Ami uza osan kontribuisaun atu apoia atividade relijiaun nian no ajuda umanitária. Ami halo atividade sira-neʼe nuʼudar parte ba ami-nia knaar neʼebé importante liu, neʼe mak atu ajuda ema sai Jesus Kristu nia dixípulu.—Mateus 28:19, 20.

 Ami nunka uza osan kontribuisaun atu halo ema ida sai riku. Ami la selu katuas kongregasaun ida, no Testemuña ba Jeová la hetan saláriu bainhira sira haklaken husi uma ba uma. Sira neʼebé serbisu iha sukursál, ka iha sede-jerál, inklui sira neʼebé serbí nuʼudar Grupu Administradór, la simu saláriu tanba sira mak parte ba orden relijiozu.

•   Prodús: Tinan-tinan, ami tradús, print, haruka, no fahe Bíblia no publikasaun sira neʼebé bazeia ba Bíblia rihun ba rihun, buat hotu neʼe gratuitu deʼit. Ami-nia website jw.org no aplikasaun JW Library mós fó sai publikasaun dijitál ho gratuitu no la iha iklan.

•   Serbisu Konstrusaun no manutensaun: Ami harii no mantein ami-nia fatin adorasaun neʼebé simples iha rai oioin iha mundu tomak atu nuneʼe kongregasaun sira iha fatin neʼebé diʼak atu hasoru malu no hahiʼi Maromak Jeová. Ami mós halo nuneʼe ba ami-nia sukursál no eskritóriu tradusaun sira. Irmaun-irmán sira apoia serbisu sira-neʼe ho voluntáriu, neʼe ajuda hamenus ami-nia gastu.

•   Administrasaun: Ami mós uza kontribuisaun neʼebé ema fó atu apoia serbisu iha mundu tomak hodi sustenta atividade sira neʼebé halaʼo iha sede-jerál, sukursál no eskritóriu tradusaun, no mós atividade sira husi irmaun-irmán sira neʼebé vizita kongregasaun oioin.

•   Haklaken: Testemuña ba Jeová la simu osan bainhira halo serbisu haklaken ka hanorin ema kona-ba “Maromak nia liafuan”. (2 Korinto 2:17) Maibé, hanesan ho ema Kristaun balu iha apóstolu sira-nia tempu, ohin loron ami mós tau matan ba irmaun-irmán balu neʼebé hetan ona treinu no uza tempu barak atu haklaken, porezemplu sustenta sira-nia presiza báziku no fó hela-fatin neʼebé simples.—Filipe 4:16, 17; 1 Timóteo 5:17, 18.

•   Hanorin: Ami uza osan kontribuisaun atu selu gastu sira ba asembleia no reuniaun boot, no mós atu prodús áudio no vídeo neʼebé bazeia ba Bíblia. Ami mós halaʼo eskola oioin atu treinu katuas sira no haklaken-naʼin tempu tomak hodi sira bele halo sira-nia knaar ho diʼak liután.

•   Ajuda umanitária: Ami mós uza osan kontribuisaun atu fó hahán, bee no hela-fatin ba ema neʼebé kona dezastre ruma. Ami fó ajuda umanitária laʼós ba ami-nia “maluk fiar-naʼin deʼit”, maibé mós ba sira neʼebé laʼós Testemuña ba Jeová.—Galásia 6:10.