Ta Calgary a Kanada agne ty niterahagne ahy. Mbe kede raho tie nisarake ty babako naho i reneko, le nifindra taman-drazako agne zahay aman-dreneko. Tena tea anay o raza’ay rehoe, le nahatsiaro ho sambatse raho. Tena fale raho naho fa mahatsiaro ty ni-hasoasoa ty fiaignako tamy iraho mbe nikedey.

 Nifampiheregne indraike ty babako naho i reneko tamy tie raho fito taogne, le nifindra ta Saint Louis a Etazonia agne zahay. Niova ty fiaignako nanomboke teo. Treako tie kay i babakò toe ampiarotegne. Tamy iraho vaho nilitse nianatse tamy ze lakilasy vaovao zay ohatse, le nisy nampijale. Naho fa noly tan-tragno agne raho, le niboseke ty babako naho fa nihai’e tie tsy namale raho. Pinonapona’e ty jera raho sady le mbe mandikoatse ty niasa i ajaja rey ahy ty nijera’e ahy. Nanjare nitea aly tamy ty ajaja hafa raho nanomboke teo ndra tie vaho fito taogne aza.

 Lava lagìgne avao ty reneko satria tsiela boseke ty baba. Mateteke areke iareo ro nialy naho nifampikorakorake. Nanomboke tamy tie raho ni-11 taogne le fa nifoke rongony naho ninon-toake. Vao mainke nimpiarotegne naho mateteke nipay aly amo o ndatio raho. Naho fa nivita ty fianarako tamy lisé ey, le vao mainke nindra ty hatea aliko.

 Tamy tie raho ni-18 taogne, le nifily ty hanao maramila o amerikanao an-driake ey. Nampianaregne hamono ndaty raho tie tao. Faie naho fa niafake dime taogne raho, le niala tamy i tafikey mba hianatse psikolojia. Ty anto’e, nagniry hiasa amy ty Birò Federaly Miomba ty Famotopotoragne raho. Nianatse tamy ty oniverisite ta Etazonia agne heike raho vaho izay nanohy fianaragne ta Kanada agne.

 Naho fa tamy oniverisite agne raho, le nahatsiaro ho diso tamà tamy ty raha atao o ndatio naho o fiaraha-monegneo. Hoe tea tegna iaby ze kila ndaty sady tsisy dika’e ze kila raha amy ty tontolo toy eto. Tsy misy vahaolagne sasa hoahy o ndatio. Tsy nino raho tie mbe hisy ndaty hahavita hagnasoa ty tontolo toy.

 Nanjare nanaotao fahatane raho satria hoe tsy misy dika’e zay ty fiaignako. Nanjare nibiby raho tie nifoke rongony, nimamo lava, nipay vola naho harena naho naloto findesam-batagne. Ty raha lava agnate saiko ato avao le tihoe aia ka hinane zay ty misy fete le ia ka ty ampela hokoziegne. Nanjare nahavanivany nanao raha raho noho ty fampiofagnagne niazoko tamy i tafikey ao. Lava nialy tamo o ndatio avao areke raho. Nieretseretse raho tie iraho avao ty mandrambe fanapahan-kevetse miomba ty mete naho ty tsy mete, le izay ty nahavy ahy le avy le nialy tamy ze ndaty treako fa manao ty tsy rare’e amy ty hafa. Fa naho ty tena maregne, le noho izaho mpiarotegne ty nahavy izay.

 Tamy ty andro raike, le nimamon-drongony reketse ze ragneko zay raho, tambane ze tragno fa fifoha’ay aze zay. Tamy izahay nagnomagne ty rongony haondra’aỳ, le nagnontenea i ragnekoy raho tie: “Mino an’Andrianagnahare vao rehe.” Le hoe raho tama’e: “Naho boake aman’Andrianagnahare o fijaleagneo, le tsisy raha ipaliavako aze.” Nanomboke niasa tamy ze asa vaovao nitreako zay raho naho fa nimaray igne sady nisy Vavolombelo i Jehovah niara-niasa tamako. Nagnontenea’e raho tie: “Naho ty heve’o, boake aman’Andrianagnahare vao o fijaleagneo?” Nigaga raho, le nanjare niliagne tamy izay satria raha vaho nirehafe’ay omale i raha nagnontenea’ey. Mateteke nidebà zahay tagnate ty enem-bolagne tafara igne. Mateteke raho ro nametrake fagnonteneagne isan-karaza’e miomba ty fiaignagne sady sarotse ty ila’e tama’e, faie le mbe nivoavale’e boake agnate Baiboly ao avao.

 Nanagne valy fofo raho tamy izay sady fa niharo tragno ama’e faie heje’e raho naho mirehake ama’e ze raha nianarako. Tamy ze lahady raike zay, le nirehake tama’e raho tie nisy Vavolombelo i Jehovah nampandenàko an-tragno’ay ao mba hampianatse anay Baiboly. Naho fa rava niasa raho tamy ty maray igne, le fa tsy nizoeko ao sasa reke sady nindese’e iaby ty enta’e. Niakatse raho sady nihorake ty tagny. Nivavake taman’Agnahare ka raho sady nihalale tama’e mba hampea’e. Tamy izay ty voaloha’e nampiasako ty tahinan’Andrianagnahare tihoe Jehovah.​—Salamo 83:18.

