Talily Soa Nisorate i Jaona 14:1-31
14 “Ko minekoneko nareo. Atorò fa mino an’Agnahare naho mino ahy nareo.
2 Misy toeragne malalake maro azo ipetrahagne ty agn’anjomban-dRaeko ao. Tsy ho nirehafeko tama’areo zay naho tsy nisy. Handeha agne areke raho hagnomagne toeragne ho anareo.
3 Naho fa mandeha raho sady vitako omagne ka i toeragne ho anareoy, le hiheregne indraike raho sady hindeseko amako agne nareo. Amy izay ze misy ahy, le hisy anareo ka.
4 Hai’areo ty lalagne mbamy i toeragne handehanakoy mbeo.”
5 Hoe ty Tomasy tama’e: “O Tompo, tsy hai’ay anio tie hombaia rehe? Akore areke ty hahaia’ay ty lalagne mbeo?”
6 Hoe ty Jesosy tama’e: “Izaho ro lalagne naho hamarenagne vaho fiaignagne. Tsy misy ndaty afake mandeha mbamy i Rae mbeo naho tsy amy ty alalako.
7 Naho nahafantatse ahy nareo, le toko’e ho nahafantatse an-dRaeko ka. Manomboke amy izao nareo, le hahafantatse aze. Toe fa nahatrea aze ka anio nareo naho ty maregne.”
8 Hoe ty Filipo tama’e: “O Tompo, atorò anay ty Rae, le fa ampe anay zay.”
9 Hoe ty Jesosy tama’e: “Ty haela ty niarahako tama’areo vao le mbe tsy mahafantatse ahy avao rehe Filipo? Ze nahatrea ahy, le nahatrea an-dRaeko ka. Nagnino areke rehe ro mirehake tie: ‘Atorò anay ty Rae’?
10 Tsy mino vao rehe tie iraho tafaharo raike amy i Rae, le i Rae tafaharo raike amako? O raha rehafeko ama’areò, le tsy boake amako fa i Rae tafaharo raike amakoy ro manao ty asa’e amy ty alalako.
11 Minoa ahy fa iraho tafaharo raike amy i Rae, le i Rae tafaharo raike amako. Fa naho tsy izay, le inò’areo i asa nataoko rey.
12 Volagneko ama’areo,* fa ze maneho finoagne ahy, le hanao i asa nataoko rey ka. Mbe hanao asa ambone ireo aza reke satria handeha amy i Rae agne raho.
13 Ze raha angatahe’areo amy ty agnarako, le hataoko. Soa tie homeagne voninahitse amy ty alala i Anakey ty Rae.
14 Ndra inogn’ino raha angatahe’areo amy ty agnarako, le homeako.
15 “Naho toe tea ahy vata’e nareo, le hagnorike ty liliko.
16 Hangatake amy i Rae ka raho, le ireke hagnomey anareo mpagnampe hafa hiarake ama’areo nainai’e.
17 Tsy inogne zay fa i fagnahy masigney, i mampahafantatse ty hamaregnagney. Tsy hahazo o fagnahy masigne iohoe ty tontolo toy satria tsy mahatrea aze iareo sady tsy mahafantatse aze ka. Fa inareo mahafantatse aze satria reke miarake ama’areo sady agnate’areo ao.
18 Tsy hengako ho irery nareo. Matokisa nareo fa mbe hiheregne raho.
19 Kedekede ty sisa, le tsy hahatrea ahy sasa ty tontolo toy. Fa inareo hahatrea ahy satria velogne raho, le inareo ka ho velogne.
20 Amy ze andro zay, le hofanta’areo tie iraho tafaharo raike amy i Rae, le inareo tafaharo raike amako, le iraho tafaharo raike ama’areo.
21 Ze magneke ty liliko naho magnorike irey ro tea ahy. Le ze tea ahy, le hotea an-dRaeko ka. Hotea aze ka raho sady hataoko ze hahavy aze hahay ahy soa.”
22 Le hoe ty Jodasy (tsy i Jodasy Iskariota io fa i Jodasy raikey) tama’e: “O Tompo, nagnino ro izahay avao ro ampahafantare’o azo soa fa tsy ty tontolo toy?”
23 Hoe ty navale i Jesosy aze: “Ze ndaty tea ahy, le hagnorike ty rehako. Hotea aze ka ty Raeko, le hombama’e mbeo zahay sady hiharo toboke ama’e.
24 Fa ze tsy tea ahy, le tsy hagnorike ty rehako. Tsy boake amako i raha rei’areo rehafeko rey, fa boake amy i Rae, i nagnirake ahỳ.
25 “Rehafeko ama’areo i raha rey amy iraho mbe ama’areo etò.
26 Faie naho fa tsy eo raho, le i mpagnampey ndra i fagnahy masigne hirahen-dRaeko amy ty agnarakoy, ro hampianatse anareo ze kila raha sady haniahy anareo ze raha nirehafeko tama’areo.
27 Tsy hiala ama’areo ze o fiadagnagne tsapa’areo amy inareo miarake amako zao. Hagnomey anareo ze fiadagnagne zay avao raho. Tsy manahake ty fomba fagnomea ty tontolo toy raha ty fomba agnomezako aze anareo. Ko minekoneko nareo ndra matahotse.
28 Nirehafeko tama’areo teo tie: ‘Handeha raho faie mbe hiheregne ama’areo eo indraike.’ Naho tea ahy nareo, le ho fale naho fa mandeha amy i Rae agne raho satria i Rae ro manam-pahefagne amboneko.
29 Rehafeko ama’areo mialoha ze raha zay, amy izay naho fa miseho reo, le hino nareo.
30 Tsy hirehake raha maro ama’areo raho satria fa ho avy i mpitondra ty tontolo toỳ. Faie tsy managne fahefagne amako reke.
31 Fa mba hahafantara ty tontolo toy tie teako ty Rae, le ze raha nandilia i Rae ro ataoko. Mitsangana, andao tika hiala ty eto.
Fagnamarehagne ambane peje
^ Abt: “Volagneko ama’areo to vata’e.”
