Irma idade besik 90 ona no hela iha rai-Alemaña. Nia hetan asidente boot rua no operasaun balu, tan neʼe nia labele ona haklaken uma ba uma. Agora Irma koʼalia ba ema seluk kona-ba ninia fiar liuhusi karta neʼebé nia hakerek no haruka ba ninia família no kolega seluk. Irma hakerek karta ba ema atu fó laran-manas no mós fó kmaan ba ema neʼebé lakon kolega ka família tanba mate. Karta neʼe halo ema kontente tebes no dala barak sira telefone no husu bainhira mak Irma sei haruka tan karta. Nia mós simu karta barak husi ema neʼebé hakarak hatudu agradese ba ninia ajuda. Irma dehan, “Ida-neʼe halo haʼu kontente tebes no ajuda haʼu atu kontinua haklaken nafatin.”

 Irma mós haruka karta ba ferik-katuas sira. Nia dehan: “Ferik ida telefone haʼu no dehan katak karta neʼebé nia simu husi haʼu halo nia sente kmaan tebes no nia hafolin ida-neʼe tanba ninia katuas-oan foin mate. Nia rai didiʼak haʼu-nia karta no dala ruma lee iha kalan. Ferik seluk neʼebé ninia laʼen mós mate, dehan katak haʼu-nia karta ajuda nia barak liu fali ninia padre nia diskursu. Ferik neʼe husu pergunta barak no mós hakarak vizita haʼu.”

 Irma nia kolega ferik ida neʼebé laʼós Testemuña ba Jeová muda ba fatin dook, no husu Irma atu haruka karta ba nia. Irma dehan, “Feto neʼe rai didiʼak karta hotu neʼebé haʼu haruka ba nia. Lakleur, feto neʼe mate, no ninia oan-feto telefone haʼu. Nia fó-hatene haʼu katak nia lee karta hotu neʼebé uluk haʼu haruka ba ninia inan no nia husu se haʼu mós bele haruka karta kona-ba Bíblia ba nia.”

 Irma kontente tebetebes ho ninia haklaken. “Haʼu harohan ba Jeová atu kontinua ajuda haʼu ho kbiit hodi serbí nia,” nia hatete. “Maski haʼu labele ona haklaken uma ba uma, maibé haʼu halo buat neʼebé haʼu bele atu serbí Jeová.”