 Roe andro tafara izay, le nanomboke nianatse Baiboly tamy ze mpivaly Vavolombelo i Jehovah rezay raho. Naho fa nibiogne iareo, le nanohy namaky ty boke tihoe Azonao Atao ny Hiaina Mandrakizay ao Amin’ny Paradisa eto An-tany raho, sady nivitako vaky iaby tagnate i halegney avao. a Nisy voka’e tamako ty raha nianarako miomba i Jehovah Andrianagnahare naho i Jesosy Kristy ana-dahi’e. Treako tie mitretré ty Jehovah sady mikoretse ty arofo’e naho fa mahavazoho antika mijale. (Isaia 63:9) Tena manohigne ty foko ty mahafantatse tie tea ahy ty Andrianagnahare, le noho iraho ty nagnomea’e i ana-dahi’ey mba hisolovoigne. (1 Jaona 4:10) Tena treako tie nanam-paharetagne tamako ty Jehovah “satria tsy misy tea’e haringagne o ndatio fa sambe hisoloho iaby.” (2 Petera 3:9) Tsapako tie nitaone’e mba hagnatogne aze raho.​—Jaona 6:44.

 Amy hinane zao, le ty boke tihoe Ankamamio Nainai’e o Fiaignagneo! ty ampiasae o Vavolombelo i Jehovah-o.

 Tamy heregnandro ignehoe avao, le avy le nanomboke nivory raho. Nilava ty voloko tamy izay sady mbe nikavigne ka raho, le nampatahotse o ndatio ty poziko. Faie nirambese o Vavolombelo i Jehovah-o manahake ty keleia’e fa ela tsy nitrea’e raho. Trea tie Kristiana vata’e iareo. Le hoe noly taman-drazako agne zay raho. Ie aza le mbe mihoatse izay ty nitsapako.

Tsiela le nagnova ty fiaignako ty raha nianarako boake agnate Baiboly ao. Nihitsifako i volokoy, tsy nijangajanga sasa raho sady tsy nifoke rongony naho tsy ninon-toake sasa. (1 Korintianina 6:9, 10; 11:14) Teako ty hampifale i Jehovah, le naho fa haiko fa tsy tea’e ty findesam-batako, le tsy magnamaren-tegna sasa raho. Mateteke raho ro mahatsapa tie mila miova sady mieretseretse tie: ‘Tsy toko’e hanao igne sasa raho.’ Le avy le nagnova ty toe-tsaiko naho ty raha nataoko raho tafara izay. Tsapako ka tie mahasoa ty magnorike ty tari-dala i Jehovah. Enem-bolagne tafara ty nianarako Baiboly, le natao badisa raho tamy 29 Jolay 1989 sady nanjare Vavolombelo i Jehovah.

 Nampea ty Baiboly raho mba hagnova ty toetseko. Amparake izay raho, le nialy amy ze ndaty niraty fagnahy tamako. Faie amy izao raho, le mikezake mafe mba ‘hilongo amy ze kila ndaty.’ (Romanina 12:18) Misaotse i Jehovah raho satria ty Saontsi’e naho ty fagnahy masi’e avao ro nahavita nagnova ahy.​—Galatianina 5:22, 23; Hebreo 4:12.

 Tsy komandie o toake naho o rongonio vaho ty fagnirian-draty sasa raho sady tsy mpiarotegne. Mikezake mampifale i Jehovah Andrianagnahare naho magnomey aze ze fara’e soa raho, agnisa izay ty magnampe ty hafa mba hahafantatse aze. Taogne tsiampeampe tafara ty badisako, le nifindra tamy ty toeragne hafa raho mba hitory amy ze toeragne ipaliavagne mpitory maro. Fale raho fa afake mampianatse ndaty maro, tagnate ze taogne maro zay sady nahatrea tie nagnova ty fiaigna iareo o Baibolio. Fale ka raho satria nanjare Vavolombelo i Jehovah ty reneko. Agnisa ty nahavy aze nandroso ty nahatrea ty fiovàko.

 Tamy 1999, le nahazo diploma tamy ze sekoly nataoko ta Salvadaoro agne zay raho. Amy izao o sekoly iohoe, le Sekoly ty Mpitory i Fanjakagney ty itokavagne aze. Nampiofagne ahy o sekoly iohoe mba hazoto hitory i talily soay, hahay hampianatse naho hahavita hikarakara ty Kristiana amo o fiangonagneo eo. Nanambaly i Eugenia raho tamy ty farampara o taogne iohoe. Sambe manompo marain-tsy hariva a Goatemalà atoy zahay mirovaly hinane zao.

 Tena sambatse raho hinane zao fa tsy diso tamà amy ty fiaignagne sasa. Tsy nijangajanga naho tsy mpiarotegne sasa raho satria nampihatse ty fampianara ty Baiboly. Nanjare nilongo soa amy ty hafa raho sady tsapako ze o atao tihoe tena hatea zao.