“Watch Tower Bible and Tract Society of Pennsylvania” mak asosiasaun voluntáriu ida neʼebé harii iha tinan 1884 tuir lei Commonwealth of Pennsylvania iha rai-Estadus Unidus. Ami Testemuña ba Jeová uza asosiasaun neʼe atu halaʼo ami-nia serbisu iha mundu tomak, inklui mós halo Bíblia no livru seluk neʼebé esplika kona-ba Bíblia.

 Tuir dokumentu neʼebé rejistu asosiasaun neʼe dehan, asosiasaun neʼe nia objetivu mak atu halaʼo atividade relijiaun nian, edukasaun Bíblia nian no ajuda ema, liuliu mak atu “haklaken no hanorin evanjellu kona-ba Maromak nia Reinu neʼebé Jesus Kristu mak ukun nuʼudar liurai”. Ema sira neʼebé hetan konvite mak bele sai membru ba asosiasaun neʼe, laʼós haree ba ema neʼe fó ona osan hira ba organizasaun neʼe. Membru sira no diretór sira hotu iha asosiasaun neʼe fó apoiu ba Testemuña ba Jeová nia Grupu Administradór.

 Iha nasaun oioin, Testemuña ba Jeová mós rejistu ona sira-nia asosiasaun ho naran seluk tuir nasaun ida-idak nia lei. Naran sira-neʼe mak hanesan “Watch Tower”, “Watchtower”, ka naran seluk neʼebé tradús tuir naran sira-neʼe.

 Liuhusi asosiasaun hirak-neʼe, ami halaʼo ami-nia atividade oioin, hanesan buat sira tuirmai neʼe:

•   Hakerek no halo livru. Ami halo ona Bíblia maizumenus hamutuk 220.000.000 no livru seluk neʼebé hanorin Bíblia maizumenus hamutuk biliaun 40 iha língua 700 liu. Iha mós sítiu jw.org neʼebé fó oportunidade ba ema atu lee Bíblia ho gratuitu deʼit iha língua 120 liu, ka ema mós bele buka resposta ba pergunta hanesan “Saida mak Maromak nia Reinu?”

•   Edukasaun. Ami halaʼo eskola oioin kona-ba Bíblia nian. Porezemplu, dezde tinan 1943, Testemuña ba Jeová naʼin-8.000 liu mak hetan ona treinu liuhusi eskola Watchtower Bible School of Gilead. Eskola neʼe treinu sira sai nuʼudar misionáriu ka treinu sira oinsá atu habelar no hametin serbisu haklaken iha mundu tomak. Semana-semana, ami mós halaʼo reuniaun eskola nian ida iha ami-nia kongregasaun sira iha mundu tomak. Programa neʼe mak reuniaun ida neʼebé fó treinu Testemuña ba Jeová rihun ba rihun no mós ema sira neʼebé seidauk sai Testemuña ba Jeová. Ami mós halaʼo kursu atu ajuda ema sira neʼebé lee la hatene, no ami halo ona livru neʼebé ami uza atu hanorin ema lee no hakerek iha língua hamutuk 110.

•   Fó ajuda. Bainhira funu ka dezastre naturais ruma mosu, ami fó ajuda ba vítima sira. Porezemplu, ami fó ona ajuda balu ba vítima sira neʼebé hetan terus iha masakre neʼebé akontese iha rai-Ruanda iha tinan 1994, no mós ba vítima sira husi rai-nakdoko boot neʼebé akontese iha rai-Haití iha tinan 2010.

 Maski ami kumpre ona buat barak liuhusi asosiasaun legál sira-neʼe, maibé neʼe la dehan katak atu halaʼo ami-nia atividade tenke depende ba asosiasaun neʼe. Neʼe tanba ema kristaun ida-idak iha responsabilidade rasik atu kumpre sira-nia knaar neʼebé sira simu husi Maromak atu haklaken no hanorin ema seluk kona-ba liafuan diʼak husi Bíblia. (Mateus 24:14; 28:19, 20) Ami fiar katak Maromak mak apoia ami-nia atividade no ami sadere tomak ba Maromak atu fó bensaun hodi nuneʼe ami-nia atividade hotu bele laʼo ho diʼak.​—1 Korinto 3:6, 7.