Talily Soa Nisorate i Jaona 16:1-33
16 “Nirehafeko tama’areo ze raha rezay, amy izay nareo tsy miala amako.*
2 Horoahe o ndatio hiala amy i sinagogay ao nareo. Ho avy ty fotoagne* hamonoa o ndatio anareo, le hieretseretse iareo naho fa manao izay tie manao fanompoagne masigne ho an’Andrianagnahare.
3 Faie hanao o raha rehoe iareo satria tsy mahafantatse i Rae sady tsy mahafantatse ahy ka.
4 Faie ndra tie eo zay, le rehafeko ama’areo o raha rehoe, amy izay naho fa avy ty fotoagne isehoa’e, le hotsiaro’areo tie fa nirehafeko tama’areo o raha rehoe.
“Tsy nirehafeko tama’areo hey ze raha rezay satria raho mbe tama’areo teo.
5 Fa handeha amy i nagnirake ahỳ agne raho hinane zao, faie tsy misy ama’areo magnontane ahy tie: ‘Hombaia iheo?’
6 Nalahelo ty fo’areo satria nirehafeko tama’areo o raha rehoe.
7 Faie rehafeko ama’areo, fa hahasoa anareo ty fandehanako. Ty anto’e, naho tsy mandeha raho, le tsy ho avy ama’areo atoy i mpagnampey. Fa naho mandeha raho, le hiraheko ama’areo atoy reke.
8 Naho fa avy reke, le hampibaribary amy ty tontolo toy tie, ino ty atao tihoe fahotagne naho ty hamaregnagne vaho ty fitsaragne boake aman’Andrianagnahare.
9 Voaloha’e, hampibaribary i fahotagney reke satria tsy mino ahy iareo.
10 Hampibaribary i hamaregnagney ka reke satria handeha amy i Rae agne raho, le tsy hotrea’areo sasa.
11 Hampibaribary i fitsaragney ka reke satria fa nitsaraegne i mpitondra ty tontoloy toỳ.
12 “Mbe maro ty raha toko’e horehafeko ama’areo faie tsy hotaka’areo zay naho rehafeko amy izao.
13 Fa naho fa avy i mpagnampey ndra i fagnahy masigney, i mampahafantatse ty hamaregnagney, le hampianare’e anareo iaby ze kila hamaregnagne. Ty anto’e, tsy ty heve’e manokagne ro horehafe’e fa ze raha rei’e ro horehafe’e. Hambara’e anareo ka ty raha mbe ho avy.
14 Hagnomey voninahitse ahy reke satria hambara’e anareo ze raha nirei’e tamako.
15 Ze raha iaby ahy i Rae, le ahike. Izay ty mahavy ahy mirehake tie, hambara’e anareo ze raha nirei’e tamako.
16 Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo.”
17 Le nifampirehake ty ila’e amy i mpiana’e rey tie: “Ino ty tea’e horehafegne amy tihoe: ‘Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo’, naho i reha’e tihoey tie, ‘satria raho handeha amy i Rae agne’?”
18 Nifampirehake areke iareo tie: “Ino ty tea’e horehafegne amy tihoe, ‘kedekede ty sisa’? Tsy fantantikagne ty raha tea’e horehafegne.”
19 Nihay i Jesosy tie te hagnontane aze iareo. Hoe areke ty Jesosy tamy iareo: “Nagnino nareo ro mifagnontane amy i rehako tihoey tie: ‘Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo’?
20 Volagneko ama’areo,* fa halahelo naho hitagny nareo, fa ty tontolo toy ho fale. Ho ore nareo faie hivalike hafaleagne ze haorea’areo zay.
21 Manaintaigne ty ampela raike naho fa mitsongo satria fa marine ty fotoagne hiteraha’e. Faie naho fa terake reke, le haligno’e i haorea’ey noho ty hafalea’e naho fa mahatrea i ana’ey.
22 Malahelo ka nareo tie amy izao. Faie naho fa hahatrea ahy indraike nareo, le ho fale sady tsy hisy ndaty hahavita hagnafake ze hafalea’areo zay.
23 Tsy hagnontane ahy sasa ka nareo amy izay. Volagneko ama’areo, fa ndra inogn’ino raha angatahe’areo amy i Rae, le homea’e anareo zay amy ty agnarako.
24 Faie hatrake amy izao nareo, le mbe tsy nisy raha nangatahe’areo amy ty agnarako. Mangataha amy ty agnarako areke, le hahazo nareo. Tena ho fale nareo naho manao izay.
25 “Nampiasa fagnoharagne raho naho fa nirehake o raha rehoe tama’areo. Faie ho avy ty fotoagne tsy hampiasako fagnoharagne sasa naho fa mirehake ama’areo, fa le avy le habejako ama’areo ty miomba i Rae.
26 Amy ze andro zay nareo, le hangatake amy i Rae amy ty agnarako. Faie tsy midika zay tie, iraho ty hangatake raha ho anareo ama’e.
27 Ty anto’e, tena tea i Rae nareo satria nareo tea ahy ka sady mino tie, solontegnan’Andrianagnahare raho.
28 Niavy mba ho solontegna i Rae amy ty tontolo toy eto raho. Hiala amy ty tontolo toy eto raho hinane zao, le handeha amy i Rae agne.”
29 Hoe i mpiana’e rey tama’e: “Tsy nampiasa fagnoharagne sasa ihe hinaneo fa le avy le nabeja’o ty raha tea’o horehafegne.
30 Hai’ay fa mahay ze kila raha rehe sady tsy misy ndaty mila magnontane azo. Izay ty mahavy anay mino tie boake aman’Agnahare rehe.”
31 Hoe ty navale i Jesosy iareo: “Mino nareo hinane zao?
32 Ho avy ty fotoagne hilaisa’areo tsikiraidraike amy ty tragno’areo agne iaby, le henga’areo raike raho. Fa marine ze fotoagne zay. Faie tsy ho irerike raho satria miarake amako ty Rae.
33 Nirehafeko tama’areo o raha rehoe, amy izay nareo hahazo fiadagnagne amy ty alalako. Hoazon-kaoreagne nareo amy ty tontolo toy eto. Faie manàgna herim-po satria iraho fa nandrese ty tontolo toy!”
Fagnamarehagne ambane peje
^ Abt: “voafingagne ndra tafintohigne.”
^ Abt: “lera.”
^ Abt: “Volagneko ama’areo to vata’e.”
