Rachel neʼebé agora hela iha rai-Repúblika Dominikana hatete: “Haʼu moris iha família neʼebé serbí Jeová. Maibé triste katak bainhira haʼu tinan hitu, haʼu-nia aman para atu ransu ho Testemuña ba Jeová no komesa uza violénsia hodi kontra fali lia-loos. Nia halo susar tebes ba haʼu atu adora Jeová. Porezemplu, nia oferese buat oioin ba haʼu atu haʼu la serbí tan Jeová, hanesan telefone, pasiar ba fatin neʼebé diʼak, no kartaun kréditu. Dala ruma nia mós tuku haʼu tanba nia hanoin katak se haʼu labele koʼalia ka labele laʼo, haʼu mós labele tuir reuniaun sira. Maibé neʼe nunka hanetik haʼu. Haʼu sempre hakaʼas an atu tuir reuniaun sira.

 “Haʼu-nia aman nunka baku haʼu iha amá nia oin. Nia dehan nia sei baku amá se haʼu fó-hatene amá kona-ba ida-neʼe. Atu esplika tanbasá dala ruma haʼu-nia isin metan no bubu, haʼu-nia aman dehan neʼe tanba arte marsiais neʼebé nia haruka haʼu atu tuir.

 “Tanba haʼu sei labarik hela no taʼuk haʼu-nia aman, haʼu la fó-hatene ba amá buat neʼebé akontese. Entaun haʼu koʼalia ba Jeová. Haʼu gosta laʼo kleur iha ai-laran neʼebé besik ami-nia uma iha Maryland, Estadus Unidus. Iha neʼebá, iha ai-hun boot furak ida neʼebé haʼu sempre saʼe, no husi sanak leten haʼu halo orasaun ba Jeová. Haʼu koʼalia nakloke kona-ba haʼu-nia sentimentu sira no saida mak haʼu sei halo ba nia kuandu haʼu sai boot, se karik Jeová ajuda haʼu atu moris toʼo neʼebá. Haʼu mós koʼalia ba nia saida mak haʼu sei halo iha mundu foun, família hanesan saida mak haʼu sei hetan, no dame ho haksolok neʼebé haʼu sei sente tanba la iha tan buat ruma neʼebé halo haʼu taʼuk no laran-susar.

 “Bainhira haʼu-nia aman koko hapara haʼu atu serbí Jeová liuhusi violénsia ka oferese buat ruma, haʼu sempre sente Jeová mak hametin no fó kmaan mai haʼu. Maromak ajuda haʼu atu kontinua laran-metin no brani.

 “Haʼu hetan batizmu bainhira haʼu tinan sanulu, no liutiha tinan rua haʼu foti pioneiru. Foufoun haʼu-nia aman la hatene kona-ba neʼe, maibé kuandu nia hatene, nia tuku haʼu-nia hasan no haʼu-nia hasan-ruin naklosu.

 “Ema balu dehan katak haʼu kiʼik liu atu foti pioneiru, no sira hanoin haʼu la komprende katak desizaun neʼe mak sériu. Loloos, haʼu haree duni joven Testemuña barak iha haʼu-nia área ladún fokus atu serbí Jeová. Sira gasta tempu barak atu tuir festa no buka haksolok deʼit. Buat neʼebé sira halo haree jeitu duni no dala ruma haʼu hakarak tuir sira. Haʼu hanoin, ‘Karik haʼu bele para haklaken no goza tempu hanesan joven sira seluk.’ Maibé bainhira haʼu sente hanesan neʼe, haʼu halo orasaun ba Jeová kona-ba ida-neʼe.

 “Bainhira haʼu maizumenus tinan 15, ema husi ajénsia model nian neʼebé famozu oferese atu haʼu serbisu ho sira iha Milaun, rai-Itália no manán osan boot. Haʼu sente kontente tanba ema hanoin katak haʼu bele sai model, tau haʼu-nia foto iha revista, hatais roupa karun no laʼo iha ema barak nia oin. Iha tempu neʼebá, haʼu serbí nuʼudar pioneiru regulár besik tinan tolu ona, no haʼu hanoin, ‘Serbisu neʼe bele ajuda haʼu atu kontinua pioneiru ba tinan barak.’ Haʼu-nia aman mós husik ona ami, entaun haʼu hanoin katak haʼu bele uza osan neʼe atu ajuda mós haʼu-nia amá.

 “Haʼu halo orasaun kona-ba neʼe no koʼalia ho haʼu-nia amá, neʼebé serbí nuʼudar pioneiru ba tinan barak ona. Haʼu mós koʼalia ho katuas kongregasaun ida neʼebé haʼu hadomi no respeitu. Hanesan baibain, haʼu saʼe ba ai-hun leten hodi halo orasaun liután. Jeová hatán haʼu-nia orasaun liuhusi eskritura ida neʼebé katuas neʼe hatudu mai haʼu. Neʼe mak Eclesiastes 5:4 neʼebé dehan: ‘Kuandu ó jura ba Maromak, ó tenke kumpre ida-neʼe.’ Haʼu jura ona atu serbí Jeová ho moris tomak, no haʼu taʼuk katak serbisu neʼe bele estraga haʼu-nia relasaun ho Jeová. Entaun haʼu deside atu la simu serbisu neʼe.

 “Maski haʼu-nia moris nuʼudar labarik susar tebes, maibé haʼu la mate. Agora haʼu moris kontente ho haʼu-nia laʼen Jaser, no ami-nia oan-mane Connor neʼebé tinan sia. Jaser mak katuas kongregasaun, no Connor mak haklaken-naʼin neʼebé seidauk hetan batizmu. Haʼu serbí nuʼudar pioneiru besik tinan 27 ona.

 “Haʼu sempre hanoin kona-ba tempu neʼebé haʼu koʼalia ba Jeová iha ai-sanak leten iha ai-laran. Haʼu husu makaʼas ba Jeová atu ajuda haʼu no nia ajuda duni iha dalan neʼebé furak. Jeová hametin, fó kmaan, no dirije haʼu. Durante haʼu-nia moris, haʼu haree ho klaru katak Jeová mak Aman neʼebé diʼak tebetebes. Haʼu kontente tanba haʼu hili ona atu serbí nia ho haʼu-nia laran tomak. Neʼe mak desizaun matenek liu neʼebé haʼu halo.”