Mikezake magnorike i Fivavahagne Kristiana naore i Jesosỳ naho i norihe i apostoly reỳ zahay Vavolombelo i Jehovah. Hirehake fohefohe ty raha inoa’ay ty lahatsoratse toy.

1.   Andrianagnahare. Mivavake amy i tena Andrianagnaharey zahay. Ireke ro Andrianagnahare Fara’e Mahery naho Mpamorogne ze kila raha. I Jehovah ty tahina’e. (Salamo 83:18; Apokalypsy 4:11) Ireke ro Andrianagnahare i Abrahama naho i Mosesy vaho i Jesosy.​—Eksodosy 3:6; 32:11; Jaona 20:17.

2.   Baiboly. Mino zahay fa Saontsin’Andrianagnahare, sady natao’e hoahy o ndatio io. (Jaona 17:17; 2 Timoty 3:16) Boake amy i boke 66 amy Baiboly ao rey ty raha inoa’ay, ty dika izay boake amy i ‘Testamenta Talohay’ ao naho amy i ‘Testamenta Vaovaoy’ ao. Nirehake hoe izao miomba anay ty Jason BeDuhn, mpampianatse miomba ty fivavahagne: “Tsy ty hevetse masake an-tsai’e ao ty tamae’e hotrea’e amy Baiboly ao, fa tena i Baibolỳ ro fototse ioregna ty raha inoa’e naho ty raha atao’e.” a

    Maregne fa mino i Baibolỳ iaby zahay, faie tsy rambese’ay ara-bakiteny iaby ze hene raha voasoratse ao. Eké’ay fa misy rehake agn’ohatse ty ao.

3.   Jesosy. Magnorike ty fampianara naho ty modely nimey i Jesosy zahay. Magneke zahay tie Mpamonje reke sady Anan’Andrianagnahare. (Matio 20:28; Asan’ny Apostoly 5:31) Kristiana areke zahay. (Asan’ny Apostoly 11:26) Faie nianara’ay amy Baiboly ao ka fa tsy i Jesosy ro Andrianagnahare Fara’e Mahery, sady tsy maregne i fampianaragne tihoey tie telo miharo raike ty Andrianagnahare.​—Jaona 14:28.

4.   Ty Fanjakàn’Andrianagnahare. Tena fitondram-panjakagne an-dagnitse agne io fa tsy raha am-po o Kristianao ao avao. Io ty hisolo o fitondran’olombelogneo, sady hagnatanterake ty raha safirien’Andrianagnahare miomba ty tane toy. (Daniela 2:44; Matio 6:9, 10) Tsy ho ela io le hiseho, satria trea boake amy i faminaniagne amy Baiboly ao rey fa “andro fara’e” zao.​—2 Timoty 3:1-5; Matio 24:3-14.

    I Jesosy ty Mpanjaka i Fanjakàn’Andrianagnaharey. Fa nanomboke nanjaka reke tamy 1914.​—Apokalypsy 11:15.

5.   Famonjeagne. Nanao sorogne ty fiai’e ty Jesosy mba hamonjeagne antikagne amy ty ota naho ty fate. (Matio 20:28; Asan’ny Apostoly 4:12) Tsy maintsy maneho finoagne i Jesosy ze ndaty te handrambe soa boake amo o sorogne iohoe. Tsy maintsy magnova ty fiaigna’e ka iareo sady atao badisa. (Matio 28:19, 20; Jaona 3:16; Asan’ny Apostoly 3:19, 20) Ty raha atao i ndatỳ ro ahatreavagne tie manam-pinoagne vata’e vao reke sa tsy managne. (Jakoba 2:24, 26) Faie tsy valesoa homeigne aze noho ty raha soa natao’e tihoe famonjeagne. Hahazo io reke noho “ty hasoa fagnahy tsy misy hoe’e nasehon’Andrianagnahare.”​—Galatianina 2:16, 21.

6.   I lagnitsey. An-dagnitse agne ty Jehovah ro miambesatse. Agne ka ty ipetraha i Jesosy naho i anjely tsy mivalike rey. b (Salamo 103:19-21; Asan’ny Apostoly 7:55) Hisy ndaty tsy ampe miiake 144 000 hovelomegne ho an-dagnitse agne mba hiarake manjaka amy i Jesosy.​—Daniela 7:27; 2 Timoty 2:12; Apokalypsy 5:9, 10; 14:1, 3.

7.   Ty tane toy. Namboaren’Andrianagnahare mba hitoboha o ndatio nainai’e ty tane toy. (Salamo 104:5; 115:16; Mpitoriteny 1:4) Hova’e ho paradisa ty tane toy, sady hatobo’e ao ze ndaty mankatò aze. Ho salama soa naho ho voririke iareo sady tsy ho mate sasa.​—Salamo 37:11, 34.

8.   O haratiagneo naho o fijaleagneo. Nanjare nisy haratiagne naho fijaleagne naho fa nigoreve ty raike tamy i anjelin’Andrianagnahare rey. (Jaona 8:44) Nitarike i mpivaly voaloha’ey higoreve ka o anjely iohoe, sady ninday loza hoahy o ndatio zay. Natao tihoe “Satana” naho “Devoly”, o anjely iohoe naho fa tafara tatoy. (Genesisy 3:1-6; Romanina 5:12) Nisy fagnonteneagne niboake naho fa nigoreve ty Satana. Nengàn’Andrianagnahare hisy areke o haratiagneo naho o fijaleagneo mba hamaleagne izay. Faie tsy hienga antika hijale nainai’e reke.

9.   O fateo. Tsy misy sasa ty ndaty raike naho fa mate. (Salamo 146:4; Mpitoriteny 9:5, 10) Tsy mijalejale agn’afo bey ao ka reke.

