Ami Testemuña ba Jeová sempre hakaʼas an laʼo tuir buat neʼebé Jesus hanorin no saida mak ninia dixípulu sira halo iha tempu uluk. Buat sira neʼebé ami fiar mak hanesan tuirmai neʼe.

1.   Maromak. Ami adora Maromak loos mesak ida deʼit neʼebé Aas Liu Hotu. Nia mak Kriadór, neʼebé naran Jeová. (Salmo 83:18; Apokalipse 4:​11) Nia mak Maromak neʼebé Abraão, Moisés no Jesus adora.​—Éxodo 3:6; 32:11; João 20:17.

2.   Bíblia. Ami haree Bíblia nuʼudar Maromak nia mensajen ba ema. (João 17:17; 2 Timóteo 3:​16) Ami-nia fiar bazeia ba Bíblia nia livru 66 hotu, neʼebé inklui “Testamentu Tuan” no “Testamentu Foun”. Profesór Jason D. BeDuhn hatete katak Testemuña ba Jeová sira-nia fiar no adorasaun bazeia ba buat neʼebé hakerek iha Bíblia, laʼós tuir sira-nia hakarak rasik. a

    Maski ami konkorda ho liafuan hotu iha Bíblia, maibé ami mós rekoñese katak parte balu iha Bíblia hakerek iha dalan simbóliku, ka atu reprezenta deʼit buat ruma.​—Apokalipse 1:1.

3.   Jesus. Ami banati-tuir buat neʼebé mak Jesus hanorin no halo. Ami hatudu respeitu tebes ba nia nuʼudar ami-nia Salvadór no Maromak nia Oan. (Mateus 20:28; Apóstolu 5:​31) Tan neʼe ami bolu an Kristaun. (Apóstolu 11:26) Maibé, ami mós aprende husi Bíblia katak Jesus laʼós Maromak neʼebé Aas Liu Hotu no eskritura sira la apoia doutrina Trindade.​—João 14:28.

4.   Maromak nia Reinu. Neʼe mak ukun, ka governu ida iha lalehan, laʼós kondisaun ida iha ema kristaun ida-idak nia laran. Ukun neʼe sei troka ema nia governu hotu no sei lori Maromak nia hakarak ba mundu. (Daniel 2:​44; Mateus 6:​9, 10) Ida-neʼe sei akontese lakleur tan tanba Bíblia fó-hatene katak ita moris iha “loron ikus sira.”​—2 Timóteo 3:​1-5; Mateus 24:​3-​14.

    Jesus mak Liurai ba Maromak nia Reinu. Nia komesa ona ukun iha lalehan iha tinan 1914.​—Apokalipse 11:15.

5.   Salvasaun. Jesus nia sakrifísiu halo ita livre husi sala no mate. (Mateus 20:28; Apóstolu 4:​12) Atu hetan bensaun husi sakrifísiu neʼe, hatudu deʼit fiar ba Jesus la toʼo, ita mós tenke troka ita-nia moris hodi tuir Maromak nia ukun-fuan no hetan batizmu. (Mateus 28:19, 20; João 3:​16; Apóstolu 3:​19, 20) Ema nia hahalok sira mak hatudu katak nia iha fiar neʼebé moris. (Tiago 2:​24, 26) Maibé neʼe la dehan katak ita sei hetan salvasaun tan deʼit ita hatudu hahalok diʼak. Ita bele hetan salvasaun só deʼit tanba “Maromak nia laran-diʼak neʼebé boot”.​—Galásia 2:​16, 21.

6.   Lalehan. Maromak Jeová, Jesus Kristu, no anju laran-metin sira mak hela iha lalehan. b (Salmo 103:19-​21; Apóstolu 7:​55) Ema uitoan deʼit, hamutuk naʼin-144.000, mak sei hetan moris-hiʼas ba lalehan atu ukun hamutuk ho Jesus iha Maromak nia Reinu.​—Daniel 7:​27; 2 Timóteo 2:​12; Apokalipse 5:​9, 10; 14:1, 3.

7.   Rai. Maromak kria mundu atu sai ema nia hela-fatin ba nafatin. (Salmo 104:5; 115:16; Eclesiastes 1:4) Maromak sei haraik bensaun ba ema neʼebé laran-metin hodi fó saúde neʼebé perfeitu ba sira no atu moris ba nafatin iha paraízu iha mundu.​—Salmo 37:11, 34.

8.   Buat aat no terus. Ida-neʼe komesa bainhira anju ida kontra hasoru Maromak. (João 8:​44) Bainhira nia kontra, anju neʼe hetan naran “Satanás” no “Diabu”. Nia book mane no feto primeiru atu halo tuir nia, no neʼe lori rezultadu neʼebé aat ba sira-nia oan no bei-oan hotu. (Génesis 3:​1-6; Roma 5:​12) Maromak husik buat aat no terus akontese atu hatudu sai Satanás nia lia-bosok. Maibé Maromak sei la husik buat sira-neʼe akontese ba nafatin.

9.   Mate. Ema neʼebé mate la iha tan ona. (Salmo 146:4; Eclesiastes 9:​5, 10) Sira la hetan terus iha infernu.

    Maromak sei fó moris-hiʼas ba ema biliaun ba biliaun neʼebé mate ona. (Apóstolu 24:15) Maibé, se sira neʼebé hetan moris fali la simu atu halo tuir Maromak nia ukun-fuan, sira sei halakon tiha ba nafatin no sei la hetan tan moris-hiʼas.​—Apokalipse 20:14, 15.

