Lae, tanba adora Maromak mak desizaun neʼebé ema ida-idak presiza halo. (Roma 14:12) Testemuña ba Jeová hanorin sira-nia oan Bíblia nia matadalan, maibé kuandu sira-nia oan boot ona, oan ida-idak mak tenke foti desizaun rasik atu sai Testemuña ba Jeová ka lae.​—Roma 12:2; Galásia 6:5.

 Hanesan inan-aman hotu, Testemuña ba Jeová hakarak sira-nia oan atu iha moris neʼebé diʼak. Sira hanorin buat neʼebé sira hanoin sei lori benefísiu ba oan sira, hanesan matenek, morál no fiar. Testemuña ba Jeová fiar katak Bíblia nia matadalan ajuda ita iha moris neʼebé diʼak liu. Tan neʼe, Testemuña ba Jeová sei estuda Bíblia no tuir reuniaun Kristaun hamutuk ho sira-nia oan. (Deuteronómio 6:6, 7) Bainhira oan ida-idak sai boot ona, sira bele uza sira-nia matenek atu foti desizaun atu tuir inan-aman nia fiar ka lae.

•  Testemuña ba Jeová fó batizmu ba bebé sira ka lae?

•  Testemuña ba Jeová hadook an husi sira-nia oan neʼebé lakohi hetan batizmu ka lae?

•  Tanbasá mak Testemuña ba Jeová haklaken hamutuk ho sira-nia oan?

•  Testemuña ba Jeová selebra loron-boot sira ka lae?

•  Testemuña ba Jeová nia oan sente oinsá kona-ba dalan neʼebé sira-nia inan-aman haboot sira?

 Lae. Tuir Bíblia bebé sira labele hetan batizmu. Porezemplu, Bíblia hatudu katak antes hetan batizmu, ema Kristaun iha apóstolu sira-nia tempu rona mensajen, ‘simu liafuan ho laran’, no arrepende an. (Apóstolu 2:14, 22, 38, 41) Tan neʼe, se ema ida hakarak hetan batizmu, nia tenke boot ona hodi nia bele komprende Bíblia nia hanorin, fiar ida-neʼe, no foti desizaun atu moris tuir hanorin sira-neʼe. Bebé sira labele halo buat hirak-neʼe.

 Nuʼudar oan sira sai boot, sira bele foti desizaun atu hetan batizmu. Maibé, atu halo nuneʼe, sira presiza komprende katak ida-neʼe mak promete neʼebé sériu no importante tebes.

 Lae. Inan-aman neʼebé Testemuña sente triste se sira-nia oan la simu sira-nia fiar, maibé sira nafatin hadomi no la hakotu relasaun ho oan neʼe maski nia la sai Testemuña ba Jeová.

 Ami haklaken hamutuk ho ami-nia oan tanba razaun sira tuirmai neʼe. a

•   Bíblia haruka inan-aman atu hanorin sira-nia oan kona-ba Maromak no treinu sira atu adora nia. (Éfeso 6:4) Adorasaun inklui fó sai ita-nia fiar ba ema seluk, entaun haklaken mak parte importante kuandu hanorin oan kona-ba Maromak.​—Roma 10:9, 10; Ebreu 13:15.

•   Bíblia fó laran-manas ba joven sira atu “fó hahiʼi ba Jeová nia naran.” (Salmo 148:12, 13) Dalan importante atu hahiʼi Maromak mak koʼalia ba ema seluk kona-ba nia. b

•   Kuandu oan haklaken hamutuk ho sira-nia inan-aman, neʼe bele ajuda sira iha dalan oioin. Porezemplu, sira simu treinu kona-ba oinsá atu koʼalia ho ema oioin, no mós aprende atu hatudu hahalok laran-sadiʼa, laran-diʼak, respeitu, no la hanoin an deʼit. Haklaken mós ajuda labarik atu komprende liu kona-ba Bíblia neʼebé sei hametin sira-nia fiar.

 Testemuña ba Jeová la selebra loron-boot relijiaun nian ka loron-boot seluk neʼebé kontra Maromak nia hakarak. c (2 Korinto 6:14-17; Éfeso 5:10) Porezemplu, ami la selebra loron moris ka Natál, neʼebé la mai husi Bíblia.

 Maski nuneʼe, ami gosta ransu hamutuk ho família no fó prezente ba ami-nia oan. Ami la hein ba loron-boot ruma atu halo festa ka fó prezente, maibé ami halo iha loron naran deʼit.