Sin, ami Testemuña ba Jeová hemu ai-moruk no simu tratamentu médiku. Maski ami hakaʼas an atu kuidadu didiʼak ami-nia isin no tau matan ba ami-nia saúde, maibé dala ruma ami “presiza doutór”. (Lucas 5:31) Liután neʼe ohin loron iha Testemuña ba Jeová sira-nia leet iha ema balu neʼebé serbisu nuʼudar doutór hanesan Lucas, ema kristaun ida neʼebé moris iha Jesus nia tempu.—Koloso 4:14.

 Loloos, iha tratamentu balu neʼebé kontra malu ho prinsípiu husi Bíblia, no ami sei la simu tratamentu neʼe. Porezemplu, ami la simu transfuzaun raan tanba Bíblia bandu hatama raan ba isin atu bele moris. (Apóstolu 15:20) No Bíblia mós bandu ai-moruk ka tratamentu saúde nian ruma neʼebé iha ligasaun ho matan-dook nia atividade.—Galásia 5:19-21.

 Maibé, iha tratamentu médiku barak mak la kontra malu ho prinsípiu husi Bíblia. Tan neʼe, Testemuña ba Jeová ida-idak bele hili tratamentu sira-neʼe tuir sira ida-idak nia hakarak. Karik Testemuña balu hakarak hemu ai-moruk ka simu tratamentu médiku ruma, maibé karik Testemuña seluk lakohi hemu ai-moruk ka simu tratamentu médiku, neʼe depende ba ema ida-idak mak hili.—Galásia 6:5.