Aha’a. Tsy manohetse ty fanoagne o vaksinio ty Vavolombelo i Jehovah. Naho ty heve’ay, le fanapahan-keve ty Kristiana tsikiraidraike ty hatao vaksiny ndra tsy hatao. Maro aza ty Vavolombelo i Jehovah nijobogne ty hatao vaksiny.

 Mipay fitsaboagne mete soa zahay sady ankasitraha’ay ty fandrosoa o fitsaboagneo mba hialiagne amo o aretegne sarotse sitragnegne rey. Isaora’ay ka ty asa mafe atao o dokoterao, lohotsie fa amo ze fotoagne isia ty krizy zao.

 Miara-miasa amo o mpikarakara ty fahasalamagneo ty Vavolombelo i Jehovah. Nanomboke tamy ty niparitaha ty COVID-19 ohatse, le nagnomey faniahiagne tsy tapake tamy ty alala ty tragnom-poraro’ay toy amy ty firehake an-jato’e ty Vavolombelo i Jehovah mba handrisihagne o ndatio hagnorike ty fepetse miomba ty fiarovan-tegna. Agnisa izay ty fagnajagne elagnelagne naho ty fepetse miomba ty fivoriagne atao ty ndaty maro, ty figobognagne, ty fanasan-tagnagne, ty fagnisiagne aro vava naho orogne, vaho ty raha hafa také o manam-pahafegneo.​—Romanina 13:1, 2.

 Fa am-polo tao’e maro ty Vavolombelo i Jehovah ro nampisongadigne ty toro lalagne magnarake retoa:

•   Ty tsikiraidraike ro mijobogne ze fitsaboagne tea’e horihegne.​—Galatianina 6:5.

   “Tsy mandrisike ndra ia ndra ia hagnorike fomba fitsaboagne manokagne ty gazete toy. Ty hampahafantatse ty raha misy avao ty tanjo’e, fa anjara ty tsikiraidraike ty manapan-kevetse amy ze fitsaboagne tea’e horihegne.”​—Mifohaza!, 8 Fevrie 1987 (angilé).

   “Ty tsikiraidraike ro manapan-kevetse tie hatao vaksiny vao reke naho ty keleia’e sa tsy hatao.”​—Mifohaza!, 22 Aogositra 1965 (angilé).

•   Mamonje dokotera zahay naho fa marare satria tena sarobily ama’ay o aigneo.​—Asan’ny Apostoly 17:28.

   “Mamonje dokotera manam-pahaiagne manokagne miomba ty aretegne raike o Vavolombelo i Jehovah-o naho ilaegne ty manao izay. Sarobily amy iareo ty fiay iareo, le atao iareo ze fitsaboagne hahalava andro iaignagne iareo naho mbe tsy mifanohetse amy ty raha rehafe ty Soratse Masigne.”​—Fitalakesan-davitse, 1 Jolay 1975 (angilé).

   “Eké o Vavolombelo i Jehovah-o ty fitsaboagne naho ty fagnafoly meagne iareo. Ty anto’e, te ho salama soa avao iareo sady te ho ela velogne ka. Dokotera, manahake i Lioka, i Kristiana tamy ty taonjato voaloha’ey aza ty ila’e amy iareo. ... Tena ankasitraha ty Vavolombelo i Jehovah ty asa mafe naho ty fahafoezan-tegna o dokoterao. Mahafale iareo ka ty magneke ty fitsaboagne mea o dokoterao.”​—Fitalakesan-davitse, 1 Febroary 2011 (malagasy).