Eka. Boake aman’Andrianagnahare o Baibolio, le saontsie’e ao tie “mampionogne” o ndaty kivy ndra mikorontan-tsaigneo reke. (2 Korintianina 7:6) Maregne fa tsy nisorategne manokagne hoahy ty ndaty hoe izay o Baibolio, faie misy soso-kevetse fanjaka ty agnate’e ao. Nagnampe ndaty maro mba tsy hamono tegna i soso-kevetse rey, le midika zay tie afake magnampe azo ka.

•  Inogne iaby ty soso-kevetse mey ty Baiboly?

•  Misy tantara o ndaty te ho nimate ka vao ty amy Baiboly ao?

•  Inogne iaby ty andinin-teny hampahery azo?

•  Inogne ty hatao’o naho misy nama’o mirehake tie te hamono tegna reke?

•  Diso vao raho naho fa nagnohatse namono tegna tie taloha?

• ● Rehafo ze raha am-po’o ao.

   Inogne ty raha rehafe ty Baiboly? “Tea lognandro ty ragnetse vata’e sady tena rahalahy natao hagnampe amy ty andro mahaore.”​—Ohabolana 17:17.

   Inogne ty dika izay? Mipay ndaty hirehafagne tika naho fa mikorontan-tsaigne ndra ore mafe.

   Hoe minday entagne mavesatse rehe naho fa managne olagne. Naho ihe irery avao ty minday aze, le ho tonta avao rehe amy ty fara’e. Faie hahatsiaro maivankivagne rehe naho rehafe’o amy ty hafa ty raha manjò azo. Va’e hiova hevetse ka aza rehe.

   Andramo zao: Ko mangatake andro fa androany avao le avy le mirehafa amy ty ndaty an-tragno ao ndra amy ty namagne atokisa’o. a Sorato ka ze raha tsapa’o.

• ● Mamonjea dokotera.

   Inogne ty raha rehafe ty Baiboly? “Tsy ndaty salama o mipay dokoterao fa ty marare.”​—Matio 9:12.

   Inogne ty dika izay? Toko’e hamonje dokotera tika naho fa marare.

   Aretegne ty mahavy ty ndaty ila’e te hamono tegna. Misy ohatse managne olagne ara-tsaigne ndra lava kivy bey avao. Sambe tsy mahamegnatse o raha rehoe satria manahake o aretegneo iaby avao, sady azo tsaboegne soa ka.

   Andramo zao: Mamonjea malaky dokotera afake mikarakara azo soa.

• ● Tsiarovo fa tea azo ty Andrianagnahare

   Inogne ty raha rehafe ty Baiboly?: ‘Vola kedekede roe fara’e ambane ty iviliagne foly dime sa tsy izay? Faie ndra ty raike amy i foly rey tsy halignon’Andrianagnahare ... Ko matahotse areke fa mbe sarobily lavitse nareo naho ampitahaegne amy i foly maro rey.’​—Lioka 12:6, 7.

   Inogne ty dika izay?: Sarobily aman’Andrianagnahare rehe.

   Va’e hahatsapa rehe tie tsy misy midare, le hafara’o te hamono tegna. Faie tsapan’Andrianagnahare ty raha tena mahazo azo. Hoe ty Salamo 51:17: “Tsy hatao’o tsinotsinogne ty fo torotoro naho kivy, ry Andrianagnahareko!” Tea azo ty Andrianagnahare le tsy tea’e ho mate rehe.

   Andramo zao: Maro ty andinin-teny amy Baiboly ao magnaporofo tie tea azo ty Andrianagnahare. Vakio ohatse ty boke Manatòna an’i Jehovah! toko 24 fa hohita’o ao ty ila’e amy izay.

• ● Rehafo aman’Andrianagnahare ty raha mahazo azo.

   Inogne ty raha rehafe ty Baiboly? “Ankigno ama’e [Andrianagnahare] ze mampinekoneko anareo, satria mikarakara anareo reke.”​—1 Petera 5:7.

