Magnorike ty toroheve ty Baiboly zahay Vavolombelo i Jehovah, le tsy voatere mamale isake tie misy magnaraty naho mitsikike anay. Mirehake, ohatse, ty Baiboly tie: “Magnafa-baraka ty tegna’e ze ndaty magnitsy ze mpagnaratiraty.” (Ohabolana 9:7, 8; 26:4) Ty mampifale an’Andrianagnahare ty tena tea’ay, le aleo’ay mifantoke amy izay toy izay minekoneko loatse miomba ty fagnaratiratiagne anay, le hanjare hifamale amo o ndatio.​—Salamo 119:69.

 Tena maregne i rehake tihoey “misy andro itsignagne le misy irehafagne.” (Mpitoriteny 3:7) Mamale ty fagnontenea o ndaty te hahafantatse ty maregneo zahay, fa tsy mizilike amy ty aly hevetse tsy misy dika’e. Magnorike ty fampianaragne naho ty modely nengà i Jesosy naho o Kristiana voaloha’eo zahay naho fa manao izay.

•   Jesosy: Tsy namale reke naho fa nisy nagnaratiraty aze ty tagnatreha i Pilato teo. (Matio 27:11-14; 1 Petera 2:21-23) Nitsìgne ka reke naho fa nisy nagnaratiraty tie ndaty mamo lava naho tea hanegne. Nengà’e hahatrea ze raha natao’e o ndatio, le iareo avao ro hahatrea tie maregne vao sa tsy maregne i fagnaratiagne aze rey. Nagnorike ty toro lalagne toy reke: “Faie ty fahendrea o ndatio hamarene ty raha atao’e.” (Matio 11:19) Nisy fotoagne reke tsy nisalasala namale i ndaty nagnaratiraty aze rey naho fa nilaegne ty nanao izay.​—Matio 15:1-3; Marka 3:22-30.

   Nampianatse i mpiana’e rey ty Jesosy tie tsy toko’e ho kivy iareo naho fa misy magnaratiraty. Hoe reke: “Sambatse nareo naho teraterae o ndaty naho enjehe’e vaho amorogna’e vande, le rehafe’e tie nanao ze hene raha raty noho ty amako.” (Matio 5:11, 12) Faie nirehake ka reke tie ho afake hitory o mpiana’eo naho fa miseho ze raha zay. Hotanterahe’e i fampitamà’e manao tihoekey amy izay tie: ‘Hagnomey anareo vava naho fahendreagne tsy hay o fahavalò resegne naho toheregne raho.’​—Lioka 21:12-15.

•   Apostoly Paoly: Nanoro hevetse o Kristianao reke tie tsy toko’e hialy hevetse tsy misy anto’e amo o mpanohetseo iareo. Nirehake reke fa “sady tsy mahasoa zay ro tsisy dika’e.”​—Titosy 3:9; Romanina 16:17, 18.

•   Apostoly Petera: Nandrisike o Kristianao reke tie toko’e hiaro ty finoa’e iareo naho fa mete ty hanoagne izay. (1 Petera 3:15) Faie nagneke reke tie mateteke ro soa naho ty raha ataontikagne ro iarovantikagne ty finoantikagne fa tsy ty raha rehafentikagne. Hoe reke: ‘Manoa ty soa mba hampintsignagne ty vava ty ndaty tsy misaigne.’​—1 Petera 2:12-15.