Testemuña ba Jeová respeitu governu sira no símbolu nasaun nian. Ami la kontra ema seluk nia desizaun atu kontinénsia ba bandeira, ka kanta inu nasionál.

 Maski nuneʼe Testemuña ba Jeová hili atu la partisipa iha serimónia sira hanesan neʼe tanba ami fiar katak neʼe kontra Bíblia nia hanorin. Ami kontente se ema seluk respeitu ami-nia fiar hanesan ami mós respeitu sira.

Iha informasaun neʼe

•  Ami-nia desizaun bazeia ba Bíblia nia hanorin ida-neʼebé?

•  Oinsá se lei mak haruka?

•  Testemuña ba Jeová apoia buat polítiku ka sosiál ka lae?

 Ami-nia desizaun bazeia ba Bíblia nia hanorin importante rua tuirmai:

•   Maromak deʼit mak merese simu ita-nia adorasaun. Bíblia dehan: “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.” (Lucas 4:8) Inu nasionál sempre uza liafuan neʼebé hatudu katak ita promete atu hadomi nasaun liu fali buat hotu. Tan neʼe Testemuña ba Jeová halo tuir sira-nia konxiénsia hodi la hola parte iha serimónia sira hanesan neʼe.

   Testemuña ba Jeová sente katak kontinénsia ba bandeira mak hanesan deʼit ho adora estátua, neʼebé Bíblia bandu. (1 Korinto 10:14) Matenek-naʼin balu dehan katak bandeira nasaun mak hanesan ho símbolu relijiaun nian. Istória-naʼin ida naran Carlton J. H. Hayes dehan: “Nasionalizmu mak atu hanesan ho relijiaun no ninia símbolu importante neʼebé ema adora mak bandeira.” a Kona-ba ema Kristaun iha tempu antigu, Daniel P. Mannix dehan: ‘Ema Kristaun lakohi hasaʼe sakrifísiu ba imperadór Roma nia maromak sira. Neʼe maizumenus hanesan ohin loron lakohi kontinénsia ba bandeira.’ b

  Maski Testemuña ba Jeová la kontinénsia ba bandeira, maibé ami la halo aat bandeira, sunu, ka hatudu hahalok seluk neʼebé la respeitu ba símbolu nasaun nian.

•   Ema hotu hanesan deʼit iha Maromak nia oin. (Apóstolu 10:34, 35) Bíblia dehan katak Maromak “halo nasaun hotu atu hela iha mundu tomak”. (Apóstolu 17:26) Tanba razaun neʼe, Testemuña ba Jeová fiar katak sala atu fó glória ka haree grupu nasaun ida diʼak liu fali nasaun seluk. Ami respeitu ema hotu, maski mai husi fatin ka rasa neʼebé la hanesan.—1 Pedro 2:17.

 Testemuña ba Jeová laʼós kontra ema nia governu. Ami fiar katak governu ohin loron “simu pozisaun husi Maromak”, neʼe katak Maromak mak husik sira atu ukun. (Roma 13:1-7) Ami mós fiar katak ema Kristaun presiza halo tuir autoridade sira.—Lucas 20:25.

 Maibé oinsá se lei mak haruka atu halo buat neʼebé Maromak la gosta? Iha situasaun balu, ami presiza husu ba governu atu halo mudansa uitoan kona-ba lei neʼe. c Se la iha dalan atu troka, Testemuña ba Jeová sei hili ho respeitu atu “halo tuir Maromak nuʼudar ukun-naʼin duké halo tuir ema”.—Apóstolu 5:29.

 Lae. Testemuña ba Jeová la hola parte iha buat neʼebé liga ho polítiku ka problema sosiál. Ami deside atu la kontinénsia ba bandeira, ka kanta inu nasionál laʼós tanba ami mete iha atividade polítiku ruma. Maibé ami hakarak moris tuir ami-nia fiar neʼebé bazeia ba Bíblia atu la halaʼo serimónia sira hanesan neʼe.