Talily Soa Nisorate i Jaona 15:1-27
15 “Iraho i voaloboke tena iey, le i Raeko ty mpambole aze.
2 Hafaha’e ze sampa’e tsy mamoa. Fa ze sampa’e mamoa horantsagne’e, amy izay vao mainke hamoa maro.
3 Fa malio nareo satria nitsanogne’areo i raha nirehafeko tama’areo rey.
4 Mikezaha avao ho tafaharo raike amako, amy izay ho tafaharo raike ama’areo avao ka raho. Tsy hamoa i sampa i voalobokeỳ naho miala amy i vata’ey. Hoe izay ka, fa tsy hamoa nareo naho tsy mikezake ho tafaharo raike amako avao.
5 Iraho i voalobokey, le inareo i sampa’ey. Ze mikezake ho tafaharo raike amako avao naho ho tafaharo raike ama’e avao, le hamoa. Fa naho miala ahy nareo, le tsy hahavita* raha ndra raike.
6 Naho misy ndaty tsy mikezake mba ho tafaharo raike amako avao, le hanahake o sampan-katae tapahegne le manjare maikeo. Havory o ndatio o sampan-katae rehoe, le hatora iareo agnate afo ao, hafarà’e mae.
7 Naho mikezake ho tafaharo raike amako avao nareo sady magnorike ty raha rehafeko avao ka, le hoazo’areo ze raha angatahe’areo.
8 Naho mamoa maro avao nareo sady atoro’areo tie mpianako nareo, le hahazo voninahitse ty Raeko.
9 Manahake ty niteava i Rae ahy ty niteavako anareo ka. Anò ze hahavy ahy hotea anareo avao.
10 Naho magnorike ty liliko nareo, le hotea anareo avao raho, manahake ty iteava i Rae ahy avao noho iraho nagnorike ty lili’e.
11 “Nirehafeko ama’areo ze raha rezay, amy izay ho agnate’areo ao i fifaleakoy le ho feno ty fifalea’areo.
12 Izao ty liliko: Mifankateava nareo manahake ty niteavako anareo.
13 Tsy misy ndaty managne hatea ambone ty ndaty raike mahafoe ty fiai’e hoahy ty ragne’e.
14 Ragneko nareo naho manao ze raha andiliako anareo.
15 Tsy tokaveko tihoe mpanompo sasa nareo satria o mpanompò tsy mahafantatse ty raha atao i tompo’ey. Tokaveko tihoe ragnetse nareo satria nampahafantareko anareo iaby ze raha nireiko taman-dRaeko.
16 Tsy inareo ro nijobogne ahy fa iraho ro nijobogne anareo, amy izay nareo hamoa avao sady haharetse ze voa zay. Le ndra inogn’ino raha angatahe’areo amy i Rae amy ty agnarako, le homea’e anareo zay.
17 “Ireo ty raha andiliako anareo, amy izay nareo hifankatea.
18 Naho heje ty tontolo toy nareo, le tadidio’areo fa iraho fa niheje’e taloha’areo.
19 Naho niagnisa ty tontolo toy nareo, le ho nitea anareo ty tontolo toy satria aze nareo. Faie heje ty tontolo toy nareo satria tsy agnisa ty tontolo toy. Ty anto’e, fa jinoboko nareo, le nambahako tamy ty tontolo toy.
20 Tadidio’areo avao i raha nirehafeko tama’areo tihoey tie: Ty mpanompo, le tsy ambone noho i tompo’ey. Naho nagnenjeke ahy iareo, le hagnenjeke anareo ka. Naho nagnorike ty raha rehafeko iareo, le hagnorike ty raha rehafe’areo ka.
21 Faie hanao i raha rey ama’areo iareo mba hanoheragne anareo noho ty agnarako satria tsy hay iareo i nagnirake ahỳ.
22 Naho tsy niavy tamy iareo eo sady tsy nirehake amy iareo raho, le tsy ho nanan-kakeo iareo. Faie amy izao iareo, le tsy afa-tsiny noho ty fahota iareo.
23 Ze malaigne ahy, le malaigne an-dRaeko ka.
24 Naho tsy nataoko tagnatreha iareo eo i asa mbe tsy nisy nanao aze rey, le tsy ho nanan-kakeo iareo. Faie ndra tie fa mahatrea ahy* aza iareo, le mbe malaigne ahy naho malaigne an-dRaeko ka.
25 Faie tsy maintsy miseho zao, amy izay hotanterake i raha voasoratse amy i Lalàna iareoy ao manao tihoey tie: ‘Malaigne ahy amy izao avao iareo.’
26 Hisy mpagnampe homein-dRaeko zay hiraheko ama’areo atoy. I fagnahy masigne mampahafantatse i hamaregnagneỳ o mpagnampe boake aman-dRaeko iohoe. Hagnampe anareo hahafantatse soa ty miomba ahy reke.
27 Le inareo ka hagnambara ty miomba ahy satria fa niarake tamako boake am-boaloha’e agne nareo.
