Aha’a. Mifanohetse amy izay aza ty atao’ay. Ty raha inoa’ay ro ovà’ay naho fa trea’ay tie tsy mifagnarake soa amy ze raha rehafe ty Baiboly.

 Tamy 1950 zahay ro nanomboke nampiboake Ny Soratra Masina​—Fandikan-tenin’ny Tontolo Vaovao tamy ty rehake angilé. Faie fa ela bey tafara atoy zahay vaho izay nandineke soa ze raha rehafe ty Baiboly. Nampiasae’ay iaby ze fandikan-drehake nisy sady nampifagnorihe’ay tamy ze raha nitrea’ay tamy irey ao ty raha ninoa’ay. Iretoa ohatse ty raha ninoa’ay Vavolombelo i Jehovah hatrake amy izay, faie ndraleo irehe ro mandineke tie mifagnarake amy ze raha ampianare ty Baiboly vao o raha reo sa tsy mifagnarake.

1.   Ty raha inoa’ay: Tsy telo miharo raike ty Andrianagnahare. Hoe ty Fitalakesan-davitse Ziona, Jolay 1882 (angilé): “Fanta o mpamaki’aio fa naho mino i Jehovah naho i Jesosy vaho i fagnahy masigney zahay, le liere’ay ty fampianaragne tsy mifagnarake amy ty Baiboly rehafegne tie misy ty Andrianagnahare telo mahaforogne persona raike, ndra misy fotoagne ka rehafegne tihoe Andrianagnahare raike misy persona telo.”

     Ty raha rehafe ty Baiboly: “I Jehovah Andrianagnahare tikagne, le i Jehovah raike avao.” (Deoteronomia 6:4, Fandikan-tenin’ny Tontolo Vaovao) “F’ie aman-tika, raike t’i Andrianañahare, Rae niboaha’ ze he’e naho iveloman-tikañey; Raike ka i TALÈ IESOÀ Norizañey–kila naoreñe añama’e, añama’e ka ty havelon-tika.” (1 Korintianina 8:6, Fandikan-drehake Katolika) Ty vatantegna i Jesosy ro nirehake tihoe: “Bey te amako t’i Raeko.”​—Jaona 14:28, Kat.

2.   Ty raha inoa’ay: Tsy hampijalégne nainai’e agn’afo bey agne o ndatio. Nalaegne boake amy Romanina 6:23 ao, tamy ty Dikan-dreha i Mpanjaka Jacques (angilé), ty lohan-dreha ty Fitalakesan-davitse Ziona Jona 1882 manao tihoe: “Fate ty Voka i Otay.” Voarehake amo o gazete io ao fa “tsotra sady mazava o rehake reo. Faie mahagaga fa maro amy ty ndaty mirehake fa mino o Baibolio tie Saontsin’Andrianagnahare ty mbe mizizo mafe avao tie fampijaléjaléagne nainai’e ty saze ze manota. Rehafe’e tie nao zao izay ty ampianare ty Baiboly.”

     Ty raha rehafe ty Baiboly: Tsy fampijaleagne nainai’e ty mandigne ze ndaty manohetse an’Andrianagnahare fa “fandringanagne nainai’e.”​—2 Tesalonianina 1:9, TV.

3.   Ty raha inoa’ay: Tena fitondram-panjakagne i Fanjakàn’Andrianagnaharey fa tsy tihoe am-po ao avao. Hoe ty Fitalakesan-davitse Ziona Desambra 1881, miomba ty Fanjakàn’Andrianagnahare: “Ho rava ze fanjakagne iaby an-tane eto, naho vaho mioregne o fanjakagne iohoe.”

     Ty raha rehafe ty Baiboly: “Ie añandro i mpanjaka rey, le hampitroatse fifeheañe tsy ho mengoke nainai’e t’i Andrianañaharen-dikereñe, le tsy ho limbezam-pifokoa’ ondaty i fifeheañe zay, f’ie fonga ho demohe’e naho habotse’e o fifeheañeo, vaho ie ty hijadoñe nainai’e.”​—Daniela 2:44, Kat.

 Aha’a. Mbe mampiasa fandikan-drehake maro hafa zahay naho fa mitory naho mampianatse. Afake mahazo Fandikan-tenin’ny Tontolo Vaovao maimaim-poagne o ndatio satria natao’ay hampianaragne Baiboly maimaim-poagne io. Faie naho fa mampianatse zahay, le tsy mampagninogne anay ka naho te hampiasa Baiboly hafa i ndaty irehafa’aỳ.