Afake Miala Tsy ho Vavolombelo i Jehovah Sasa vao ty Ndaty Raike?

MANDEFA

Eka. Misy fomba roe azo ty ndaty raike atao naho te hiala tsy ho agnisa ty fandamina’ay reke.

Mametram-pialagne. Azo’e atao am-bava zay ndra an-tsoratse mba hampahafantara’e tie tsy te ho agnisa ty Vavolombelo i Jehovah sasa reke.
Aseho’e amy ty raha atao’e. Azo’e atoro amy ty raha atao’e tie tsy te ho agnisa ty Vavolombelo i Jehovah sasa reke. (1 Petera 5:9) Azo’e atao, ohatse, ty mivavake amy ty fivavahagne hafa agne sady manao raha ampisehoagne tie fa agnisa o fivavahagne iohoe reke.—1 Jaona 2:19.

Akore naho misy ndaty raike fa tsy mitory ndra magnatreke ty fivoria’areo sasa, niala an-tsitrapo tsy ho agnisa ty mpivavake ama’areo ao vao ty fihevera’areo aze?

Aha’a. Tsy hoe izay ty fihevera’ay aze. Tsy mitovy tihoe niala an-tsitrapo naho tihoe nanjare naleme finoagne. Mateteke tsy tihoe niova finoagne ty ndaty raike tsy nitory ndra tsy nivory sasa fa misy raha mahakivy aze ndra mahaore mafe aze. Tsy tihoe aria’ay ty ndaty hoe irey fa mikezake zahay mba hampahery naho hanohagne iareo. (1 Tesalonianina 5:14; Joda 22) Naho mipay fagnampeagne i ndatỳ, le manao raha o androanavi-pagnahy amo o fiangonagneo eò mba hagnampeagne aze hatanjake ara-pagnahy indraike.—Galatianina 6:1; 1 Petera 5:1-3.

Faie tsy managne fahefagne hamoresé ndaty raike hijanogne ho Vavolombelo i Jehovah o androanavi-pagnahio. Anjara ty tsikiraidraike ty mijobogne ze fivavahagne tea’e horihegne. (Josoa 24:15) Mieke zahay tie ze ndaty manompo an’Andrianagnahare, le tsy maintsy manao izay an-tsitrapo naho vokatse ty fo.—Salamo 110:3; Matio 22:37.