Talily Soa Nisorate i Jaona 11:1-57
11 Narare ze lahilahy raike atao Lazarosy boake a Betania agne zay. Niarake nitoboke tama’e tamo o tanàgne iohoe ao ty Maria naho i Marta rahavave’e.
2 O Maria iohoe, i nagniligne menake magnitse tamy ty tombo i Tompoy naho namafa aze tamy ty volo’ey.
3 Rahavave i Lazarosy, i lahilahy nararey reke. Nagnafatse tamy i Jesosy agne areke ty Maria tie: “O Tompo, marare i ragne’o tsy foe’oy.”
4 Faie naho fa naharey izay ty Jesosy, le nirehake tie: “Tsy ty hahafate aze loatse ty nahavy aze niazo ze o aretegne zao, fa mba hagnomeagne voninahitse an’Agnahare, amy izay hahazo voninahitse amy ty alala’e i Anan’Agnaharey.”
5 Nitea i Jesosy ty Marta naho i rahavave’ey vaho i Lazarosy.
6 Faie naho fa nirey i Jesosy tie narare ty Lazarosy, le mbe nijanogne roe andro tamy i toeragne nisy azey agne reke.
7 Tafara izay, le nirehake tamy i mpiana’e rey reke tie: “Andao tika ho a Jodia agne indraike.”
8 Le hoe i mpiana’e rey tama’e: “O Raby,* vaho tsiela anio i ho nitoraha i ndaty ta Jodia agne rey azo vatoy! Le fa hiheregne agne indraike ka rehe?”
9 Hoe ty navale i Jesosy: “Agnate ty 12 lera ty azavà i androy, sa tsy izay? Naho amy i androy mbe mazavay o ndatio ro mandeha, le tsy hisy raha hamingagne aze. Ty anto’e, mahatrea i hazavagne natao hoahy o ndatioy reke.
10 Fa naho mandeha halegne o ndatio, le ho voafingagne, satria tsy misy hazavagne ty ama’e ao.”
11 Hoe ka reke naho fa boake nirehake o raha rehoe: “Miroro ty Lazarosy, i ragnentikagney, le handeha ho agne raho hamoha aze.”
12 Le hoe i mpiana’e rey tama’e: “O Tompo, hositragne* reke naho miroro.”
13 Faie ty tea i Jesosy horehafegne le tihoe mate ty Lazarosy. Fa iareo nieretseretse tie miroro vata’e ty Lazarosy.
14 Hafarà’e nabeja i Jesosy tie: “Nimate ty Lazarosy.
15 Faie hasoan-draha fa tsy tagne raho, amy izay nareo mino. Andao areke tika ho ama’e agne.”
16 Le hoe ty Tomasy, i atao tihoe Hambagney, tamy i mpianatse ila’e rey: “Andao ka tika rikiahe handeha, amy izay mate reketse aze.”
17 Naho fa niavy ty Jesosy, le nihai’e tie fa efatse andro ty nandevegnagne i Lazarosy.
18 Marine i Jerosalema ty misy i Betania, satria eo ho eo amy ty telo kilometatse avao ty elagnela’e.
19 Maro ty Jiosy niavy tamy ry Marta naho ry Maria agne mba hampionogne iareo amy ty nimateza i rahalahy iareoy.
20 Naho fa nirey i Marta tie niavy ty Jesosy, le nandeha mbama’e mbeo reke hanalaka aze, fa i Maria nijanogne tan-tragno ao avao.
21 Le hoe ty Marta tamy i Jesosy: “O Tompo, naho teto rehe, le tsy ho nimate i rahalahikoy.
22 Faie ndra tie amy izao aza, le matoky raho fa ndra inogn’ino angatahe’o aman’Agnahare, le homea’e azo.”
23 Hoe ty Jesosy tama’e: “Hovelogne i rahalahi’oy.”
24 Le hoe ty Marta tama’e: “Haiko fa hovelogne reke naho fa avy i famelomagne ty mate amy ty hoavỳ.”*
25 Hoe ty Jesosy tama’e: “Izaho ty famelomagne ty mate naho fiaignagne. Ze maneho finoagne ahy, ndra tie mate aza, le hovelogne indraike.
26 Fa ze velogne sady maneho finoagne ahy, le tsy homate. Mino izay vao rehe?”
27 Hoe ty Marta tama’e: “Eka Tompo. Mino raho fa ihe ro Kristy, i Anan’Agnahare ho avy amy ty tontolo toỳ.”
28 Naho fa boake nirehake izay ty Marta, le nandeha nitoka i Maria. Nirehake tamy i rahavave’ey mitokagne reke tie: “Ao i Mpagnanatsey mipay azo.”
29 Le avy le nitsangagne malaky ty Maria naho fa naharey izay, le nandeha mbamy i Jesosy mbeo.
30 Mbe tsy nizilike tamy i tanàgney ao ty Jesosy tamy izay, fa mbe tamy i toeragne nanalakà i Marta azey eo avao.
31 Naho fa nitrea i Jiosy nampionogne i Maria rey, ireke le avy le nitsangagne sady nilaỳ, le nagnorike aze iareo. Ty anto’e, nieretseretse iareo tie hitagny an-kibory agne reke.
