Kona-ba ema neʼebé hetan ona batizmu nuʼudar Testemuña ba Jeová maibé la hola parte ona iha serbisu haklaken ka la tuir ona reuniaun sira no la ransu tan ho ami, ami sei la hadook an husi sira. Loloos, ami nafatin hakbesik ba sira nuʼudar ami-nia maluk no hakaʼas an anima fali sira atu hametin sira-nia fiar.

 Maski ema Testemuña ba Jeová ida halo sala boot ruma, neʼe la dehan katak ami sei hasai kedas nia husi kongregasaun. Maibé se nia lakohi troka ninia hahalok hodi halo tuir morál husi Bíblia, ka lakohi arrepende an, katuas Kristaun sira sei foti desizaun atu hasai nia husi kongregasaun. Bíblia hatete ho momoos: “Hasai tiha husi imi-nia leet ema neʼebé halo hahalok aat.”—1 Korinto 5:13.

 Oinsá se kongregasaun hasai ona mane ida maibé ninia feen no oan sira sei nafatin nuʼudar Testemuña? Maski mane neʼe ho ninia família nia relasaun nuʼudar maluk fiar-naʼin la iha ona, maibé sira-nia relasaun nuʼudar família sei iha nafatin. Tan neʼe, sira-nia moris nuʼudar feen-laʼen ka domin ba malu iha família laran sei kontinua hanesan uluk.

 Liután neʼe, ema neʼebé kongregasaun hasai ona mós bele tuir ami-nia reuniaun sira. Sira mós bele husu ba katuas Kristaun sira atu fó konsellu husi Bíblia. Ami-nia hakarak mak atu ajuda ema hanesan neʼe sai fali Testemuña ba Jeová. Se ema ida hasai ona husi kongregasaun maibé ikusmai husik ona hahalok sala no hakarak duni atu moris tuir Bíblia nia matadalan, ami sempre prontu atu simu fali ema neʼe nuʼudar Testemuña ba Jeová.