Naho ty heve’ay Vavolombelo i Jehovah, le ilaegne ty magnorike ty toro lalagne naho ty fitsipike amy Baiboly ao naho fa hanapa-kevetse. Mampifale an’Andrianagnahare sady mahasoa antikagne ty fanoagne izay. (Isaia 48:17, 18) Tsy izahay ty namorogne i toro lalagne naho i fitsipike rey, faie mikezake magnorike aze zahay. Iretoa ohatse misy toro lalagne hoahy ty ndaty miarake aloha ty fanambaliagne ndra mampiarake: a

•   Natao haharetse nainai’e o fanambaliagneo. (Matio 19:6) Lahibey ama’ay Vavolombelo i Jehovah areke ty fiarahagne aloha ty fanambaliagne satria dingagne aloha ty hidiragne amy i fanambaliagney io.

•   Ze ndaty ampe taogne hanambaly avao ro afake mampiarake. Toko’e fa ho losotse i fotoagne maha mafe ty fagniriagne te hila ndatỳ vaho izay ty ndaty raike mampiarake, ty dika izay fa tsy mafe sasa i fagniriagne te hila ndatỳ.​—1 Korintianina 7:36.

•   Ze ndaty mahazo manambaly avao ro afake mampiarake. Faie tsy ze nisarake ara-panambaliagne ara-dalàna ro mahazo manambaly indraike naho henteagne ty fitsipin’Andrianagnahare. Mirehake ty Baiboly fa tsy mahazo misarake amy ty vali’e ty ndaty raike, le manambaly indraike naho tsy tihoe fijangajangagne ty anto’e nisaraha’e tamy i vali’e talohay.​—Matio 19:9.

•   Mirehake ty Baiboly fa tsy toko’e hanambaly ankoatse ty mpiharo finoagne ama’e avao ty Kristiana te hanambaly. (1 Korintianina 7:39) Tsy tihoe naho fa magnaja ty fivavaha’ay ty ndaty raike, le ho hevere’ay tie mpiharo finoagne ama’ay zay. Toko’e ho Vavolombelo i Jehovah vita badisa reke sady magneke naho mampihatse ty toro lala ty Baiboly. (2 Korintianina 6:14) Fa ela ty Andrianagnahare ro nandily ty mpanompo’e mba tsy hanambaly ankoatse ty mpiharo finoagne ama’e. (Genesisy 24:3; Malakia 2:11) Ndra o manam-pahaiagneo aza mahatrea fa mahasoa ty magnorike o fitsipike iohoe. b

•   Toko’e hankatò rae aman-drene o ajajao. (Ohabolana 1:8; Kolosianina 3:20) Ze ajaja mbe miharo toboke amy ty rae aman-drene’e ro tena mila manao izay. Toko’e hankatò ohatse reke naho fa mirehake ty rae aman-drene’e tie naho fa fire taogne reke ro mahazo mampiarake sady ino ty raha azo’e atao naho ty raha tsy azo’e atao naho fa mampiarake.

•   Naho fa henteagne ty Soratse Masigne, le anjara ty Vavolombelogne tsikiraidraike ty manapa-kevetse tie hampiarake vao reke sa tsy hampiarake, le ia ty hiaraha’e. Rehafegne ao tie: ‘Sambe hinday ty enta’e iaby ty tsikiraidraike.’ (Galatianina 6:5) Ndra tie eo zay, hendre ty ankamaroa ty Vavolombelo i Jehovah, le mipay hevetse amy ty Kristiana hafa trea’e tie matotse naho mahafantatse ze hahasoa aze.​—Ohabolana 1:5.

•   Maro ty raha fanoe o ndatio naho fa mampiarake faie fahotagne lahibey ty ila’e amy i raha rey. Mirehake ohatse ty Baiboly fa raty ty mijangajanga. Tsy ze mila ty ndaty tsy vali’e avao ro atao tihoe mijangajanga, fa ze manao raha vetaveta amy i ndatỳ ka, ohatse, manafosafo ty mahalahilahy ndra ty mahampela aze ndra manao ty karazam-pilàgne tsy fatao, ohatse amy ty vava ndra amy ty lavam-piambesaragne. (1 Korintianina 6:9-11) Misy ka ty manao raha hafa manaitaitse ty filà ty nofotse ndra tie tsy mifampila aza. Fa “fahalotoagne” zay le heje i Jehovah. (Galatianina 5:19-21) Tsy tea’e ka ty “rehake vetaveta.”​—Kolosianina 3:8.

•   Mamitake o fò. (Jeremia 17:9) Va’e hahavy ty ndaty raike hanao ty raha fa fanta’e tie raty io. Ino areke ty azo ty ndaty raike mampiarake atao mba tsy ho avy amy izay? Tsy toko’e hiarake irerike amy ty toeragne va’e hahavy aze ho rese ty tsapa-hevetse iareo. Soa naho miarake amy ty ndaty raike ndra maromaro iareo fa tsy mitokatokagne. (Ohabolana 28:26) Mahiratse ka ty Kristiana tsy manambaly naho tsy mipay valy amy Internet ao. Fanta’e fa va’e hahatrea loza reke, lohotsie naho ndaty tsy fanta’e soa ty mifandrambe ama’e ao.​—Salamo 26:4.