32 Naho fa niavy tamy i Jesosy eo reke, le nanongaleke tan-tombo’e eo sady nirehake tihoe: “O Tompo, naho teto rehe, le tsy ho nimate i rahalahikoy.”
33 Naho fa nahatrea i Maria nitagny naho i Jiosy niarake tama’e rey nitagnỳ ty Jesosy, le nifoaigne sady nalahelo.
34 Le hoe ty Jesosy: “Aia ty nandevegna’areo aze?” Hoe iareo tama’e: “Andao rehe Tompo hagnente aze.”
35 Le nipoke ty ranomaso i Jesosy.
36 Naho fa nahatrea izay o Jiosio, le nirehake tie: “Mba tea’e vata’e rikiahe irekeo!”
37 Fa ty ila’e nirehake tie: “Tsy nivita ty lahilahy nampahatrea i lahilahy nigoay tiagne vao ty nikalagne ty raike tiagne tsy ho nimate?”
38 Nifoaigne indraike ty Jesosy, le nandeha mbamy i kiborỳ mbeo. Lakato nigabegnagne vato o kibory iohoe.
39 Hoe ty Jesosy: “Afaho’areo o vato iohoe!” Le hoe ty Marta, i rahavave i Lazarosỳ tamy i Jesosy: “O Tompo, fa maimbo anio zay, satria fa efatse andro ty nandevegnagne aze!”
40 Faie hoe ty Jesosy tama’e: “Tsy fa nirehake tama’o moa raho tie naho mino rehe, le hahatrea ty voninahin’Agnahare?”
41 Nafaha iareo areke i vatoy. Le niandrandra i lagnitsey ty Jesosy sady nirehake tie: “O Baba, misaotse azo raho satria fa nijanjigne ahy rehe.
42 Haiko fa lava mijanjigne ahy avao rehe. Faie noho ty amy ty vahoake mitsangagne magnodidigne ahy retoa ro irehafako izay, amy izay mino iareo tie ihe ty nagnirake ahy.”
43 Naho fa boake nirehake o raha rehoe reke, le nitoka mafe tihoe: “O Lazarosy, miakara!”
44 Le niakatse i lahilahy nimatey sady mbe nifehe lamba ty tagna’e naho ty tombo’e vaho ty loha’e. Le hoe ty Jesosy tamy iareo: “Hahao’areo reke, le engao’areo handehana’e.”
45 Ty voka’e, maro tamy i Jiosy niavy tamy i Maria agne rey ro nanjare nino i Jesosy naho fa nahatrea ty raha natao’e.
46 Fa ty ila’e nandeha amo o Fariseò agne, le nagnambara tamy iareo i raha natao i Jesosỳ.
47 Navory o lahibey ty mpisorogneo naho o Fariseò areke ze agnisa ty Fitsaragne Ambone Jiosy sady hoe iareo: “Ino ty hataontikagne? Fa maro anio ty raha natao i lahy ignehoe.
48 Naho engantikagne amy izao avao reke, le hino aze iaby o ndatio sady ho avy ka o Romanao, le hangalake i tempolintikagney naho ty firenentika toy.”
49 Faie nisy mpisorombey agnisa iareo zay, i Kaiafa ty agnara’e. Hoe reke: “Tsisy raha fanta’areo ndra raike nareo,
50 sady tsy mba nidinehe’areo ka tie mahasoa anareo naho lahilahy raike ro mate mba hagnavotagne i vahoakey ta tie i firenenay iaby ro horava.”
51 Ndra tie nirehake izay aza reke, le tsy heve’e manokagne zay, fa noho ireke mpisorombey tamy izay, le naminany tie homate hoahy i firenenay ty Jesosy.
52 Faie tsy hoahy i firenenay avao ty nimateza’e, fa ty mba hamoriagne o anan’Agnahare miparitakeo ka.
53 Nanomboke tamy izay iareo, le nilahatse ty fomba hamonoagne i Jesosy.
54 Tsy nandeha tamy ty lalagne va’e hahatreava iareo aze areke ty Jesosy. Faie niala ty eo reke, le nandeha tamy ze faritse marine i fatrambeỳ zay, amy i tanàgne raike atao tihoe Efraima zay agne. Le nijanogne tagne reke naho i mpiana’e rey.
55 Fa narine i Pasake Jiosỳ tamy izay. Maro tamy ty ndaty boake ambanevohitse agne areke ro nandeha a Jerosalema agne, taloha i Pasakey mba hagnalio ty vata’e arake i Lalà i Mosesỳ.
56 Nipay i Jesosy iareo sady nifampirehake, tamy iareo nitsangagne tamy i tempolỳ aoy tie: “Akore ty heve’areo? Tsy ho avy amy i fetey vao reke?”
57 Fa nagnomey lily o lahibey ty mpisorogneo naho o Fariseò tamy izay tie ze ndaty mahatrea i Jesosy, le toko’e hirehake mba hitsepaha iareo aze.
Fagnamarehagne ambane peje
^ Agnaram-boninahitse nirehafagne ty Mpampianatse jiosy.
^ Ndra: “ho voavonje.”
^ Abt: “andro fara’ey.”
