Lae, ami la iha toman hanesan neʼe; ami-nia organizasaun hetan apoiu husi kontribuisaun neʼebé ema fó ho laran. Entaun, toman kona-ba fó porsentu 10, neʼe mai husi neʼebé? Tanbasá mak Testemuña ba Jeová la halo ida-neʼe?

 Mandamentu atu fó porsentu 10 husi ema ida-idak nia sasán, neʼe mak parte husi Ukun-Fuan neʼebé Maromak fó ba nasaun Izraél antigu. Maibé Bíblia hatudu ho klaru katak ema kristaun sira la presiza ona halo tuir Ukun-Fuan neʼe, nuneʼe sira la presiza “halibur parte sanulu”.—Ebreu 7:​5, 18; Koloso 2:​13, 14.

 Tan neʼe, ami Testemuña ba Jeová la haketak porsentu 10 husi ami ida-idak nia rikusoin hodi fó nuʼudar kontribuisaun, maibé ami halo tuir ezemplu husi ema kristaun sira iha apóstolu nia tempu no apoia serbisu haklaken iha dalan rua. Dalan ida mak ami ida-idak halo serbisu haklaken hodi la simu osan, no dalan ida seluk mak ami fó kontribuisaun ho laran.

 Hodi halo buat hirak-neʼe, ami halo tuir Bíblia nia konsellu ba ema kristaun, dehan: “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran-ksolok.”—2 Korinto 9:7.