Eka. Mikarakara ze mpanompo’e marare ty Andrianagnahare. Hoe ty Baiboly: “I Jehovah ro hanohagne aze amy ireke marare ambone fandrea’e eoy.” (Salamo 41:3) Misy raha telo afake magnampe azo retoagne naho managne aretegne miteza rehe:

1.   Mangataha hery aman’Andrianagnahare. Hahazo “ty fiadanan’Andrianagnahare ambone ze kila eretseretse” rehe amy izay, sady hahavita hiaretse naho tsy minekoneko loatse.​—Filipianina 4:6, 7.

2.   Mikezaha ho falefale avao. Hoe ty Baiboly: “Mahasoa naho magnasitragne ty fo falefale, fa ty fahakiviagne mahamaike taolagne.” (Ohabolana 17:22) Mikezaha ho tea somonga. Tsy hanahelo loatse rehe naho manao izay sady ho salama soa avao ka.

3.   Managna fanantenagne. Naho managne fanantenagne rehe, le ho falefale avao ndra tie managne aretegne miteza aza. (Romanina 12:12) Mirehake ty Baiboly fa amy ty hoavy, le “tsy hisy ndaty hirehake tie: ‘Marare raho.’” (Isaia 33:24) Tsy vita o dokotera amy izaò ty magnasitragne o aretegne mitezao faie hositragnen’Andrianagnahare. Rehafe ty Baiboly ohatse fa tsy hihantetse manahake ty amy izao sasa o ndatio tie amy izay fa hihatanora indraike. Hoe ty Joba 33:25: “Hampiheregnegne soa ambone ty nofo o tanorao ty nofo’e. Le haheregne ama’e manahake ie mbe nitanoray ty oza’e.”

 Fagnamarehagne: Magneke zahay Vavolombelo i Jehovah fa magnampe ty Andrianagnahare. Mitsabo amo o dokoterao agne ka zahay naho managne aretegne miteza. (Marka 2:17) Faie tsy mandrisike o ndatio hagnorike fitsaboagne manokagne zahay, fa i mararey avao ro hanapa-kevetse amy izay.