Ema nia hanoin sala: Testemuña ba Jeová la selebra Páskua tanba sira laʼós ema kristaun.

 Realidade: Ami Testemuña ba Jeová tau fiar ba Jesus Kristu nuʼudar ami-nia Salvadór, no ami mós hakaʼas an atu “laʼo tuir ninia ain-fatin”.—1 Pedro 2:21; Lucas 2:11.

 Ema nia hanoin sala: Testemuña ba Jeová la fiar katak Jesus moris hiʼas ona husi mate.

 Realidade: Ami fiar Jesus moris hiʼas duni; ami rekoñese ida-neʼe nuʼudar ema kristaun nia hanorin neʼebé importante tebes, no ami mós haklaken kona-ba Jesus nia moris-hiʼas.—1 Korinto 15:3, 4, 12-15.

 Ema nia hanoin sala: Testemuña ba Jeová lakohi halo sira-nia oan kontente iha tempu Páskua.

 Realidade: Ami hadomi tebes ami-nia oan sira. Ami hakaʼas an atu hanorin ami-nia oan no ajuda sira atu halaʼo moris neʼebé kontente.—Tito 2:4.

•   Toman oioin neʼebé ema halo durante Semana Santa ka Páskua, porezemplu la han naʼan, neʼe la mai husi Bíblia.

•   Jesus haruka ninia dixípulu sira atu komemora ninia mate, maibé nia la haruka sira atu selebra ninia moris-hiʼas. Tinan-tinan, ami komemora Jesus nia mate iha data neʼebé tuir kalendáriu tempu Bíblia nian.—Lucas 22:19, 20.

•   Ami fiar katak rai balu nia kostume sira atu halo selebrasaun Páskua nian, ninia hun mak husi ema jentiu sira-nia selebrasaun neʼebé hamulak atu iha oan barak, no kostume hanesan neʼe la halo Maromak kontente. Maromak nia hakarak mak ita adora nia mesak ida deʼit ho laran tomak, no nia lakohi ita halo selebrasaun neʼebé kahur ho kostume oioin neʼebé nia la simu.—Êxodo 20:5; 1 Reis 18:21.

 Ami fiar katak tanba ami kaer metin ba Bíblia nia hanorin mak ami la selebra Semana Santa ka Páskua. Bíblia haruka ita atu uza ita ida-idak nia “matenek no kbiit atu hanoin”, laʼós halo tuir deʼit ema nia tradisaun. (Provérbios 3:21; Mateus 15:3) Ami kontente atu esplika ami-nia fiar kona-ba neʼe ba ema seluk, maibé ami mós respeitu nafatin ema seluk nia direitu atu halo buat neʼebé ema ida-idak hakarak halo.—1 Pedro 3:15.