    Hamelogne ty mate ty Andrianagnahare sady agn’arivo’e tapetrisa ty hovelome’e. (Asan’ny Apostoly 24:15) Hampianaregne ty miomba an’Andrianagnahare iareo naho fa afara izay. Hovonovonoegne ze tsy magneke hanao izay, sady tsy hovelomegne sasa.​—Apokalypsy 20:14, 15.

10.   O keleiagneo. Magnorike i fitsipin’Andrianagnahare tam-boaloha’e agne miomba ty fanambaliagney zahay. Lahilahy raike naho ampela raike ty nataon’Andrianagnahare ho mpivaly. Tsy mahazo misarake iareo naho tsy tihoe mijangajanga i raikey. (Matio 19:4-9) Rese lahatse ka zahay fa sambatse o keleiagneo naho fa magnorike ty toro lala ty Baiboly.​—Efesianina 5:22-6:1.

11.   Ty fivavaha’ay. Tsy magnamasigne lakroa ndra sare masigne zahay. (Deoteronomia 4:15-19; 1 Jaona 5:21) Iretoagne iaby ty atao’ay amy ty fivavaha’ay ao:

    •   Mivavake aman’Andrianagnahare.​—Filipianina 4:6.

    •   Mamaky naho mianatse Baiboly.​—Salamo 1:1-3.

    •   Misaintsaigne ze nianara’ay tamy Baiboly tao zahay.​—Salamo 77:12.

    •   Miarake mivory zahay mba hivavake, hianatse Baiboly, hihira, hirehake miomba an’Andrianagnahare, sady hampahery o mpiara-mivavake ama’aio naho ty ndaty hafa.​—Kolosianina 3:16; Hebreo 10:23-25.

    •   Mitory i “talily soa i fanjakagneỳ.”​—Matio 24:14.

    •   Magnampe ty hafa.​—Jakoba 2:14-17.

    •   Magnoregne naho mikojakoja Anjomba i Fanjakagney ndra raha hafa ampiasaegne amy ty asa fampianaragne Baiboly atao’ay magneran-tane.​—Salamo 127:1.

    •   Magnampe ze niazom-boigne.​—Asan’ny Apostoly 11:27-30.

12.   Ty fikambana’ay. Mizara ho fiangonagne maromaro zahay. Lahilahy tsy ampe atao tihoe androanavi-pagnahy ty miandraikitse ty fiangonagne tsikiraidraike. Faie tsy mpitarike fivavahagne o lahilahy reo sady tsy karamaegne. (Matio 10:8; 23:8) Tsy mitake ampahafolon-karena ka zahay sady tsy mitate raketse. (2 Korintianina 9:7) Fagnomezagne boake amy ty ndaty tsy manognogne agnaragne ro anohagnagne ty asa atao’ay iaby.

     Kristiana matotse tsy ampe amy ty foibei’ay a Etazonia agne ro magnomey tari-dalagne ho anay Vavolombelo i Jehovah magneran-tane. Atao tihoe Filan-keve-pitantanagne o Kristiana reo.​—Matio 24:45.

13.   Miharo saigne zahay. Mitovy iaby ty raha inoa’ay Vavolombelo i Jehovah magneran-tane. (1 Korintianina 1:10) Mikezake mafe ka zahay mba tsy hifagnavakavake, ndra eo amy ty tsy fitoviagne zay, ndra foko, ndra firenena. (Asan’ny Apostoly 10:34, 35; Jakoba 2:4) Faie sambe managne ty safidi’e zahay ndra tie miharo saigne aza. Afake manao ze tea’e ohatse, ty Vavolombelo i Jehovah raike naho mbe mete amy ty feo ty fieretsereta’e i raha tea’e hataoy, sady mifagnarake amy ty toro lala ty Baiboly.​—Romanina 14:1-4; Hebreo 5:14.

14.   Ty fomba fiaigna’ay. Mikezake mafe tsy ho tea tegna zahay fa ho tea ty mpiharo tanàgne ama’ay. Aseho’ay amy ze kila raha atao’ay zay. (Jaona 13:34, 35) Tsy manao ze raha tsy tean’Andrianagnahare zahay, agnisa izay ty fampidiragne lio. (Asan’ny Apostoly 15:28, 29; Galatianina 5:19-21) Tea filongoagne zahay sady tsy mandrambe anjara amy ty aly. (Matio 5:9; Isaia 2:4) Magnaja o fitondram-panjakagneo zahay sady mankatò ty lalàna apetra’e naho mbe tsy mifanohetse amy ty lalàn’Andrianagnahare zay.​—Matio 22:21; Asan’ny Apostoly 5:29.

15.   Ty fifandrambesa’ay amy ty hafa. Nandily ze mpiana’e hoe izao ty Jesosy: “Teào manahake ty vata’o ty ragne’o.” Nirehake ka reke fa “tsy agnisa ty tontolo toy” ty Kristiana. (Matio 22:39; Jaona 17:16) Mikezake mba ‘hanao soa amy ze kila ndaty’ areke zahay, faie tsy manao politike sady tsy mifandrambe amy ty fivavahagne hafa. (Galatianina 6:10; 2 Korintianina 6:14) Faie magnaja ty safidy atao ty hafa miomba ireo zahay.​—Romanina 14:12.

 Naho managne fagnonteneagne miomba ty raha inoa’ay Vavolombelo i Jehovah rehe, le afake manoratse ama’ay, ndra magnatreke ty fivoria’ay amy ty Anjomba i Fanjakagney marine azo eo, ndra mirehake amy ze Vavolombelo i Jehovah amy ty faritse misy azo eo. Hahatrea fagnazavagne maro miomba anay ka rehe amy ty tragnom-poraro’ay ao.