Testemuña ba Jeová nia kazamentu baibain hahú ho diskursu badak husi Bíblia no neʼe halaʼo iha dalan neʼebé simples no respeitu. Tuirmai, karik sei iha festa kazamentu. a Jesus mós partisipa iha festa kazamentu hanesan neʼe, neʼebé halaʼo iha sidade Kana kuandu nia foin hahú ninia serbisu haklaken.—João 2:1-11.

•  Oinsá mak Testemuña ba Jeová halaʼo serimónia ba kazamentu?

•  Iha neʼebé mak Testemuña ba Jeová halaʼo kazamentu sira?

•  Sé mak bele partisipa?

•  Oinsá ho ita-nia hatais bainhira ita partisipa?

•  Bainaka sira bele lori ho prezente ka lae?

•  Bainhira halaʼo festa kazamentu, bele ka lae hasaʼe kalis no brinda?

•  Ema sei kari foos ka konfetis ka lae?

•  Sei han-hemu ka lae?

•  Sei iha múzika no dansa ka lae?

•  Testemuña ba Jeová halaʼo aniversáriu ba kazamentu nian ka lae?

 Parte importante husi kazamentu mak diskursu, neʼebé sei hatoʼo durante maizumenus minutu 30 husi irmaun ida husi Testemuña ba Jeová. Diskursu neʼe kona-ba matadalan sira husi Bíblia neʼebé sei ajuda noivu no noiva atu iha moris kaben nian neʼebé iha domin, kontente no dura ba nafatin.—Éfeso 5:33.

 Iha rai barak, governu fó lisensa ba Testemuña ba Jeová atu halo legál kazamentu ida. Se hanesan neʼe, noivu no noiva sei halo juramentu iha diskursu nia rohan. Tuirmai, sira bele troka kadeli. No ida neʼebé hatoʼo diskursu sei hatete katak sira naʼin-rua sai ona feen no laʼen.

 Maibé iha rai balu fó lei katak mane no feto ida presiza halo legál sira-nia kazamentu iha rejistu sivíl. Depois neʼe mak iha tempu badak nia laran diskursu kazamentu nian sei halaʼo. Kuandu iha rejistu sivíl, se noivu no noiva neʼe la halo juramentu, sira bele halo ida-neʼe bainhira diskursu kazamentu nian besik remata. Se sira halo ona juramentu antes neʼe, sira bele hili atu repete fali iha diskursu nia rohan, hodi uza liafuan neʼebé hatudu katak sira halo tiha ona ida-neʼe. Tuirmai, diskursu kazamentu neʼe sei taka ho orasaun atu husu Maromak haraik bensaun ba noivu no noiva.

 Testemuña barak mak hili atu halaʼo sira-nia serimónia kazamentu nian iha sira-nia Reuniaun-Fatin, se Reuniaun-Fatin neʼe mak iha sira-nia área. b Maibé atu halo festa kazamentu sira sei uza fali fatin seluk.

 Se serimónia kazamentu halaʼo iha Reuniaun-Fatin, baibain ema naran deʼit bele tuir, maski ema neʼe mak Testemuña ba Jeová ka laʼós. Maibé kona-ba festa kazamentu, noivu no noiva mak sei deside atu konvida sé mak sei tuir.

 La iha lei kona-ba roupa neʼebé ita uza durante halaʼo serimónia kazamentu iha Reuniaun-Fatin. Maibé Testemuña ba Jeová sira hakaʼas an atu halo tuir konsellu husi Bíblia atu hatais ho respeitu. Sira mós sei kontente se bainaka sira halo tuir konsellu neʼe kona-ba hatais. (1 Timóteo 2:9) Klaru katak konsellu neʼe mós aplika bainhira halaʼo festa kazamentu.

 Bíblia anima ita atu hatudu laran-luak. (Salmo 37:21) Testemuña ba Jeová sira kontente atu fó no mós simu prezente kazamentu nian. (Lucas 6:38) Maibé, sira la husu prezente ruma ka fó avizu naran kona-ba sé mak fó prezente, tanba neʼe la tuir Bíblia nia hanorin no bele hamoe bainaka sira.—Mateus 6:3, 4; 2 Korinto 9:7; 1 Pedro 3:8.

 Labele. Testemuña ba Jeová la halo nuneʼe, tanba neʼe mai husi relijiaun falsu sira nia toman. c Testemuña ba Jeová hakarak noivu no noiva atu bele moris kontente, maibé sira la hasaʼe kalis no brinda atu fó sai sira-nia hakarak neʼe.

 Lae. Iha fatin balu, ema kari foos, konfetis (surat-tahan neʼebé tesi kiʼik-kiʼik) ka buat seluk ba noivu no noiva tanba sira fiar neʼe sei lori sorte diʼak, haksolok, no moris naruk. Maibé Testemuña ba Jeová la envolve an ho buat naran deʼit neʼebé iha ligasaun ho matan-dook nia atividade. No neʼe inklui husu sorte diʼak, tanba neʼe kontra Bíblia nia matadalan.—Isaias 65:11.

 Bainhira halaʼo serimónia iha Reuniaun-Fatin la iha han-hemu. Maibé baibain iha festa kazamentu nian mak prepara han-hemu. (Eclesiastes 9:7) Se noivu no noiva deside atu prepara mós ho tua balu, sira sei haree katak sira prepara ida-neʼe la barak liu, no tua sira-neʼe ba deʼit ema neʼebé tinan toʼo ona atu hemu.—Lucas 21:34; Roma 13:1, 13.

 Se noivu no noiva halaʼo festa kazamentu, sira bele deside kona-ba múzika no dansa. (Eclesiastes 3:4) Sira sei hili múzika depende ba sira-nia hakarak no kultura. Maibé sira mós sei kuidadu katak múzika no dansa sei la halo bainaka sira sente la diʼak. Kona-ba serimónia iha Reuniaun-Fatin, múzika neʼebé loke mak múzika neʼebé bazeia ba Bíblia.

 La iha informasaun iha Bíblia kona-ba selebra loron kazamentu nian. Tan neʼe, Testemuña ba Jeová neʼebé kaben ona bele deside rasik atu selebra sira-nia loron kazamentu nian ka lae. Ba sira neʼebé hakarak, sira bele selebra ida-neʼe nuʼudar feen-laʼen deʼit ka hamutuk ho kolega no família.