Tena sahiragne i tompon-tsamboy satria misy karazan’akorandriake atao tihoe Balanes naho raha managn’aigne hafa mipiteke ty amy i samboy. Mampihegne ty falaky ty lia i samboy o raha rehoe, hafara’e maro loatse ty gazoaly lany. Tsy maintsy ajanogne tsy miasa heike ka i samboy isake taogne tsiampeampe satria mila liovegne. Mandineke o raha finorogneo areke o manam-pahaiagneo mba hipaliavagne vahaolagne.

 Dineho zao: Trea o mpikarokeo tie mahavita magnalio ty holi’e ty karazan-trozogne mainte raike (Globicephala melas). Misy raha marokoroko ty ambone i holi’ey eo, le tsy afake mipetrake eo ty ana o balanes-o. Misy ranon-draha mipitepiteke mialy amo o ahe-dranò naho amo o bakteriao ty agnelagnela i raha marokoroko rey ey. Mamoake ranon-draha vaovao i trozogney isake tie misy holi’e miala.

 Mipay fomba hagnaliovagne ty vata o sambò o manam-pahaiagneo, le mandineke ty fomba fagnaliova o trozogneo ty holi’e. Loko ty nampiasaegne tie taloha. Faie mamono biby andriake ey i karazan-doko tena maro mampiasay. Vaho tsy ela areke zay, le rinara ty fampiasagne i raha rey. Nahatrea vahaolagne o manam-pahaiagneo: Asiagne lavake maromaro ty amy ty vata i samboy eo, le asiagne harato vigne ty ambone’eo. Mamoake ranon-draha simike tsy manimba tontolo iaignagne i lavake rey. Manjare marihetse naho mipitepiteke i ranon-drahay naho fa tratse i riakey, le manjare sahala hoe holy i samboy. Mahatratse 0,7 milimetatse eo ho eo i rahay. Naho fa mandeha ty fotoagne, le miendake i rahay sady miala miarake ama’e ze biby ndra ze raha hafa nipiteke tama’e teo. Misy ranon-draha vaovao indraike mandrakotse i samboy naho fa afara izay.

 Nisy fagnandramagne natao ty tamy ty laboratoara raike tagne, le nitrea tie zara’e naho misy biby mipiteke ty amo o sambò eo naho fa ampiasaegne o fomba fiasa iohoe. Tena nandrambe soa tamy izay ze orinasa mampiasa sambo. Satria tena mate antoke bey iareo naho fa akaregne boake an-driakey i samboy mba holiovegne.

 Akore ty heve’o? Nivoatse miandalagne vao ty holy o trozogne mainteo, sa nisy namorogne?