Artur, katuas área iha rai-Arménia, vizita hela kongregasaun ida. Nia rona katak sira seidauk hola parte iha haklaken públiku, neʼebé inklui uza karrosa neʼebé tau ita-nia publikasaun sira. Atu anima sira kona-ba neʼe, Artur no ninia feen, Anna, hamutuk ho irmaun seluk naran Jirayr, komesa haklaken ho karrosa iha sidade kiʼik ida. Sira hili fatin neʼebé ema barak laʼo bá-mai.

 Ema komesa kedas hatudu interese no foti publikasaun sira. Maibé lakleur, haklaken iha dalan foun neʼe dada kontradór sira-nia atensaun. Amlulik naʼin-rua hakbesik karrosa, no derrepente deʼit, amlulik ida tebe karrosa no karrosa monu. Depois nia basa Artur nia hasan, no Artur nia ókulu monu ba rai. Artur, Anna, no Jirayr koko atu halo kalma amlulik sira, maibé la susesu. Amlulik naʼin-rua neʼe sama karrosa no publikasaun sira namkari hotu. Sira tolok no ameasa Testemuña sira no depois sira bá.

 Artur, Anna, no Jirayr ba postu-polísia atu hatoʼo keixa. Sira esplika buat neʼebé akontese no koʼalia uitoan kona-ba Bíblia ba polísia balu no serbisu-naʼin seluk. Depois neʼe, polísia lori Testemuña naʼin-tolu neʼe ba sira-nia xefe. Foufoun, nia hakarak hatene deʼit kona-ba buat neʼebé akontese. Maibé kuandu nia rona katak Artur, neʼebé isin boot, la baku fali amlulik neʼebé basa nia, xefe la husu tan pergunta kona-ba kazu no komesa husu kona-ba Testemuña sira-nia fiar. Ikusmai sira koʼalia hamutuk ba oras haat! Xefe kontente loos ho buat neʼebé nia rona no dehan: “Relijiaun neʼe kapás loos! Haʼu gosta!”

 Loron tuirmai, kuandu Artur haklaken fali iha fatin públiku, mane ida neʼebé haree buat neʼebé akontese horiseik, mai koʼalia ho nia. Mane neʼe gaba Artur tanba nia kalma nafatin no la selu aat fali ba amlulik. Nia mós dehan katak buat neʼebé nia haree, halo nia lakon respeitu ba amlulik sira.

 No iha kalan, xefe ba polísia husu Artur atu mai fali postu-polísia. Maibé nia la husu kona-ba kazu neʼe, nia hakarak husu pergunta barak liután kona-ba Bíblia. Iha polísia naʼin-rua seluk mós koʼalia hamutuk ho sira.

 Loron tuirmai, Artur vizita fali xefe ba polísia hodi bele hatudu vídeo balu kona-ba Bíblia. Xefe bolu tan polísia sira seluk atu mai no haree.

 Uluk, polisia barak la hatene kona-ba Testemuña ba Jeová. Maibé tanba amlulik nia hahalok aat, polísia barak hetan oportunidade atu rona kona-ba lia-loos ba dala primeiru. Ida-neʼe halo sira iha hanoin neʼebé diʼak kona-ba Testemuña ba Jeová.