   Inogne ty dika izay? Tena ty vatantegnan’Andrianagnahare ro misaontsy ama’o tie rehafo ama’e iaby ty raha am-po’o ao naho ty raha mampinekoneko azo.

   Magnampe ze ndaty mipay famonjeagne ama’e ty Andrianagnahare. (Salamo 55:22) Hagnampe azo hilamin-tsaigne naho hanagne herin-tsaigne reke, le ho vita’o ty hiaretse i raha mahazo azoy.​—Filipianina 4:6, 7, 13.

   Andramo zao: Le avy le mivavaha aman’Andrianagnahare rehe ty amy izao. Tognono i tahina’e tihoe Jehovah-y, le rehafo ama’e ze raha am-po’o ao. (Salamo 83:18). Angataho reke mba hagnampe azo tsy hamoe fo.

• ● Anò an-tsaigne avao ty raha ampitamae ty Baiboly.

   Inogne ty raha rehafe ty Baiboly? “Ze raha tamaegne anagnantika zay ro vatofantsike ty aintikagne sady azo antoke ro mafe oregne.”​—Hebreo 6:19.

   Inogne ty dika izay? Va’e miovaova ty fihetseham-po’o ty amy izao, le azo oharegne amy ty sambo aviombio o onjan-driakeo. Miakatse ambone agne tampoke i onjay. Le naho fa avy eo mihegne indraike. Faie hoe vatofantsike ty fampitama i Jehovah le hagnampe azo ho tony.

   Tsy laporo avao i raha ampitamaegne agnate Baiboly ao rey, satria ty vatantegnan’Andrianagnahare ro mampitamà tie hafaha’e ze kila raha mampijale o ndatio.​—Apokalypsy 21:4.

   Andramo zao: Vakio ty lesogne 5 amy ty bokekele Talily Soa Boake Aman’Andrianagnahare! naho te hahafantatse miomba ty raha ampitamaen’Andrianagnahare rehe.

• ● Manoa raha mahafalefale azo.

   Inogne ty raha rehafe ty Baiboly? ‘Fagnafoly tena mahasitragne o fo falefaleo.’​—Ohabolana 17:22.

   Inogne ty dika izay? Naho fa manao raha mahafalefale antikagne tika, le vao mainke hilamigne ty saintikagne, sady tsy ho kivy bey sasa ka tika.

   Andramo zao: Manoa raha tena tea’o ty manao aze. Ohatse, mitsanogne hira mahafalefale ndra mamaky raha mampahery ndra manao raha hafa mahafinaritse. Hanjare ho falefale ka rehe naho manao raha hoahy ty hafa ndra tie kede avao aza.​—Asan’ny Apostoly 20:35.

• ● Manoa raha mahasalama.

   Inogne ty raha rehafe ty Baiboly? ‘Mahasoa kede avao ty mampiasa vatagne.’​—1 Timoty 4:8.

   Inogne ty dika izay? Vao mainke ho salama tika naho mampiasa vatagne, mikezake ho ampe roro soa naho mihinagne hanegne mahasalama.

   Andramo zao: Manoa lia tomboke malakilaky ndra tie agnate ty 15 minitra avao aza.

• ● Tadidio fa mbe hiova ty fiaigna’o.

   Inogne ty raha rehafe ty Baiboly? “Tsy fanta’areo ty raha hisy hamaray.”​—Jakoba 4:14.

   Inogne ty dika izay? Va’e hoe mafe zay ty raha iaigna’o, le mahatsapa rehe tie hoe tsisy tane hombagne zay. Faie mihelagne avao i olagne rey.

   Maregne fa manjombogne o andrò tie androany faie maray mbe hisava avao. Tsy voatere hampalahelo hoe izao avao areke ty fiaigna’o fa va’e mbe hiova. Faie tsy hahatrea izay rehe naho mamono tegna. Ko kivy areke!​—2 Korintianina 4:8.

