Feto ida naran Yanmei mak Testemuña ida iha Ázia neʼebé fó ajuda ba feto defisiente matan naran Mingjie atu hakat ba dalan sorin. a Mingjie fó agradese hodi dehan: “Obrigada. Maromak sei fó bensaun ba Ita!” Depois neʼe, irmán Yanmei husu ba Mingjie se sira bele hasoru malu fali atu halo diskusaun kona-ba Bíblia. Mingjie hatete katak nia halo orasaun loroloron atu bele hetan adorasaun neʼebé loos ba Maromak. Tanbasá nia halo orasaun hanesan neʼe?

 Mingjie dehan katak iha tinan 2008, nia hetan konvite husi nia kolega defisiente matan atu asiste misa iha igreja ba ema defisiente. Depois misa, Mingjie husu ba pastór kona-ba iha neʼebé mak pastór hetan liafuan sira neʼebé ohin nia hatoʼo. Pastór dehan husi Maromak nia Liafuan Bíblia. Neʼe book tebes Mingjie atu lee Bíblia. Tan neʼe, nia hetan Bíblia braile iha lian Xinés. Bíblia neʼe iha volume hamutuk 32 no nia lee tomak maizumenus iha fulan neen deʼit. Bainhira Mingjie kontinua lee Bíblia, nia rekoñese katak doutrina Trindade neʼebé ninia igreja hanorin mak falsu no nia aprende katak Maromak nia naran mak Jeová.

 Ikusmai, Mingjie mós sai laran-kraik tebes ho membru igreja sira-nia hahalok. Nia rekoñese katak sira la moris tuir Bíblia nia hanorin. Porezemplu, sira fó hahán restu ba ema defisiente matan, maibé fó hahán fresku ba ema neʼebé matan diʼak no bele haree. Hahalok la justisa neʼe hakanek tebes Mingjie nia laran. Entaun nia komesa buka igreja seluk iha ninia área. Tan neʼe mak nia halo orasaun atu bele hetan adorasaun neʼebé loos.

 Tanba irmán Yanmei nia hahalok diʼak, Mingjie konkorda atu estuda Bíblia ho nia. Lakleur Mingjie mós komesa atu tuir reuniaun husi Testemuña ba Jeová. Mingjie hatete: “Haʼu sei nunka haluha dala primeiru neʼebé haʼu asiste reuniaun. Irmaun-irmán sira simu haʼu ho domin. Neʼe kona tebes haʼu-nia laran. Maski haʼu defisiente matan, maibé haʼu bele sente domin neʼebé la todan ba sorin.”

 Mingjie laʼo ba oin lalais no komesa tuir reuniaun beibeik. Nia mós gosta tebes knananuk sira ba reuniaun, maibé susar ba nia tanba seidauk iha livru knananuk iha letra braile iha ninia língua. Tanba hetan ajuda husi kongregasaun, Mingjie bele halo ninia livru knananuk rasik. Nia tradús knananuk hamutuk 151 iha oras 22 deʼit. Iha fulan-Abríl 2018, Mingjie komesa haklaken ba ema seluk. Fulan-fulan nia uza oras 30 atu haklaken.

 Bainhira Mingjie hakarak atu hetan batizmu, irmán Yanmei grava tiha pergunta no eskritura sira iha livru Organizasaun neʼebé Halo Jeová nia Hakarak hodi nuneʼe Mingjie bele rona. Mingjie hetan batizmu iha fulan-Jullu 2018. Nia dehan: “Domin neʼebé irmaun-irmán sira hatudu ba haʼu iha reuniaun boot motiva tebes haʼu. Haʼu kontente tebes no haʼu komesa tanis tanba haʼu sai ona parte ba adorasaun neʼebé loos ba Maromak.” (João 13:34, 35) Agora Mingjie hakaʼas an atu hatudu fali domin ba ema seluk hodi uza ninia tempu tomak atu haklaken ba ema seluk.