Madián no Marcela goza sira-nia moris iha sidade Medellín, rai-Kolómbia. Madián manán saláriu boot, tan neʼe sira bele hela iha apartamentu neʼebé kapás. Maibé, iha buat ida neʼebé book sira atu hanoin fali kona-ba saida mak importante liu ba sira nuʼudar Testemuña ba Jeová. Sira dehan: “Iha tinan 2006, ami tuir asembleia ida ho tema ‘Mantein Ita-nia matan simples’. Iha diskursu barak iha asembleia neʼe neʼebé temi kona-ba importante atu halo ita-nia moris simples hodi bele serbí Maromak liután.” Sira hatutan: “Kuandu fila ba uma, ami rekoñese katak durante neʼe ami la halo nuneʼe. Ami gosta atu kompras buat oioin, no rezultadu mak ami iha debe barak.”

 Ikusmai Madián no Marcela komesa halaʼo moris neʼebé simples. Sira hatete: “Ami komesa hamenus ami-nia gastu. Ami muda ba apartamentu neʼebé kiʼik liu, faʼan ami-nia karreta, no sosa fali motór.” Liután neʼe, sira mós la bá tan loja neʼebé boot no neʼe ajuda sira atu la uza osan barak ba kompras. Sira uza tempu barak liu atu haklaken ba ema seluk. Sira mós ransu ho belun sira neʼebé serbí Jeová nuʼudar pioneiru espesiál a ho laran-manas.

 Lakleur deʼit, Madián no Marcela deside atu muda ba kongregasaun iha área rurál neʼebé presiza liután ajuda. Atu bele muda ba área neʼe, Madián rezigna an husi ninia serbisu. Ninia patraun hanoin katak nia bulak ona. Tan neʼe Madián husu ba ninia patraun: “Patraun manán saláriu boot, maibé patraun sente kontente ka lae?” Ninia patraun dehan katak nia la kontente tanba iha problema barak neʼebé nia rasik labele rezolve. Madián hatete ba ninia patraun: “Buat neʼebé importante liu iha moris neʼe laʼós kona-ba osan hira mak ita iha, maibé kona-ba buka-hatene saida mak ita presiza atu bele sente kontente. Haʼu no haʼu-nia feen sente duni kontente kuandu ami hanorin ema seluk kona-ba Maromak. Tan neʼe, ami hakarak uza tempu barak liután atu halo serbisu neʼebé bele halo ami sente kontente duni.”

 Madián no Marcela sente kontente duni tanba tau uluk Maromak iha sira-nia moris. Durante tinan 13, sira serbí iha área neʼebé presiza liután haklaken-naʼin iha rai-Kolómbia nia parte norueste. No agora sira iha priviléjiu atu serbí nuʼudar pioneiru espesiál.