Tsy manao politike o Vavolombelo i Jehovah-o noho ty anto’e rehafe ty Baiboly. Tsy mandrese lahatse ty mpitondra fanjakagne mba hagnorike foto-kevetse ila’e zahay ndra mandrambe anjara amy ty hetseke hagnovagne o fanjakagneo. Tsy mifily kandidà ndra manohagne antoko politike ka zahay sady tsy mirotsake ho filiegne. Misy anto’e marem-pototse boake amy Baiboly ao ty mahavy anay tsy manao ireo.

•   Magnorike ty modely nengà i Jesosy zahay. Tsy nagneke homeagne toeragne amy i fitondragney teo reke. (Jaona 6:15) Nampianatse o mpiana’eo reke tie “tsy agnisa ty tontolo toy” iareo. Naseho’e mazava soa fa tsy toko’e hanohagne antoko politike iareo.​—Jaona 17:14, 16; 18:36; Marka 12:13-17.

•   Tsy mivalike amy ty Fanjakàn’Andrianagnahare zahay. Hoe ty Jesosy: “Hotoriegne magneran-tane ty talily soa i Fanjakagney toy.” (Matio 24:14) Misolo-tegna i Fanjakàn’Andrianagnaharey zahay sady nirahegne mba hagnambara tie ho avy o fanjakagne iohoe. Noho ze anto’e zay, le tsy militse amy ty raharaha ara-politike zahay ndra aia ndra aia ty firenena misy anay.​—2 Korintianina 5:20; Efesianina 6:20.

•   Noho izahay tsy manao politike, le tsy misalasala mirehake ty Fanjakàn’Andrianagnahare amy ty ndaty managne ty hevetse ara-politike sambe hafa. Kezahe’ay atoro amy ty raha atao’ay naho rehafe’ay tie matoky zahay fa ty Fanjakàn’Andrianagnahare ty tamae’ay hamaha ty olagne magneran-tane.​—Salamo 56:11.

•   Miharo saigne manahake ty mpirahalahy ty Vavolombelo i Jehovah magneran-tane fa tsy voazarazara o politikeo. ( Kolosianina 3:14; 1 Petera 2:17) Manao politike ty fivavahagne ila’e, hafara’e tsy miharo saigne ty mpivavake ama’e ao.​—1 Korintianina 1:10.

 Magnaja ty fitondram-panjakagne zahay. Magnaja ty manam-pahefàgne amy ty tane misy anay zahay ndra tie tsy manao politike aza. Mifagnarake amy ty lily amy Baiboly ao toy zay: “Soa naho tsy mandietse ze manam-pahefàgne o ndatio iaby.” (Romanina 13:1) Mankatò lalàna naho mandoa hetra zahay sady miara-miasa amy ty fitondram-panjakagne mba hahasoa o ndatio. Tsy mandrambe anjara amy ty fagnonganan-panjakagne zahay. Orihe’ay ka ty toroheve ty Baiboly “mba hivavake hoahy o mpanjakao vaho hoahy ze managne toeragne ambone.” Mivavake hoahy iareo zahay, lohotsie naho va’e hisy voka’e amy ty fahafaha ty ndaty hifily ty fivavaha’e ty fanapahan-kevetse horambese iareo.​—1 Timoty 2:1, 2.

 Hajae’ay ka ty zo o ndatio hanagne ty safidi’e amy ty raha ara-politike. Tsy magnakorontagne o fifidianagneo ohatse zahay, sady tsy manakatsakagne ze manapa-kevetse ty hifily.

 Vaho izao vao ro misy ndaty tsy militse amy ty raharaha ara-politike? Aha’a. Tsy nizilike tamy ty raha natao o fitondragneo ka i apostoly rey naho ty Kristiana ila’e tamy ty taonjato voaloha’e. Hoe ty boke tihoe Tsy Tihoe te Hanao ty Soa Avao (angilé): ‘Nagneke o Kristiana voaloha’eo tie tsy maintsy hajaegne o mpitondra fanjakagneo, faie tsy nagneke hanao politike iareo.’ Mirehake ka ty boke Mandeha ho amy ty Fandrosoagne (angilé) fa “tsy nimete nitagne toeragne amo o politikeo” o Kristiana voaloha’eo.

 Va’e hisy korontagne vao ty amo o firene’aio eo noho izahay tsy manao politike? Aha’a. Ndaty tea filaminagne zahay, le tsisy anto’e toko’e hatahora o mpitondrao anay. Dineho moa ty tatetse natao ty Akademia Iokreniana Miomba ty Siansa tamy 2001 toy. Izao ty voarehake tao: ‘Va’e tsy ho tea ty ndaty ila’e amy hinane zao i tihoey tie tsy manao politike o Vavolombelo i Jehovah-o. Izay avao ka ty anto’e nagnamelohagne iareo tambane ty fitondragne Nazia naho ty fitondragne kominista.’ Voarehake tao ka fa ndra tie nampijalé o Sovietikao aza iareo, le “mbe nankatò lalàna avao. Niasa mafe naho nanao ty maregne iareo tamy ty toeragne famboleagne naho fitezagne biby iharoagne naho tamy ty orinasa [nitantane o fanjakagneo]. Tsy natahoragne hagnongagne ty fitondragne kominista iareo.” Nirehake i tatetsey tamy ty fara’e tie “tsy magnoho-doza ty filaminagne naho ty firaisan-tsay o firenenao” ka tie amy izao ty raha inoa ty Vavolombelo i Jehovah naho ty asa atao’e.