Tihoe Watch Tower Bible and Tract Society of Pennsylvania (Fikambana ty Fitalakesan-davitse), le fikambanagne natsangagne tamy 1884, nifagnarake amy ty lalà i Pennesylvania a Etazonia agne. Fikambanagne tsy natao hipaliavam-bola io. Io ro ampiasae ty Vavolombelo i Jehovah mba hanoagne ty asa’e magneran-tane, agnisa izay ty famokaragne Baiboly naho boke vaho gazete.

 Rehafegne amy ty lalàna mifehe i fikambanagney fa ty “hivavake naho hampianatse sady hanao asa soa” ro tanjo’e, lohotsie fa ty “hitory naho hampianatse ty filazantsara ty Fanjakàn’Andrianagnahare, i aze indese i Kristy Jesosỳ.” Ze nahazo fanasagne avao ro afake mizilike amy i fikambanagney ao fa tsy tihoe ze magnomey vola maro mba hanohagnagne aze. Magnampe ty Filan-keve-pitantana ty Vavolombelo i Jehovah ty mpikambagne amy i fikambanagney ao naho ze mpitantagne aze.

 Managne fikambanagne ara-dalàna maromaro amy ty firenena maro sambe hafa agne ty Vavolombelo i Jehovah ankoatse ty Watch Tower Bible and Tract Society Pennsylvania. Misy tihoe “Watch Tower” ndra “Watchtower” (amy ty rehake angilé ndra amy ty firehake an-toeragneo) ty agnaragne ila’e amy i fikambanagne rey.

 Nagnampe anay hahavita raha maro i fikambanagne rey hatrake amy ty nagnoregnagne aze. Agnisa izay retoa:

•   Mamokatse boke naho gazete. Iretoagne iaby ohatse ty fa natao’ay pirinty: Baiboly 220 tapetrisa eo ho eo, boke naho gazete ara-baiboly 40 000 tapetrisa eo ho eo amy ty firehake 700 mahery. Managne ty tragnom-porarotse tihoe jw.org ka zahay. Misy Baiboly amy ty firehake 120 mahery ty ao, sady tsy mila mandoa vola rehe fa afake mamaky aze ao. Maro ka ty fagnonteneagne ara-baiboly valeagne ao. Agnisa izay tihoe “Inogne o Fanjakàn’Andrianagnahare Zao?”

•   Mampianatse. Misy sekoly isan-karaza’e alami’ay mba hampianaragne Baiboly. Vavolombelo i Jehovah 8 000 mahery ohatse, ro fa nampiofagnegne tamy ty Sekoly Ara-baiboly Gileada, nanomboke tamy 1943. Ampiofagnegne soa iareo mba hanjare misionera ndra mba ho afake hampandroso ty asa atao’ay magneran-tane. Miarake mivory amy ty fiangona’ay iaby ka zahay isan-keregnandro, mba hianatse Baiboly. Ndaty an-tapetrisa’e ty magnatreke io sady tsy Vavolombelogne ty ila’e. Mandamigne Sekoly fianaragne mamaky teny naho manoratse ka zahay sady fa namoake boke fianaragne mamaky teny naho manoratse amy ty firehake 110.

•   Manao asa soa. Magnampe ze niazon-doza ka zahay. Va’e ho loza vokatse ty raha atao o ndatio zay, agnisa izay i famonovonoagne foko ta Roanda agne tamy 1994 oy, ndra loza arake ty natiora agnisa izay ohatse i horohoron-tane ta Haity agne tamy 2010.

 Maregne fa maro ty raha vita’ay noho i fikambanagne natsangagne rey. Faie tsy miantehetse amy ty hery irey avao zahay. Mikezake mitory naho mampianatse i talily soay ka ty Kristiana tsikiraidraike satria izay ro nampanoen’Andrianagnahare iareo. (Matio 24:14; 28:19, 20) Matoky zahay fa manohagne ty asa’ay ty Andrianagnahare. Ireke ro “mampitombo” sady mbe manohagne anay avao reke.​—1 Korintianina 3:6, 7.