Irmán Clodean mak Testemuña ba Jeová ida neʼebé hela iha Áfrika Súl, no nia baixa iha ospitál atu hetan operasaun boot. Nia iha moras oioin no presiza foti desizaun susar atu hili tratamentu. Antes no depois ninia operasaun, nia sente la iha forsa, moras, no estrese. Ikusmai nia fila ba uma, maibé fulan rua liu ona mós susar ba nia atu bele tuur. No tanba pandemia COVID-19, nia labele simu bainaka.

 Clodean foti desizaun atu la sente kasian ba nia an rasik, no husu Maromak atu fó forsa ba nia hodi bele fó kmaan ba ema seluk. Kuandu nia bele tuur ona, nia kontaktu kedas ninia viziñu nia alin-feto neʼebé uluk estuda Bíblia ho Testemuña. Clodean fahe pontu diʼak husi Maromak nia Liafuan neʼebé anima nia, no neʼe book feto neʼe atu komesa fali estuda Bíblia. Clodean mós esplika kona-ba benefísiu oioin husi reuniaun sira, no ajuda feto neʼe atu uza konferénsia vídeo hodi bele tuir reuniaun. Feto neʼe asiste reuniaun no mós fó komentáriu ida iha parte pergunta no resposta durante reuniaun.

 Tuirmai Clodean koʼalia ho estudante neʼe nia alin-feto neʼebé mós gosta estuda Bíblia. Alin-feto neʼe fó-hatene ba Clodean kona-ba ema seluk neʼebé karik iha interese ba Bíblia. Rezultadu mak saida? Clodean hahú estuda Bíblia ho feto naʼin-haat tan. Maibé ninia esperiénsia laʼós neʼe deʼit!

 Tanba Clodean hatudu interese duni ba ema seluk, nia konsege komesa estuda Bíblia ho feto naʼin-sanulu tan, neʼe hotu akontese durante pandemia. Entaun sura hamutuk nia estuda ho ema naʼin-16! Sira balu tuir reuniaun beibeik liuhusi konferénsia vídeo. Clodean halo ninia an okupadu ho atividade hanesan neʼe, no neʼe ajuda nia atu la hanoin demais kona-ba ninia situasaun. Nia mós sente katak Jeová mak “Maromak neʼebé fó kmaan” ba nia iha tempu susar, tan neʼe nia mós bele fó kmaan ba ema seluk.—2 Korinto 1:3, 4.

 Sira neʼebé estuda Bíblia hamutuk ho Clodean sente oinsá kona-ba buat neʼebé sira aprende? Feto ida dehan: “Haʼu hetan benefísiu barak. Maibé benefísiu boot liu mak hatene Maromak nia naran. Neʼe ajuda haʼu atu hakbesik ba Jeová.” Feto neʼebé uluk Clodean kontaktu no komesa fali estuda, agora hein namanas atu hetan batizmu. Esperiénsia sira-neʼe halo Clodean kontente tebes. Agora, ninia moras mós sai diʼak ona.