Talily Soa Nisorate i Jaona 13:1-38
13 Fa nihay i Jesosy taloha i fete i Pasakeỳ tie, fa avy ty lera hagnafahagne aze amy ty tontolo toy eto, le handeha aman-dRae’e agne reke. Satria nitea i Jesosy o mpanonjohy ty lia’e amy ty tontolo toy etò, le nitea’e hatrake am-para’e iareo.
2 Nihinagne hariva iareo tamy izay. Fa natao i Devoly ze hahavy* i Jodasy Iskariota, i ana i Simonay, hanagne fagniriagne hifotetse i Jesosy.
3 Satria nihay i Jesosy tie fa nimea i Rae aze iaby ze kila raha sady boake aman’Agnahare reke, le ho mbaman’Agnahare mbeo ka,
4 le nitsangagne reke tamy iareo nihinagne harivay sady nafaha’e i akanjobei’ey. Nangalake serivieta ka reke, le nadia’e ambania’e eo.
5 Naho fa boake nagniligne rano tagnate ze koveta zay ao reke, le nisasà’e ty tombo i mpiana’e rey sady nimaihe’e tamy i serivieta nadia’e tambania’e teoy.
6 Faie hoe ty Simona Petera naho fa ho nisasà i Jesosy i tombo’ey: “O Tompo, le irehe vao ro hanasa ty tomboko?”
7 Hoe ty navale i Jesosy aze: “Mbe tsy azo’o hey o raha ataokò tie amy izao. Faie mbe hoazo’o avao zao naho fa afara agne.”
8 Hoe ty Petera tama’e: “Iraho tsy hagneke azo hanasa ty tomboko zao ndra ombia ndra ombia.” Le hoe ty navale i Jesosy aze: “Naho tsy mei’o hosasako i tombo’oy, le tsy hisy raha hiharoantika.”
9 Hoe ty Simona Petera tamy i Jesosy: “Naho izay areke Tompo, le tsy ty tomboko avao ro sasao fa ty tagnako naho ty lohako ka.”
10 Hoe ty Jesosy tama’e: “Ze fa boake niandro, le ty tombo’e avao ro mila sasagne satria fa malio i vata’ey iaby. Fa malio nareo faie tsy inareo iaby.”
11 Fa nihai’e i ndaty hifotetse azey, le izay ty nahavy aze nirehake tie: “Tsy inareo iaby ro malio.”
12 Naho fa nivita’e sasa i tombo iareoy, le nagnisia’e i akanjobei’ey sady nandre nitso-kiho amy i latabatsey eo indraike reke. Le hoe reke tamy iareo: “Hai’areo vao ty anto’e nanasako i tombo’areoy?
13 Inareo mitoka ahy tihoe ‘Mpagnanatse’ naho ‘Tompo’, le tsy diso zay satria toe izay vata’e raho.
14 Faie ndra tie Tompo naho Mpagnanatse aza raho, le nanasa i tombo’areoy. Toko’e hifanasa tomboke ka areke nareo.
15 Modely i nomeko anareoy. Manahake i raha nataoko tama’areoy ro toko’e hatao’areo ka.
16 Volagneko ama’areo,* fa ty mpanompo, le tsy ambone noho i tompo’ey. Ty ndaty irahegne ka, le tsy ho ambone noho i nagnirake azey.
17 Hai’areo o raha rehoe. Naho manao o raha reo nareo, le ho sambatse.
18 Tsy inareo iaby ty irehafako ze raha rezay, satria fantako ty jinoboko. Faie miseho zay, amy izay hotanterake ty raha rehafe ty Soratse Masigne tihoe toy tie: ‘I nihinagne mofo miarake amakoy ro nagnongake ty tomi’e mba haminganagne ahy.’
19 Rehafeko ama’areo ze raha zay, amy ie mbe tsy miseho zao. Amy izay naho fa miseho reke, le hino nareo tie iraho i nirehafegney.
20 Volagneko ama’areo, fa ze mandrambe ty irako, le mandrambe ahy ka. Le ze mandrambe ahy, le mandrambe i nagnirake ahỳ.”
21 Ninekoneko mafe ty Jesosy naho fa boake nirehake o raha rehoe sady nirehake tie: “Volagneko ama’areo, fa hifotetse ahy ty raike ama’areo.”
22 Nifagnente i mpiana’e rey sady nisahiran-tsaigne tie ia o rehafe’eo.
23 Nandre nitso-kiho tagnila i Jesosy eo i mpianatse raike tea’ey tamy izay.
24 Nanao fihetseke tama’e areke ty Petera sady nirehake tama’e tie: “Ambarao anay tie ia o rehafe i Jesosio.”
25 Le niharine i Jesosy i mpianatse tea’ey sady nagnontane aze tie: “O Tompo, ia hifotetse azò?”
26 Hoe ty navale i Jesosy: “Ze omeako i mofo haloko agnate finga bole aoy ro ie.” Naho fa boake nandogne i mofoy ty Jesosy, le nalae’e, le nimea’e i Jodasy ana i Simona Iskariota.
27 Naho fa boake nangalake i mofoy ty Jodasy, le nizilike tama’e ao ty Satana. Le hoe ty Jesosy tama’e: “Vitao malaky o raha anoe’ò.”
28 Ndra raike tamy iareo nihinagne teo rey naho nisy nahazo ty raha nirehafe i Jesosy tamy i Jodasy.
29 Ty ila’e amy iareo nieretseretse tie noho i Jodasy mpitam-bolay, le nite hirehake tama’e ty Jesosy tie: “Viliano ze raha ilaentikagne amy i fetey”, ndra toko’e hagnomey raha o mahantrao reke.
30 Naho fa boake nangalake i mofoy areke ty Jodasy, le nandeha niboake malaky. Fa nihalegne i androy tamy izay.
31 Naho fa nandeha niboake ty Jodasy, le hoe ty Jesosy: “Meagne voninahitse i Ana o ndatỳ hinane zao. Meagne voninahitse ka ty Andrianagnahare noho i Ana o ndatỳ.
32 Hagnomey voninahitse i Anakey ka ty Andrianagnahare sady amy izao amy izao reke ro hagnomey voninahitse aze.
33 O ry anake, fa kedekede sisa ty hiarahako ama’areo. Hipay ahy nareo faie horehafeko ama’areo ka hinane zao, i raha nirehafeko tamo o Jiosio tihoey tie: ‘Ze andehanako tsy azo’areo andehanagne.’
34 Omeako lily vaovao nareo, le tihoe mifankateava. Manahake ty niteavako anareo ro toko’e hifankateava’areo ka.
35 Naho mifankatea nareo, le izay ro hahafantara ty ndaty iaby tie mpianako nareo.”
36 Le hoe ty Simona Petera: “O Tompo, hombaia ireheo?” Le hoe ty navale i Jesosy: “Tsy afake magnorike ahy amy i handehanakoy agne nareo amy izao, fa mbe ho afake avao naho fa afara agne.”
37 Le hoe ty Petera tama’e: “Nagnino raho Tompo ro tsy afake magnorike azo ty amy izao? Iraho anio vognogne hamoe ty fiaiko noho ty ama’o.”
38 Hoe ty navale i Jesosy aze: “Vognogne hamoe ty fiai’o noho ty amako rehe? Volagneko ama’o, fa mbe tsy mikekeo i akohoy, le fa handietse ahy intelo rehe.”
