Aha’a. Kristiana o Vavolombelo i Jehovah-o sady mioregne amy ty Soratse Masigne ty raha inoa’e. Misy fivavahagne mirehake fa nao magnatanterake ty faminaniagne amy ty Soratse Masigne ao zao ty famoriagne o Jiosio ho a Palestina agne. Faie tsy mitovy hevetse amy izay ty Vavolombelo i Jehovah. Tsy mino iareo tie misy faminaniagne miomba izay ty amy Baiboly ao. Ty Soratse Masigne aza tsy manohagne o fitondran’olombelogneo sady tsy mirehake tie misy foko ndra firenena ambone noho ty hafa. Hoe ty Fitalakesan-davitse, gazete o Vavolombelo i Jehovah-o: “Tena tsy manohagne ty raha ara-politike atao o Jiosio ty Soratse Masigne.”

 Mirehake Ty Fangalan-kilala Britanika (angilé) fa hananganagne naho hanohagnagne ty fanjakagne jiosy a Palestina agne ty tanjo i raha atao ho fanohagnagne o Jiosioy. Sady raha ara-politike zane io ro ara-pivavahagne. Tsy agnisa ty fampianara ty Vavolombelo i Jehovah ty fanohagnagne o Jiosio sady tsy miomba ty atia naho ty aroa iareo naho io ro rehafegne.

 Fikambanagne ara-pivavahagne o Vavolombelo i Jehovah-o, le tsy manohagne raha ara-politike, agnisa izay ty fanohagnagne o Jiosio. Tena tsy manao politike o Vavolombelo i Jehovah-o sady maro ty porofo magnamaregne izay. Misy amy iareo zao enjehegne mafe amy ty tane ila’e agne noho ze anto’e zay. Mino iareo fa ty Fanjakàn’Andrianagnahare avao ro hinday fiadanagne maharetse ambone tane etoy. Tsy misy fitondran’olombelogne ndra raha ara-politike mahavita izay.

 Mankatò ty lalàna o fitondram-panjakagneo ty Vavolombelo i Jehovah ndra aia ndra aia ty misy aze. Tsy migoreve amo o fanjakagneo iareo sady tsy mandrambe anjara amy ty aly.