10.   Família. Ami halo tuir Maromak nia matadalan kona-ba kaben. Maromak nia hakarak kona-ba kaben mak mane ida kaben ho feto ida. Razaun ida deʼit atu soe malu mak se feen ka laʼen halo sala-foʼer seksuál. (Mateus 19:​4-9) Ami fiar Bíblia nia matadalan bele ajuda família sira atu moris kontente.​—Éfeso 5:22–​6:1.

11.   Ami-nia adorasaun. Ami la uza krús, estátua, ka imajen sira. (Deuteronómio 4:​15-​19; 1 João 5:​21) Buat importante neʼebé ami halo iha ami-nia adorasaun mak hanesan tuirmai neʼe:

    •   Orasaun ba Maromak.​—Filipe 4:6.

    •   Lee no estuda Bíblia.​—Salmo 1:​1-3.

    •   Hanoin kleʼan kona-ba saida mak ami aprende husi Bíblia.​—Salmo 77:12.

    •   Halibur hamutuk hodi halo orasaun, estuda Bíblia, kanta knananuk, hatudu ami-nia fiar no hametin ami-nia maluk, no ema seluk.​—Koloso 3:​16; Ebreu 10:23-​25.

    •   Haklaken “liafuan diʼak kona-ba Maromak nia Ukun”.​—Mateus 24:14.

    •   Ajuda sira neʼebé hetan daudauk susar.​—Tiago 2:​14-​17.

    •   Harii no tau matan ba Reuniaun-Fatin no fatin seluk neʼebé ami uza atu halaʼo edukasaun kona-ba Bíblia iha mundu tomak.​—Salmo 127:1.

    •   Ajuda iha tempu dezastre naturais.​—Apóstolu 11:27-​30.

12.   Ami-nia organizasaun. Ami organiza an liuhusi kongregasaun, no kongregasaun ida-idak iha grupu katuas ida mak tau matan. Maibé ami la iha arranju kona-ba amlulik ka amu, tan neʼe katuas sira la simu saláriu. (Mateus 10:8; 23:8) Ami la iha toman atu haketak porsentu sanulu husi ami-nia osan hodi fó ba ami-nia relijiaun, no ami mós la husu ezmola iha ami-nia fatin adorasaun. (2 Korinto 9:7) Ami-nia atividade hotu hetan apoiu husi kontribuisaun neʼebé ema fó ho laran, no ema seluk la presiza hatene sé mak fó.

     Testemuña ba Jeová iha mundu tomak hetan matadalan husi ema kristaun grupu kiʼik neʼebé iha esperiénsia. Grupu neʼe bolu Grupu Administradór no sira serbí iha ami-nia sede-jerál.​—Mateus 24:45.

13.   Ami-nia unidade. Iha mundu tomak, ami iha fiar ida deʼit. (1 Korinto 1:​10) Ami mós hakaʼas an atu la hamosu diskriminasaun kona-ba suku, nasaun, ka rasa neʼebé la hanesan. (Apóstolu 10:34, 35; Tiago 2:4) Maski ami kaer metin ba ami-nia unidade, maibé ema ida-idak iha nafatin liberdade atu hili. Ami hotu bele halo desizaun tuir ami-nia konxiénsia neʼebé hetan ona treinu husi Bíblia.​—Roma 14:​1-4; Ebreu 5:​14.

14.   Ami-nia hahalok. Ami hakaʼas an atu hatudu domin iha ami-nia hahalok hotu. (João 13:34, 35) Ami hadook an husi toman no hahalok neʼebé halo Maromak la kontente. Neʼe inklui uza sala raan hodi simu transfuzaun raan. (Apóstolu 15:28, 29; Galásia 5:​19-​21) Ami hakaʼas an atu haburas dame no la hola parte iha funu. (Mateus 5:9; Isaías 2:4) Ami hatudu respeitu ba governu no halo tuir lei sira, naran katak lei sira-neʼe la husu atu kontra Maromak nia ukun-fuan.​—Mateus 22:21; Apóstolu 5:​29.

15.   Ami-nia relasaun ho ema seluk. Jesus dehan: “Ó tenke hadomi ó-nia maluk hanesan ó-nia an rasik.” Nia mós dehan katak ema kristaun “laʼós parte husi mundu neʼe”. (Mateus 22:39; João 17:16) Tan neʼe, ami hakaʼas an “halo buat neʼebé diʼak ba ema hotu”, maibé ami la mete iha buat polítiku naran deʼit no la kahur ho relijiaun sira seluk. (Galásia 6:​10; 2 Korinto 6:​14) Maibé, se ema neʼebé laʼós ami-nia membru hakarak halo buat sira-neʼe, ami respeitu sira-nia desizaun.​—Roma 14:12.

 Se Ita hakarak hatene liután kona-ba Testemuña ba Jeová sira-nia fiar, Ita bele lee kona-ba ami iha ami-nia sítiu, kontaktu ami-nia eskritóriu ida, tuir ami-nia reuniaun iha Reuniaun-Fatin ida neʼebé besik Ita, ka koʼalia ho Testemuña ida neʼebé iha Ita-nia área.