Ze mifagnarake amy ty Baiboly avao ro eké’ay naho atao’ay. Agnisa izay retoagne:

•   Ara-dalàna tihoe malahelo naho fa misy longo mate. Nalahelo i mpiana i Jesosy rey naho fa nisy longo’e ndra nama’e nimate. (Jaona 11:33-35, 38; Asan’ny Apostoly 8:2; 9:39) Tsy manao havoriagne ndra fete areke zahay naho fa misy mate. (Mpitoriteny 3:1, 4; 7:1-4) Miarake ore amy ze nizoem-boigne zahay.​—Romanina 12:15.

•   Tsy mahafantatse ndra inogn’ino ty mate. Misy ty mino tie mahatsiaro tegna ty mate sady afake mitahy ndra magnisy raty ty ndaty velogne. Faie tsy mampianatse izay ty Baiboly, le tsy manao fombafomba mifandrambe amy izay zahay ndra inogn’ino ty fiavia’ay ndra ty kolontsai’ay. (Mpitoriteny 9:5, 6, 10) Agnisa izay ty manao ari-tory, manao mavokasote, manao havoriagne ndra manao sorogne hoahy ty mate, mirehake amy ty mate naho mangatake fitahiagne ama’e naho manao ty fombafomba takégne amy ty valy i ndaty nimatey ohatse manao remavoigne. Tsy manao o raha iaby reo zahay, satria mankatò i lily manao tihoey tie: “Miakara amy iareo ao ... sady le lia’e ko mitsapa ze malotò sasa.”​—2 Korintianina 6:17.

•   Mbe hovelomegne ty mate. Mirehake ty Baiboly fa mbe hitsangagne ty mate sady hofoagnagne ty fate. (Asan’ny Apostoly 24:15; Apokalypsy 21:4) Tsy manao raha tafahoatse areke zahay naho fa misy mate. Tsy nanao izay o Kristiana voaloha’e reo.​—1 Tesalonianina 4:13.

•   Mirehake ty Baiboly fa ilaegne ty miambane. (Ohabolana 11:2) Tsy fotoagne “fampideraderagne” fanagnagne areke ty fotoagne fandevegnagne naho ama’ay sady tsy fotoagne fagnamboneagne karazagne. (1 Jaona 2:16) Tsy manao fandevegnagne mangotrokotroke areke zahay mba hampifaleagne ndaty. Tsy mampamboatse hazo lafo vily ka zahay ndra manao akanjo misarike maso loatse.

•   Tsy foreseva’ay hagnorike ty raha inoa’ay ty hafa. Ty anto’e, “sambe hataon’Andrianagnahare ampamoake tikagne tsikiraidraike.” (Romanina 14:12.) Faie mikezake magnazava ty raha inoa’ay zahay naho fa misy magnontane sady atao’ay “am-pahalemem-pagnahy naho am-pagnajagne” naho fa manao izay.​—1 Petera 3:15.

 Toeragne: Naho mangatake ty hanoagne lahajakam-pandevegnagne i keleiagne zoem-boigney, le mete hatao amy i Anjomba i Fanjakagney agne zay ndra an-tragno’e agne ndra amy ty toeragne hagnoroagne i fatey ndra an-kibory ey.

 Lahajakam-pandevegnagne: Atao mba hampaherezagne i keleiagne zoem-boigney io. Hazavaegne amo o lahajaka io tie ino ty raha rehafe ty Baiboly miomba ty mate. (Jaona 11:25; Romanina 5:12; 2 Petera 3:13) Va’e horehafegne ka ty toetse soa i ndaty nimatey, lohotsie fa ty ohatse soa nimei’e tamy ireke nanompo an’Andrianagnahare.​—2 Samoela 1:17-27.

 Mete hisy hira hatao ka amo o fotoagne iohoe sady boake amy Baiboly ao ty hevetse rehafe i hiray. (Kolosianina 3:16) Ie naho fa vita iaby zay, le ho faragnagne amy ty vavake mampahery i fotoagney.​—Filipianina 4:6, 7.

 Raketse: Tsy mitake vola amy ty mpiara-mivavake ama’ay zahay naho fa manao fandevegnagne, agnisa izay ty lahajakam-pandevegnagne. Tsy mitake raketse ka zahay naho fa miarake mivory mba hianatse Baiboly.​—Matio 10:8.

 Mpagnatreke: Rambese’ay soa ze ndaty avy mba hitsanogne i lahajakam-pandevegnagne atao amy i Anjomba i Fanjakagney agne. Satria azo ze kila ndaty atrehegne io manahake ty fivoriagne hafa alami’ay avao ka.

 Anjara ty tsikiraidraike ty manapa-kevetse tie hagnatreke vao reke sa tsy hagnatreke. Miankigne amy ty feo ty fieretsereta’e fa nampiofàgne ty Baiboly zay. (1 Timoty 1:19) Faie tsy mandrambe anjara amy ty fombafomba ara-pivavahagne mifanohetse amy ty raha rehafe ty Baiboly zahay.​—2 Korintianina 6:14-17.