Aha’a, satria anjara ty ndaty tsikiraidraike ty manapa-kevetse tie hanompo an’Andrianagnahare ndra tsy hanompo aze. (Romanina 14:12) Maregne fa ampianare o Vavolombelo i Jehovah-o ze raha rehafe ty Baiboly ty ana’e. Faie naho fa bey reke, le anjara’e ty manapa-kevetse tie hanjare Vavolombelo i Jehovah vao sa tsy hanao izay.​—Romanina 12:2; Galatianina 6:5.

 Ze raha tena hahasambatse ty ana’e ty paliave o Vavolombelo i Jehovah-o, manahake ty ankamaroa ty rae aman-drene avao. Ampianare’e iareo areke ze raha fa fanta’e fa hahasoa aze. Ampianare iareo mba ho soa findesam-batagne ohatse ty ana iareo. Ampianare iareo miomba an’Andrianagnahare ka iareo. Mino o Vavolombelo i Jehovah-o fa ilaegne ty magnorike ty toroheve ty Baiboly naho tena te hanagne fiaignagne soa. Izay ty mahavy iareo hampianatse Baiboly ty ana’e sady hinday aze amy ty fivoria ty Vavolombelo i Jehovah agne. (Deoteronomia 6:6, 7) Naho fa bey reke afara agne, le mba fa mazava ama’e ty raha nampianaregne aze, sady afake manapa-kevetse tie hagnorike ty fivavaha ty rae aman-drene’e vao sa tsy hagnorike.

•  Manao badisa ajaja kedekede vao o Vavolombelo i Jehovah-o?

•  Aria o Vavolombelo i Jehovah-o vao ty ana’e naho mifily ty tsy hatao badisa?

•  Nagnino ro ente o Vavolombelo i Jehovah-o miarake amy iareo ty ana’e naho fa mitory i talily soay iareo?

•  Manao fete ndra fankalazagne hafa vao o Vavolombelo i Jehovah-o?

•  Reha ty ajaja tineza tamo o Vavolombelo i Jehovah-o ao

 Aha’a. Tsy rehafe ty Baiboly tie azo atao badisa o ajaja kedekedeo. Tantaraegne ao tie nitsanogne soa ze raha nitoriegne tama’e heike o Kristiana tamy ty taonjato voaloha’eo, le “nandrambe soa” izay, sady nibebake naho fa niavy eo, vaho izay natao badisa. (Asan’ny Apostoly 2:14, 22, 38, 41) Tsy azo atao badisa areke ty ndaty raike naho tsy fa mahatakatse soa sady mino ze raha ampianare ty Baiboly vaho fa nanapa-kevetse tie hagnorike izay. Tsy mahavita izay o ajaja mbe kedekedeo.

 Faie naho fa mihabey reke, le afake mifily soa tie hatao badisa. Faie tsy maintsy mazava ama’e soa heike tie tsy fihisagne zay.

 Aha’a. Maregne fa malahelo o rae aman-drene Vavolombelo i Jehovah-o naho fa tsy magnorike ty fivavaha iareo ty ana’e. Faie mbe tea’e avao i ana’ey, sady tsy tihoe haria’e noho ireke tsy nagneke hanjare Vavolombelo i Jehovah. Tsy izay ty raha hagnaria’e ty ana’e!

 Intoagne misy anto’e maromaro mahavy anay minday ty ana’ay naho fa mitory i talily soay zahay: a

•   Rehafe ty Baiboly tie toko’e hampianatse ty ana’e hanompo an’Andrianagnahare o rae aman-dreneo. (Efesianina 6:4) Agnisa ty fanompoagne an’Andrianagnahare tihoe mirehake ama o ndaty ty raha inoagne. Mila ampianaregne manao izay areke o ajajao.​—Romanina 10:9, 10; Hebreo 13:15.

•   Mandrisike o ajajao naho o tanorao “sambe hidera ty tahina i Jehovah” ty Baiboly. Agnisa ty fomba soa tena hideragne an’Andrianagnahare ty mirehake ama o ndaty ty miomba aze. b

•   Mahasoa o ajajao ty miarake mitory amy ty rae aman-drene’e. Manjare mahay mirehake amy ty karaza o ndaty iaby ohatse iareo. Manjare managne toetse soa ka iareo, ohatse mitretré, soa fagnahy, magnaja ndaty, sady mieretseretse ze hahasoa ty hafa fa tsy tea tegna. Tsy vita izay fa vao mainke mahay andinin-teny magnaporofo ty raha inoa’e iareo.

 Tsy manao fete ara-pivavahagne ndra fankalazagne tsy tean’Andrianagnahare o Vavolombelo i Jehovah-o. c (2 Korintianina 6:14-17; Efesianina 5:10) Tsy manao aniverisera ndra Krismasy ohatse zahay, satria tsy Kristiana ty ndaty nanao ireo tamy ty voaloha’e.

 Faie tea miarake mihisa amy ty keleia’ay zahay, sady tea manolotse fagnomezagne ho ahy ty ana’ay. Tsy mandigne fete zahay vaho miarake mifale amy ty keleia’ay ndra manao fivoria ty keleiagne ndra magnomey fagnomezagne, fa manao ireo avao zahay agnate i taogney naho fa te hanao izay.