Atao tihoe ota ze raha mifanohetse amy ty fitsipin’Andrianagnahare. Va’e ho raha atao zay, ndra fihetseham-po, ndra eretseretse. Manota ka ty ndaty raike naho fa tsy magnorike ty lilin’Andrianagnahare, le manao ty raha saontsie’e tie raty ndra tsy maregne. (1 Jaona 3:4; 5:17) Rehafe ty Baiboly ka tie manota ty ndaty raike tsy manao ty raha toko’e hatao’e.​—Jakoba 4:17.

 Midika tihoe “tsy mahavoa ty raha kendregne” i rehake tam-boaloha’e tagne nadika tihoe otay. Nisy maramila ta Israely agne taloha, ohatse, tena nahay nampiasa piletse, le “tsy mba niviogne” ndra kedekede ze bala nalefa’e. Midika ara-bakiteny tihoe “tsy nanota” i rehake nadika tihoe ‘tsy niviogney.’ (Mpitsara 20:16) Hoe raha kendregne areke i fitsipike voririke napetran’Andrianagnahare rey, le manota tika naho fa tsy mahavita magnorike aze.

 Manan-jò hametrake fitsipike horihe o ndatio ty Andrianagnahare satria ireke ty namboatse ze kila raha iaby. (Apokalypsy 4:11) Mbe hotsarae’e arake ze raha ataontikagne tika iaby.​—Romanina 14:12.

Ho vitantikagne vao tihoe tsy hanota?

 Aha’a. Mirehake ty Baiboly tie “sambe fa nanota ty ndaty iaby, le tsy mahatratse ty voninahin’Andrianagnahare.” (Romanina 3:23; 1 Mpanjaka 8:46; Mpitoriteny 7:20; 1 Jaona 1:8) Fa nagnino?

 Tsy nisy ota ty Adama naho i Eva tamy ty voaloha’e satria nivoririke. Namboaregne nitovy vintagne aman’Andrianagnahare iareo. (Genesisy 1:27) Faie tsy nankatò an’Andrianagnahare iareo, le nanjare tsy voririke. (Genesisy 3:5, 6, 17-19) Manaranake o otao naho o tsy fahavoririhagneo, hafara’e nifindra tamo o ana iareò zay naho fa niterake iareo. (Romanina 5:12) Hoe ty Davida mpanjaka o Israelio miomba izay: “Vaho niforogne tan-tron-dreneko ao raho le fa mpanota.”​—Salamo 51:5.

Misy ota vao raty ambone ty ota ila’e?

 Eka. Mirehake, ohatse, ty Baiboly fa “raty fagnahy ty ndaty ta Sodoma tao sady mpanota bey iareo tagnatreha i Jehovah eo.” “Fa losotse loatse” ka ty fahota iareo. (Genesisy 13:13; 18:20) Misy raha telo retoagne mila dinehegne mba hahitavagne naho tena raty vata’e i fahotagney.

1.   Tena lahibey vao i otay? Risihe ty Baiboly tika mba hagnalavitse o fahotagne lahibeio, agnisa izay ty mijangajanga, manompo sampy, mangalatse, mamo, mieva hery, mamono ndaty, naho manao aoly. (1 Korintianina 6:9-11; Apokalypsy 21:8) Aseho ty Baiboly fa tsy mitovy ty ndaty manao fahotagne lahibey naho ty manota faie tsy satrie’e, ndra manaotao fahatane avao satria tsy nandineke soa. Va’e tsy ho satrie’e, ohatse, ty mirehake ndra manao raha mahaboseke ty hafa. (Ohabolana 12:18; Efesianina 4:31, 32) Faie ndra tie eo zay, le mirehake ty Baiboly tie tsy toko’e hohamaivagnegne o fahotagneo. Va’e hanao fahotagne lahibey avao manko ty ndaty raike manao i fahotagne madinedineke rey.​—Matio 5:27, 28.

2.   Tena satrie’e vao ty nanao i rahay? Manota ty ndaty ila’e satria tsy mahafantatse ty fitsipin’Andrianagnahare. (Asan’ny Apostoly 17:30; 1 Timoty 1:13) Maregne fa tsy mete ty raha atao i ndatỳ naho henteagne ty Baiboly, faie tsy ampitovie’e amy i ndaty satrie’e ty tsy magnorike ty lilin’Andrianagnahare rey iareo. (Nomery 15:30, 31) O “fo ratio” ty mahavy o ndatio hanota an-tsitrapo.​—Jeremia 16:12.

3.   Niherenkeregne vao ty nanoagne aze? Aseho ty Baiboly fa tsy mitovy tihoe manota indraike naho tihoe zatse manota agnate ty fotoagne elaela. (1 Jaona 3:4-8) Melohen’Andrianagnahare ty ndaty manota an-tsitrapo naho fa boake nampianaregne ty hamarenagne.​—Hebreo 10:26, 27.

 Va’e henjehe ty eretsere’e avao ty ndaty raike nanao fahotagne lahibey. Izao, ohatse, ty nirehafe i Davida Mpanjaka: “Fa mihoatse ty lohako ty hadisoako. Manahake o entagne mavesatseo rey le tsy leoko.” (Salamo 38:4) Faie mbe misy fanantenagne, satria hoe ty Baiboly: “Ao ze raty fagnahy hiala amy ty raha raty fatao’e, le ze mpanao raty tsy hieretseretse raha raty sasa. Toko’e hiheregne amy i Jehovah, i hamindra fo ama’ey reke, le i Andrianagnaharentikagney satria tena mamela heloke vata’e reke.”​—Isaia 55:7.