Sin, ami Testemuña ba Jeová sempre fó ajuda ba ema neʼebé kona dezastre naturál. Ami hakaʼas an atu fó ajuda ba ami-nia maluk Testemuña no mós ba ema seluk neʼebé laʼós Testemuña ba Jeová tuir situasaun no buat neʼebé ami bele fó hodi halo tuir Bíblia nia liafuan iha Galásia 6:10, dehan: “Mai ita halo buat neʼebé diʼak ba ema hotu, maibé liuliu ba ita-nia maluk fiar-naʼin.” Baibain iha situasaun hanesan neʼe, ami mós hakaʼas an atu anima sira no ajuda sira atu hametin sira-nia fiar ba Maromak.—2 Korinto 1:3, 4.

 Depois dezastre mosu, katuas sira iha kongregasaun iha fatin neʼebé kona dezastre neʼe sei koko makaʼas atu kontaktu membru hotu iha kongregasaun atubele hatene ho loloos sira-nia kondisaun no buka-hatene se sira presiza ajuda ruma. Tuirmai katuas sira neʼe sei fó relatóriu ba Testemuña ba Jeová nia sukursál neʼebé tau matan ba fatin neʼe kona-ba situasaun neʼebé mosu daudaun no ajuda urjente saida deʼit mak sira fó ona.

 Se ikusmai ajuda sira neʼebé katuas sira fó ona la natoon ba kongregasaun sira neʼebé kona dezastre nia presiza, Testemuña ba Jeová nia Grupu Administradór sei arranju atu fó buat neʼebé kongregasaun sira-neʼe presiza. Ida-neʼe hanesan ho buat neʼebé ema kristaun iha apóstolu sira-nia tempu halo atu ajuda sira-nia maluk fiar-naʼin bainhira rai-hamlaha mosu. (1 Korinto 16:1-4) Testemuña ba Jeová nia sukursál sei haruka grupu katuas sira-nian ida atu organiza no dirije atividade atu fó ajuda ba sira neʼebé kona dezastre naturál. Testemuña ba Jeová sira husi rai seluk mós fó sira-nia tempu no osan atu ajuda.—Provérbios 17:17.

 Kontribuisaun voluntáriu husi maluk Testemuña sira neʼebé fó ona ba Testemuña ba Jeová nia sukursál sei uza ba buat barak, inklui mós atu fó ajuda ba maluk sira neʼebé kona dezastre naturál. (Apóstolu 11:27-30; 2 Korinto 8:13-15) No tanba maluk Testemuña ba Jeová sira neʼebé hola parte atu fó ajuda mak voluntáriu deʼit, tan neʼe osan hotu neʼe uza deʼit atu fó ajuda ba ema iha susar laran. Ami uza ho kuidadu tebes osan hotu neʼebé maluk sira fó nuʼudar kontribuisaun.—2 Korinto 8:20.