe, nia hatete: “Haʼu agradese tebes ba Jeová. Dala ruma, haʼu sente katak haʼu labele halo buat barak. Maibé tuir loloos, Maromak bele uza ita atu ajuda ema seluk. Nia hatene saida mak iha ema sira-neʼe nia laran, no nia mak dada sira atu hamutuk ho ninia povu. Jeová hadomi sira hotu.”