Talily Soa Nisorate i Jaona 10:1-42
10 “Volagneko ama’areo,* fa ze ndaty tsy mizilike amy ty lala i zolon’agnondrỳ eo fa manganike amy i zolokey, le mpangalatse naho mpitavagne.
2 Fa ze mizilike amy ty lala i zolokey eo ro mpiarake i agnondry rey.
3 Sokafe i mpiambegne i lala i zolokeỳ i lalagney naho fa avy reke, sady mitsanogne ty feo’e i agnondry rey. Tokave’e amy ty agnara’e tsikiraidraike i agnondry rey, le indese’e miakatse.
4 Ie naho fa ivela i zolokey ao iaby i agnondry rey, le mandeha aloha iareo eo reke, le magnorike aze i agnondry rey satria fanta iareo ty feo’e.
5 Tsy hagnorike ty ndaty tsy fanta’e i agnondry rey fa hilay aze satria tsy hay iareo ty feo i ndatỳ.”
6 Nirehake o fagnoharagne iohoe tamy iareo ty Jesosy faie tsy niazo iareo ty tea’e horehafegne.
7 Hoe indraike areke ty Jesosy: “Volagneko ama’areo, fa izaho ty lalagne iziliha i agnondry rey.
8 Ze niavy talohako manao ty vata’e ho iraho, le mpangalatse sady mpitavagne, faie tsy nitsanogne iareo i agnondry rey.
9 Izaho i lalagney. Ze amako eo ty iziliha’e, le ho voavonje. Hizilike naho hiboake eo reke sady hahita teteke hihinana’e.
10 Naho fa hangalatse naho hamono vaho handrava avao o mpangalatseo vaho izay avy. Fa izaho niavy, amy izay hahazo havelogne iareo sady tsy hisy raha hahaore iareo.
11 Iraho i mpiarake fanjakay. Ty mpiarak’agnondry fanjaka, le mahafoe ty fiai’e hoahy o agnondrio.
12 Naho ndaty karamagne ty miarake o agnondrio fa tsy i tompo’ey, le lomay reke naho fa misy amboahako avy sady enga’e eo i agnondrỳ. Tsepahe i amboahakoy ty ila’e amy i agnondry rey, le ty ila’e lomay.
13 Lomay i ndaty mpiarak’agnondry karamagney fa tsy ahoa’e ino i agnondry rey.
14 Iraho i mpiarak’agnondry fanjakay. Fantako o agnondrikò, le o agnondrikò ka mahafantatse ahy,
15 manahake ty ahafantarako i Rae naho ty ahafantara i Rae ahy. Foeko hoahy o agnondrikò ty fiaiko.
16 “Managne agnondry hafa tsy agnate ty zoloke toy ato raho. Tsy maintsy hindeseko ka rey sady hitsanogne ty feoko iareo. Hiharo raike iareo, le ho raike avao ty mpiarake iareo.
17 Tea ahy ty Rae satria mahafoe ty fiaiko raho mba hahazoako aze indraike.
18 Tsy misy ndaty mahavita magnafake ty fiaiko fa sitrapoko ty mahafoe aze. Managne fahefagne hamoe aze raho, le managne fahefagne hagneregne aze indraike. Izay ty lily niazoko boake aman-dRaeko.”
19 Le tsy nitovy hevetse o Jiosio noho ze reha’e zay.
20 Maro amy iareo ty nirehake tie: “Misy demonia ty lahitia sady gege. Nagnino nareo ro mitsanogne aze?”
21 Fa ty ila’e nirehake tie: “Tsy hoe izay ty reha o ndaty misy demonia. Sady aia ka ty ndaty misy demonia ro hahavita hampahatrea ty goa?”
22 Fete Fitokanagne i tempoly ta Jerosalema aoy tamy izay, sady asotry i androy.
23 Nandeha tamy i tempolỳ ao ty Jesosy, tamy i lalagne misy tafo’e naore i Solomonay eo.
24 Le nivory tama’e teo o Jiosio sady nirehake tihoe: “Hatrake ombia rehe ro hampiroeroe saigne anay? Naho ihe o Kristio, le avy le ambarao anay.”
25 Hoe ty navale i Jesosy iareo: “Fa nirehafeko tama’areo an’izay faie tsy inoa’areo. I asa ataoko amy ty tahinan-dRaeko rey, le magnaporofo ty miomba ahy.
26 Faie tsy mino nareo satria tsy agnondriko.
27 Ty agnondriko mitsanogne ty feoko sady fantako soa iareo, le iareo ka magnorike ahy.
28 Omeako havelogne nainai’e iareo, le tsy ho mate sady tsy hisy ndaty hahavita hanintogne iareo an-tagnako ey.
29 Sarobily ambone ze raha iaby i raha nimein-dRaeko ahy rey sady tsy misy mahavita manintogne aze am-pità i Rae ey.
30 Raike avao zahay aman-dRaeko.”
31 Le nangalake vato indraike o Jiosio mba hitorahagne aze.
32 Le hoe ty Jesosy tamy iareo: “Nataoko tagnatreha’areo eo i asa fanjaka maro nampanoen-dRaeko ahy rey. Ty aia amy irey areke itoraha’areo vato ahio?”
33 Hoe o Jiosio tama’e: “Tsy i asa fanjaka rey itoraha’ay vato azò, fa ihe manivetive an’Agnahareo. Tsy aia ka tie ihe ndaty hoe itia ro manao ty vata’o ho Andrianagnahare.”
34 Hoe ty navale i Jesosy iareo: “Tsy voasoratse amy i lalàna’areoy ao vao i tihoey tie: ‘Nirehake raho tie “andrianagnahare nareo”’?
35 Ekentika fa maregne ty raha rehafe o Soratse Masigneo. A naho i Andrianagnahare areke nikanjy i ndaty nimelohe ty saontsi’e rey tie ‘andrianagnahare’,
36 le nagnino raho ro rehafe’areo tie ‘manivetive an’Agnahare’ naho fa nirehake tie ‘Anan’Agnahare raho’, ie amy izao raho nihamasìgne i Rae naho nirahe’e ho amy ty tontolo toy eto?
37 Naho tsy manao ty asan-dRaeko raho, le ko mino ahy nareo.
38 Faie minoa ahy avao nareo noho i asa ataoko rey, amy izay hohai’areo naho vao mainke hohai’areo soa tie i Rae tafaharo raike amako, le iraho tafaharo raike amy i Rae.”
39 Le nitea iareo ho nitsepahegne indraike ty Jesosy faie natao’e ze tsy hahazoa iareo aze.
40 Nandeha nitsake i Renerano i Jordanay indraike ty Jesosy mba handeha amy i toeragne nanoa i Jaona badisa voaloha’ey agne. Le nijanogne tagne reke.
41 Maro ty ndaty nimbama’e mbeo, le nirehake tie: “Tsy nanao famantaragne ndra raike ty Jaona. Faie ze raha nirehafe i Jaona miomba ty lahilahy tia, le maregne iaby.”
42 Maro amy ty ndaty tagne areke ro nanjare nino i Jesosy.
Fagnamarehagne ambane peje
^ Abt: “Volagneko ama’areo to vata’e.”
