Biby andriake ey miaigne amy ty fara’e ambane amy riakey agne naho amo o lamilamin’akorandriakeo agne o concombre de mer-o. Isan-karaza’e ty pozy iareo: Ao ty misy tsokotsoko’e madineke, ao ty mibontsibontsigne, le misy ka ty maragnidragnitse. Tena mahaveregne fa agnate ty minitra tsy ampeampe ndra segondra tsy ampeampe avao reke, le afake miova ho malemeleme manahake o hamon-tanteleo ndra mafe bey manahake o hataeo. Afake misisike amy ty toeragne tena maifitse agne ka reke, le naho fa avy eo mihamafe bey mba tsy ho azo ze fahavalo’eo sokiregne boake ao. I holi’ey ty ahafaha’e manao izay.

 Dineho zao: Afake miova ho mafe bey ndra malemeleme ndra agnelagnela izay eo ty holy o concombre de mer-o. Ampifandrambese’e ndra saratsarahe’e avao i fibra amy i holi’ey aoy naho fa te hiova reke. Mampiasa proteina magnamafe ndra mampaleme reke, arakarake ze ilae’e.

 I proteina magnamafey ty mampifandrambe i fibra amy i holi’ey aoy, le manjare mafe bey i holi’ey. I proteina mampalemey ka ty magnasarake i fibra rey, le manjare malemeleme i holi’ey. Azo’e atao tena malemeleme i holi’ey, le manjare hoe mitsonike.

 Mikezake mamboatse fitaovagne afake miovaova manahake ty holy o concombre de mer-o o manam-pahaiagneo. Agnisa ty tanjo iareo zao ty hamboatse fitaovagne elektronike azo atsofoke agnate betro agne amy ty alala ty fandrasagne, amy izay ho mafe soa i rahay naho fa apetake amy ty toeragne toko’e hisy aze, le halemeleme naho fa avy eo. Naho ohatse, mete hatao hoe izay i fitaovagne elektronikey, le ho azo antoke tie hahomby i fandrasagney.

 Akore ty heve’o? Vokatse ty evolisiona vao ty holy o concombre de mer-o sa nisy namorogne?