Iha tinan 2010, Ed ho ninia feen Jennie foin primeiravés koko haklaken liuhusi telefone. a Jennie dehan: “Iha tempu neʼebá, haʼu la gosta liu haklaken liuhusi telefone, tan neʼe haʼu hatete ba haʼu-nia laʼen: ‘Haʼu sei nunka halo fali ida-neʼe!’” Ed mós sente hanesan. Nia dehan: “Haʼu la gosta kuandu ema telefone haʼu atu faʼan buat ruma, tan neʼe haʼu mós sente la diʼak atu haklaken ba ema seluk liuhusi telefone.”

 Ikusmai pandemia COVID-19 hahú, no Testemuña ba Jeová para haklaken husi uma ba uma. Maibé sira kontinua halo tuir Jesus nia mandamentu atu haklaken liafuan diʼak liuhusi hakerek karta no telefone. (Mateus 24:14; 28:19, 20) Iha tempu hanesan, sira halaʼo reuniaun Kristaun no grupu haklaken liuhusi vídeo konferénsia. Loron ida, bainhira Ed tuir grupu haklaken, nia hakaʼas an atu sai aten-brani hodi haklaken fali liuhusi telefone. Saida mak nia sente bainhira nia atu telefone ema primeiru? Nia hatete: “Haʼu sente nakdedar tebes toʼo tenke halo orasaun atu husu ajuda. Tuirmai, haʼu telefone. No ema neʼebé hatán mak Tyrone.” b

 Tyrone no ninia feen Edith hela iha área rurál iha Kentucky, Estadus Unidus Amérika. Tyrone mak tinan 83 no ninia matan malahuk ona. Maski nuneʼe, nia simu bainhira Ed oferese atu estuda Bíblia. Nia uza lupa atu lee publikasaun sira no komesa estuda Bíblia beibeik ho Ed liuhusi telefone.

 Maizumenus fulan ida liu tiha, Tyrone no Edith komesa tuir reuniaun husi Testemuña ba Jeová. Maibé sira liga deʼit ho telefone tanba la iha internét. Saida mak halo Edith interese ba lia-loos?

 Bainhira Ed no Jennie estuda ho Tyrone, sira bele rona Edith nia lian kiʼik neʼebé ajuda Tyrone atu fó resposta no buka eskritura sira iha Bíblia. Maibé Edith rasik la interese atu estuda Bíblia. Jennie konta: “Bainhira ami rona Edith nia lian, ami nota Edith sente triste tebes kona-ba buat ruma, maibé ami la hatene tanbasá.”

 Loron ida, Jennie sente nia tenke koʼalia ho Edith. Tan neʼe, nia buka tempu neʼebé loos, no husu ba Ed atu husik nia mak koʼalia ho Tyrone. Edith hatete: “Tyrone, haʼu bele rona Ita-nia ferik-oan nia lian iha kotuk, no haʼu hakarak husu nia atu lee eskritura ida ka fó sai ninia komentáriu.”

 Edith nonook tiha ba tempu balu, no ikusmai hatete ho lian kalma: “Kleur ona haʼu hakarak atu koʼalia ho imi.” Tuirmai nia dehan: “Haʼu mós Testemuña ba Jeová ida. Haʼu la ativu ba tinan 40 ona.”

 Jennie hakfodak. Nia dehan: “Ita mak haʼu-nia irmán!” Sira rua komesa tanis.

 Lakleur depois neʼe, Ed fó broxura Kembalilah kepada Yehuwa ba Edith. Liutiha semana balu, Ed no Jennie nota duni katak Edith nia hahalok troka. Ed konta: “Foufoun, ami rona Edith nia lian sempre triste, maibé agora ninia lian hatudu katak nia kontente.” Edith hametin fali ninia relasaun ho Jeová no agora serbí fali nuʼudar haklaken-naʼin neʼebé fahe liafuan diʼak ba ema seluk ho kontente. Ninia laʼen Tyrone hetan batizmu nuʼudar Testemuña ba Jeová iha Jullu 2022.

 Kuandu Ed hanoin fali tempu uluk bainhira nia iha hanoin negativu kona-ba haklaken liuhusi telefone, nia mós hanoin-hetan tempu neʼebé nia konversa ho Tyrone. Ed lee João 6:44 ba Tyrone no esplika katak Jeová mak dada ema ba lia-loos, tuirmai Tyrone konkorda no hatete: “Durante neʼe, haʼu hein hela imi atu telefone ami.” Jennie mós kontente tanba nia ho ninia laʼen hakaʼas an atu sai aten-brani hodi haklaken liuhusi telefone. Nia hatete: “Bainhira ita koko atu halo buat ruma ba Jeová maski neʼe susar, nia sei haraik bensaun ba ita.”