Heve-diso: Tsy mino o Vavolombelo i Jehovah-o tie afake magnasitragne o fagnafolio ndra o dokoterao.

 Ty maregne: Mipay ze fitsaboagne fara izay ty soa zahay mba hikarakaragne anay naho ty keleia’ay. Mamonje dokotera zahay naho fa marare. Dokotera mahay mitsabo naho mahay mandrasa faie tsy mampiasa lio ty paliave’ay. Fale zahay fa mandroso bey ty fitsaboagne amy hinane zao, le tsy ty Vavolombelo i Jehovah avao ty mandrambe soa boake amy ty fitsaboagne tsy ampiasagne lio fa ty ndaty hafa ka. Afake misoroke ty voka-draty ty fampidiragne lio hinane zao ty ndaty marare amy ty firenena maro agne. Ty anto’e, va’e hinday aretegne o liò. Va’e tsy hiasa soa ka o hery fiarovagneo, le mete hisy fahadisoagne hatao o dokoterao amy ty karazan-dio ila’e.

 Heve-diso: Mino o Vavolombelo i Jehovah-o fa naho fa managne finoagne avao i mararey, le ho sitragne i aretegney.

 Ty maregne: Tsy manao fagnasitragnagne amy ty alala ty finoagne zahay.

 Heve-diso: Lafo loatse ty fitsaboagne tsy ampiasagne lio.

 Ty maregne: Mora ty fitsaboagne tsy ampiasagne lio.

 Heve-diso: Maro ty Vavolombelo i Jehovah mate isan-taogne, satria tsy nagneke hampidiragne lio. Ajaja ty ila’e amy iareo.

 Ty maregne: Tsy maregne zay. Maro ty dokotera mpandrasa fa zatse tsy mampiasa lio naho fa manao fandrasagne tena sarotse, ohatse mandrasa fo, taolan-dambosigne, ndra mamindra taova. a Mete soa manahake o ndaty ampidiragne liò sady mora sitragne naho ampitahaegne amy irey i marare tsy ampidiragne lio rey agnisa izay ty ajaja. Tsy misy afake mirehake tie tsy maintsy ho mate ty ndaty raike naho fa tsy magneke hampidiragne lio ndra ho velogne reke naho fa manao izay.

 Anto’e ara-pivavahagne ty mahavy iareo tsy magneke hampidiragne lio, fa tsy anto’e ara-pitsaboagne. Ndra ty Testamenta Taloha ndra ty Testamenta Vaovao, le sambe mandrara fa toko’e hofaliegne o liò. (Genesisy 9:4; Levitikosy 17:10; Deoteronomia 12:23; Asan’ny Apostoly 15:28, 29) Aigne ka o liò naho aman’Andrianagnahare. (Levitikosy 17:14) Tsy magneke hampidiragne lio areke zahay satria te hankatò an’Andrianagnahare sady magneke zahay fa ireke ro Mpagnomey ty aigne.

 Taloha o dokoterao nieretseretse fa ho azon-doza ndra mamono tegna ty ndaty raike naho tsy magneke hampidiragne lio fa mipay fitsaboagne hafa. Faie niova iareo tato ho ato. Izao ohatse ty nirehafe ty gazete raike miomba ty fitsaboagne tamy 2004: “Maro amy i teknike nampiasaegne hitsaboagne o Vavolombelo i Jehovah-o rey ro nanjare fitsaboagne mahazatse amo o taogne ho avy reo.” Mirehake ka ty lahatsoratse raike amy ty gazeteboke Fo Naho Rabo Vaho ty Fandehana o Liò (angilé), tamy 2010, fa “tsy tihoe naho fa mandrasa VJ [ndra Vavolombelo i Jehovah] avao o dokoterao ro ‘tsy hampiasa lio’ fa toko’e ho izay avao ty ho fahazara’e naho fa mandrasa.”

 Dokotera agn’arivo’e magneran-tane zao ty tsy mampiditse lio naho fa manao fandrasagne sarotse. Misy teknike ampiasae’e mba ho tsy ampe avao ty lio montso. Fa ampiasaegne amy ty tane mahantra agne ka i fitsaboagne solo ty fampidiragne lio rey, sady ndra ty ndaty tsy Vavolombelo i Jehovah aza mitake i raha rey.