Ty Fagnomezagne an-tsitrapo mey ty Vavolombelo i Jehovah tsikiraidraike ty ikarakaragne ty raha lany amy ty asa fitoriagne atao’ay magneran-tane. a Misy boate hoahy ty fagnomezagne ty amy ty toeragne fivoria’ay. Misy fomba hafa azo anoagne fagnomezagne, rehafegne amy ty tragnom-poraro’ay amy jw.org/tdx ao, amy tihoe “Fagnomezagne.” Afake mifily ty ndaty militse ao tie hanao fagnomezagne hoahy ty asa magneran-tane sa fagnomezagne hoahy ty fiangonagne an-toeragne eo, ndra ka ie roe.

 Tsy itakeagne ampahafolon-karena o Vavolombelo i Jehovah-o sady tsy voafaritse tie fire ndra ampahafire ty karama’ay ro tsy maintsy omei’ay. (2 Korintianina 9:7) Tsy mitake raketse ndra mangatake vidim-pidiragne zahay naho fa mivory. Tsy mitake vola zahay naho fa ampanoegne fotoam-pivavahagne, ohatse, naho fa manao badisa, ndra mariaze, ndra fandevegnagne. Tsy mikarakara fandaharagne natao hipaliavam-bola zahay, ohatse, fivarotagne gatò ndra raha hafa, ndra fihisagne isan-karaza’e, ndra tombolà. Tsy mitake vola ndra amy ia ndra amy ia zahay. Tsy tognonegne ndra atao trea o ndatio ty agnara ze nanao fagnomezagne. (Matio 6:2-4) Tsy misy dokam-barotse ipaliavam-bola ty amo o tragnom-poraro’aio ao ndra amy ty boke naho ty gazete’ay.

 Rehafegne isam-bolagne amy ty fiangona ty Vavolombelo i Jehovah tsikiraidraike ty tatetse miomba ty konte i fiangonagney, naho fa mivory iareo. Arahegne maso tsy tapake ty konte ty fiangonagne tsikiraidraike mba hahatreavagne naho miasa soa ty vola fagnomezagne voarae’e.​—2 Korintianina 8:20, 21.

•   Boate hoahy ty fagnomezagne: Afake mandrotsake vola ndra seky ao rehe. Misy boate hoahy ty fagnomezagne ty amy i Anjomba i Fanjakagney naho ty Anjomba Fanoagne Havoriambey vaho ty toeragne hafa fivoria’ay ao.

•   Fagnomezagne atao amy Internet ao: Afake militse amy ty peje tihoe “Hanao Fagnomezagne Hoahy ty Vavolombelo i Jehovah” rehe, amy ty tane maro agne. Afake mandefa vola boake amy ty konte’o amy banke ao amy ty alala ty karatse fandoavam-bola rehe ndra amy ty alala ty Internet. b ‘Manokagne vola’ isam-bolagne ty Vavolombelogne ila’e, le alefa’e tsy tapake amy ty alala o fomba reo i volay.​—1 Korintianina 16:2.

•   Fomba hafa: Mila magnomagne mialoha rehe naho fa hanao ty karazam-pagnomezagne ila’e. Va’e mila mamantatse ty lalàna misy amy i toeragney eo ka rehe. Va’e hihegne ohatse, ty hetra aloa’o naho magnasoa fikambanagne ara-pivavahagne rehe. Maro ty nandrambe soa satria nanao fikarohagne soa hey, vao izay nanao karazam-pagnomezagne ila’e ndra fagnomezagne atao naho mbe velogne i ndatỳ ndra fagnomezagne fa voaomagne mialoha, le halefa naho fa mate i ndatỳ. Manorata ndra miantsoa ty birò ty sampa ty Vavolombelo i Jehovah amy ty toeragne misy azo, naho te hanao fagnomezagne misy ifandrambesa’e amy toa rehe:

  •   konte amy banke agne

  •   fiantohagne naho reterete

  •   tragno naho tane

  •   taratasy magnomey alalagne ze ho mpandova

 Naho tea’o ho fantatse tie inogne iaby ty fomba azo’o anoagne fagnomezagne amy ty tane misy azo, le henteo i tihoey “Hanao Fagnomezagne Hoahy ty Vavolombelo i Jehovah.”