Feto ida naran Danielle mak Testemuña ba Jeová ida neʼebé hela iha rai-Áfrika Súl. Loron ida, nia hetan pasta ida neʼebé ema haluha hela iha restaurante laran. Iha pasta laran, iha karteira ida ho osan no kartaun kréditu sira. Tanba Danielle hakarak tebes atu fó fali pasta neʼe ba ninia naʼin, nia buka ema neʼe nia enderesu ka númeru telefone, maibé nia hetan deʼit mane neʼe nia naran. Danielle koko atu kontaktu mane neʼe liuhusi ninia banku maibé la susesu. Maski nuneʼe, Danielle la rende an. Nia hetan resibu ida husi doutór iha pasta neʼe nia laran no nia kontaktu klínika neʼe. Resepsionista neʼebé simu telefone neʼe konkorda atu fó Danielle nia númeru kontaktu ba pasta naʼin.

 Mane neʼe hakfodak bainhira simu telefone husi ninia doutór nia resepsionista, neʼebé fó-hatene nia katak Danielle hetan no hakarak fó fali ninia pasta neʼebé lakon. Bainhira mane neʼe bá atu foti ninia pasta, nia hasoru Danielle no Danielle nia apá. Sira uza oportunidade neʼe atu esplika katak nuʼudar Testemuña ba Jeová, sira hakaʼas an atu moris tuir Bíblia nia prinsípiu sira. Tan neʼe, sira sempre hakaʼas an atu hatudu hahalok laran-moos.—Ebreu 13:18.

 Liutiha oras balu, mane neʼe haruka mensajen ba Danielle ho ninia apá atu hatoʼo obrigada dala ida tan tanba entrega fali ninia pasta no karteira. Ninia mensajen hanesan neʼe: “Haʼu hafolin tebes imi-nia hakaʼas an atu buka haʼu. Haʼu kontente tebes atu hasoru Ita no Ita-nia família no sei hanoin-hetan imi-nia laran-diʼak. Haʼu hatene katak Ita halo sakrifísiu hodi bele serbí Maromak. Tan neʼe, atu hatudu haʼu-nia agradese, haʼu hakarak fó kontribuisaun ba imi. Danielle nia laran-moos no integridade hatudu ho klaru katak imi mak ema neʼebé diʼak. Dala ida tan obrigadu, no hein katak Maromak sei haraik bensaun ba imi-nia serbisu.”

 Fulan balu liutiha, mane neʼe kontaktu fali Danielle nia apá no konta kona-ba saida mak foin akontese ba nia. Bainhira kompras hela, nia haree karteira kiʼik ida iha rai. Bainhira nia entrega fali karteira kiʼik neʼe ba ninia naʼin, mane neʼe esplika tanbasá mak nia halo ida-neʼe. Mane neʼe fó-hatene feto neʼe katak nia halo ida-neʼe tanba foin lalais ema seluk mós hatudu hahalok laran-moos hodi fó fali ninia karteira neʼebé lakon. Mane neʼe hatete: “Hatudu laran-moos no laran-diʼak iha buat kiʼik, bele book ema seluk atu halo buat neʼebé hanesan. Halo ema hotu nia moris sai diʼak liu iha komunidade nia laran.”