Fa ela o mpahay siansao ro nitondregne amy ty raha mipiteke aboa o myxineo. Biby miaigne an-driake ey io. Ino ty anto’e? Satria amy ty raha lasitike vokare o raha managn’aigneo, le o raha mipiteke aboa’e iohoe ty rehafegne tie fara’e maleme.

 Dineho zao: Mitovitovy amo o amalogneo o myxineo, faie amy ty fara’e ambane amy i riakey agne ty misy aze. Mamoake raha mipiteke reke naho fa trea’e tie misy biby magnaly hihinagne aze. Raha manokagne amy i vata’ey ao ty mamokatse o raha mipiteke iohoe. Karaza proteina maromaro ty agnate i raha mipitekey ao, agnisa izay ty proteina mitovy amy ty kofehe madineke agnarivo’e. Avaly i proteina rey ho ranon-draha mipiteke ze rano magnodidigne i myxiney. O raha mipiteke iohoe ro manampegne ty taovam-pisefoa ze biby magnaly hihinagne i myxiney. Aloa i bibỳ malaky areke i myxiney sady lomay i bibỳ.

 Mahaveregne i raha mipiteke aboa o myxineoy. Tena manify i proteina hoe kofehe ama’e ao rey satria ampahazato ty vetem-bolo raike ty fanify ty tsikiraidraike ama’e. Faie mihoatse im-10 o taly nylon-eo ty fatifi’e. Naho fa aboa’e an-driake ey i proteina manahake o kofeheo rey naho ty karaza proteina hafa, le manjare hoe harato malemeleme i raha rey. Mahatagne rano mihoatse ty 26 000 ty hery ty favesa i proteina manahake o haratò rehoe. Naho ty maregne, le fa ho ty 100 isan-jato amo o raha mipiteke iohoe ro rano.

 Te hangala tahake o raha mipiteke aboa o myxineò o mpahay siansao faie mbe tsy nahavita. Nisy mpikaroke raike nirehake tie bey pitsopitso’e loatse ty fomba amokara o biby iohoe i ranon-draha mipitekey. Faie mieretseretse hamboatse proteina mitovy amo o kofeheo o mpahay siansao, le bakteria ty hampiasaegne. Te hamboatse raha maivagne, tsy mora tapake, lasitike, sady tsy mora levogne iareo. Naho mahavita mamboatse proteina manahake o kefeheo iareo, le ho azo amboaragne lamba zay, ndra amboaragne raha hafa ampiasae o mpitsabò. Faie naho ty maregne maro ty raha azo ampiasagne aze.

 Akore ty heve’o? Nivoatse miandalagne vao i raha mipiteke aboa o myxineoy, sa nisy namorogne?