   Andramo zao: Misy ndaty rehafe ty Baiboly tie nikivy, le nagniry ty ho mate ka. Vakio ty tantara iareo, le hotrea’o tie nihasoa ty fiaigna iareo, sady tsy nampoize iareo ka zay. Intoagne misy ohatse tsiampeampe:

 Eka. Tantarae ty Baiboly tie nisy ndaty tsiampeampe nagniry ty ho mate. Faie tsy nivignetse tamy iareo ty Andrianagnahare fa nagnampe iareo. Matokia areke fa hagnampe azo ka ty Andrianagnahare.

Elia

•  ● Ia o Elia zao? Mpaminany bey herim-po reke. Faie nisy fotoagne reke nikivy. Hoe ty Jakoba 5:17: “Ndaty nanagne fihetseham-po manahake antikagne avao ty Elia.”

•  ● Nagnino reke ro nite ho mate? Nahatsiaro ho irerike reke sady nieretseretse tie tsy nisy dika’e. Natahotse ka reke. Izao areke ty raha nangatahe’e tamy i Jehovah: “Afaho amy izay ty fiaiko Jehovah.”​—1 Mpanjaka 19:4.

•  ● Inogne ty nagnampe aze hiova hevetse? Nambara i Elia an’Andrianagnahare iaby ze raha tam-po’e tao. Le inogne ty raha nataon’Andrianagnahare? Natoro’e i Elia tie tena tea’e reke sady tena mahery ka Reke, le mahavita miaro aze. Nagnomey toky i Elia ty Andrianagnahare tie tena paliae’e ty fisia’e. Nimea’e namagne soa fagnahy naho mahay magnampe ka ty Elia.

•  ▸ Vakio ato ty tantara i Elia: 1 Mpanjaka 19:2-18.

Joba

•  ● Ia o Joba zao? Nanambaly aman’anake reke sady tena nimpagnarivo bey ka. Nanompo i Andrianagnahare Maregney ka ty Joba sady tsy nivalike tama’e.

•  ● Nagnino reke ro nite ho mate? Niova bey tampoke ty fiaigna’e. Nilany iaby ohatse i fanagna’e rey. Nisy loza niseho ka le sambe nimate iaby i ana’e rey. Tsy vita izay fa mbe narare mafe reke le tena nijalejale naho fa niavy eo. Le mbe natao o ndaty kitomboke ka reke tie ty raha natao’e avao o nahavy aze nijaleo. Namoe fo reke le nirehake tie: ‘Mampangorigne ahy ty fiaignako. Tsy te ho velogne sasa raho.’​—Joba 7:16.

•  ● Inogne ty nagnampe aze hiova hevetse? Nivavake taman’Andrianagnahare reke sady nirehafe’e tamy ty ndaty hafa ty raha nitsapa’e. (Joba 10:1-3) Naho fa niavy eo nisy nama’e nitretré naho nampahery aze sady tena nahay nampisaintsaigne aze. I Eliho ty agnara o nama’e iohoe. Nagnampe naho nanoro hevetse aze ka ty Andrianagnahare, le tena nirambese’e soa ka i torohevetsey.

•  ▸ Vakio ato ty tantara i Joba: Joba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosesy

•  ● Ia o Mosesy zao? Mpitarike o firene Israelitao reke sady mpaminany tsy nivalike.

•  ● Nagnino reke ro nite ho mate? Maro bey ty andraiky i Mosesy sady mbe nisy nagnakiagne ka. Hafara’e reke nirerake, le nangatake taman’Andrianagnahare tie: ‘Le avy le vonò raho.’​—Nomery 11:11, 15.

•  ● Ino ty nagnampe aze hiova hevetse? Nirehafe i Mosesy taman’Andrianagnahare ty tam-po’e tao. Nahen’Andrianagnahare ty asa nampanoegne aze naho fa niavy eo mba hahavy aze tsy hirintike loatse sasa.

•  ▸ Vakio ato ty tantara i Mosesy: Nomery 11:4-6, 10-17.