Talily Soa Nisorate i Jaona 2:1-25
2 Ie roe andro tafara izay, le nisy mariaze ty ta Kana a Galelia agne. Namonje o mariaze iohoe i rene i Jesosỳ.
2 Nahazo fanasagne tamo o mariaze iohoe ka i mpiana i Jesosy rey.
3 Naho fa nilany i divaỳ, le hoe i rene i Jesosỳ tama’e: “Nilany ty divay iareo.”
4 Faie hoe ty Jesosy taman-drene’e: “Ino ty idirantikagne amy izay rampela? Mbe tsy avy ty fotoagne hanoako raha.”
5 Le hoe ty rene’e tamy i mpanjotso hanegne rey: “Oriho’areo ze raha rehafe’e.”
6 Nisy siny vato enegne fisian-drano rezay ty teo, amy izay iareo afake nanasa tagnagne hey aloha ty hihinagne mba ho fagnorihagne ty lalàna o Jiosio. Rano roe bata* ndra telo bata ty mahafeno ty raike amo o siny rehoe.
7 Le hoe ty Jesosy tamy iareo: “Fenò’areo rano o siny reo.” Le nifenoe iareo rano hatrake am-bava’e eo i siny rey.
8 Le hoe reke tamy iareo naho fa niavy eo: “Manoviza amy izay nareo, le indeso’areo amy i mpiandraikitse mariazey agne.” Nangalake areke iareo, le nindese iareo.
9 Le nandrama i mpiandraikitse mariazey i rano niova ho divaỳ, faie tsy nifanta’e tie boake aia (fa i mpanjotso hanegne rey ro nahafantatse). Nitokave’e areke i mpagnengay,
10 le hoe reke tama’e: “Ty ahy o ndatio i divay soay hey ty akare’e aloha, ie reke mamo o ndatio vaho izay akare’e i ratiratỳ. Fa ty azo, ndra i divay soay ro nahaja’o hatrake amy izao.”
11 Io ty fahagagagne voaloha’e natao i Jesosy. Ta Kana a Galelia agne ty nanoa’e aze. Io ty fomba nanoroa’e ty voninahi’e, le nino aze i mpiana’e rey.
12 Tafara izay, le nandeha ta Kapernaomy agne ty Jesosy naho i rene’e vaho i rahalahi’e rey naho i mpiana’e rey. Faie tsy nijanogne ela tagne iareo.
13 Naho fa narine i Pasake Jiosỳ, le nandeha a Jerosalema agne ty Jesosy.
14 Naho fa nizilike tamy i tempolỳ ao reke, le nahatrea ndaty nivarotse agnombe naho agnondry vaho voromahilala. Nahatrea ndaty mpanakalo vola nitoboke tagnila i lataba iareoy eo ka reke.
15 Namboatse karavasy tamy ty taly areke reke, le igne ty nandroaha’e i agnombe naho i agnondry tamy i tempolỳ ao rey. Nalonga’e i vola i ndaty mpanakalo volay rey, le natonta’e ka i lataba iareoy.
16 Hoe ka reke tamy i mpamarotse voromahilala rey: “Indeso’areo miakatse agne ty raha retine! Ko atao’areo tragno fivarotagne sasa ty anjomban-dRaeko toy!”
17 Naho fa nahatrea izay i mpiana’e rey, le nahatsiaro ty raha rehafe ty Soratse Masigne tihoe toy tie: “Hirearea manahake o afò am-poko ato ty hateako* i anjomba’oy.”
18 Le hoe o Jiosio tama’e: “Ino ty famantaragne hatao’o mba hanoroa’o ama’ay tie managne fahefagne hanao o raha rehoe vata’e rehe?”
19 Le hoe ty Jesosy tamy iareo: “Ravao ty tempoly toy, le haoreko agnate ty telo andro.”
20 Le hoe i Jiosy rey: “Tagnate ty 46 taogne anio ty nagnoregnagne ty tempoly toy, ihe vao le hahavita hagnoregne aze agnate ty telo andro?”
21 Faie i vata’ey o tempoly tea’e horehafegneo.
22 Naho fa nivelomegne amy ty mate reke, le nitsiaro i mpiana’e rey tie mateteke reke ro nirehake izay. Vao mainke nino ty Soratse Masigne naho ty raha nirehafe i Jesosy areke iareo.
23 Faie ndra tie teo zay, le nanao fahagagagne reke tamy i fete i Pasakeỳ, tamy ireke ta Jerosalema agney. Maro ty ndaty nino aze naho fa nahatrea ze raha zay.
24 Faie tsy natokisa i Jesosy iareo satria nihai’e soa iareo iaby.
25 Tsy nipay ndaty hagnambara ama’e ty miomba o ndatio ka reke satria hai’e ty am-po o ndatio ao.
